Utshovঅধ্যায় 263
263.1
মার্কণ্ডেয় উবাচ
সখা দশরথস্যাসীজ্জটায়ুররুণাত্মজঃ
গৃধ্ররাজো মহাবীর্যঃ সংপাতির্যস্য সোদরঃ
263.2
স দদর্শ তদা সীতাং রাবণাঙ্কগতাং স্নুষাম্
ক্রোধাদভ্যদ্রবত্পক্ষী রাবণং রাক্ষসেশ্বরম্
263.3
অথৈনমব্রবীদ্গৃধ্রো মুঞ্চ মুঞ্চেতি মৈথিলীম্
ধ্রিয়মাণে ময়ি কথং হরিষ্যসি নিশাচর
ন হি মে মোক্ষ্যসে জীবন্যদি নোত্সৃজসে বধূম্
263.4
উক্ত্বৈবং রাক্ষসেন্দ্রং তং চকর্ত নখরৈর্ভৃশম্
পক্ষতুণ্ডপ্রহারৈশ্চ বহুশো জর্জরীকৃতঃ
চক্ষার রুধিরং ভূরি গিরিঃ প্রস্রবণৈরিব
263.5
স বধ্যমানো গৃধ্রেণ রামপ্রিয়হিতৈষিণা
খড্গমাদায় চিচ্ছেদ ভুজৌ তস্য পতত্রিণঃ
263.6
নিহত্য গৃধ্ররাজং স ছিন্নাভ্রশিখরোপমম্
ঊর্ধ্বমাচক্রমে সীতাং গৃহীত্বাঙ্কেন রাক্ষসঃ
263.7
যত্র যত্র তু বৈদেহী পশ্যত্যাশ্রমমণ্ডলম্
সরো বা সরিতং বাপি তত্র মুঞ্চতি ভূষণম্
263.8
সা দদর্শ গিরিপ্রস্থে পঞ্চ বানরপুংগবান্
তত্র বাসো মহদ্দিব্যমুত্সসর্জ মনস্বিনী
263.9
তত্তেষাং বানরেন্দ্রাণাং পপাত পবনোদ্ধুতম্
মধ্যে সুপীতং পঞ্চানাং বিদ্যুন্মেঘান্তরে যথা
263.10
এবং হৃতায়াং বৈদেহ্যাং রামো হত্বা মহামৃগম্
নিবৃত্তো দদৃশে ধীমান্ভ্রাতরং লক্ষ্মণং তদা
263.11
কথমুত্সৃজ্য বৈদেহীং বনে রাক্ষসসেবিতে
ইত্যেবং ভ্রাতরং দৃষ্ট্বা প্রাপ্তোঽসীতি ব্যগর্হয়ৎ
263.12
মৃগরূপধরেণাথ রক্ষসা সোঽপকর্ষণম্
ভ্রাতুরাগমনং চৈব চিন্তয়ন্পর্যতপ্যত
263.13
গর্হয়ন্নেব রামস্তু ত্বরিতস্তং সমাসদৎ
অপি জীবতি বৈদেহী নেতি পশ্যামি লক্ষ্মণ
263.14
তস্য তত্সর্বমাচখ্যৌ সীতায়া লক্ষ্মণো বচঃ
যদুক্তবত্যসদৃশং বৈদেহী পশ্চিমং বচঃ
263.15
দহ্যমানেন তু হৃদা রামোঽভ্যপতদাশ্রমম্
স দদর্শ তদা গৃধ্রং নিহতং পর্বতোপমম্
263.16
রাক্ষসং শঙ্কমানস্তু বিকৃষ্য বলবদ্ধনুঃ
অভ্যধাবত কাকুত্স্থস্ততস্তং সহলক্ষ্মণঃ
263.17
স তাবুবাচ তেজস্বী সহিতৌ রামলক্ষ্মণৌ
গৃধ্ররাজোঽস্মি ভদ্রং বাং সখা দশরথস্য হ
263.18
তস্য তদ্বচনং শ্রুত্বা সংগৃহ্য ধনুষী শুভে
কোঽয়ং পিতরমস্মাকং নাম্নাহেত্যূচতুশ্চ তৌ
263.19
ততো দদৃশতুস্তৌ তং ছিন্নপক্ষদ্বয়ং তথা
তয়োঃ শশংস গৃধ্রস্তু সীতার্থে রাবণাদ্বধম্
263.20
অপৃচ্ছদ্রাঘবো গৃধ্রং রাবণঃ কাং দিশং গতঃ
তস্য গৃধ্রঃ শিরঃকম্পৈরাচচক্ষে মমার চ
263.21
দক্ষিণামিতি কাকুত্স্থো বিদিত্বাস্য তদিঙ্গিতম্
সংস্কারং লম্ভয়ামাস সখায়ং পূজয়ন্পিতুঃ
263.22
ততো দৃষ্ট্বাশ্রমপদং ব্যপবিদ্ধবৃসীঘটম্
বিধ্বস্তকলশং শূন্যং গোমায়ুবলসেবিতম্
263.23
দুঃখশোকসমাবিষ্টৌ বৈদেহীহরণার্দিতৌ
জগ্মতুর্দণ্ডকারণ্যং দক্ষিণেন পরংতপৌ
263.24
বনে মহতি তস্মিংস্তু রামঃ সৌমিত্রিণা সহ
দদর্শ মৃগয়ূথানি দ্রবমাণানি সর্বশঃ
শব্দং চ ঘোরং সত্ত্বানাং দাবাগ্নেরিব বর্ধতঃ
263.25
অপশ্যেতাং মুহূর্তাচ্চ কবন্ধং ঘোরদর্শনম্
মেঘপর্বতসংকাশং শালস্কন্ধং মহাভুজম্
উরোগতবিশালাক্ষং মহোদরমহামুখম্
263.26
যদৃচ্ছয়াথ তদ্রক্ষঃ করে জগ্রাহ লক্ষ্মণম্
বিষাদমগমত্সদ্যঃ সৌমিত্রিরথ ভারত
263.27
স রামমভিসংপ্রেক্ষ্য কৃষ্যতে যেন তন্মুখম্
বিষণ্ণশ্চাব্রবীদ্রামং পশ্যাবস্থামিমাং মম
263.28
হরণং চৈব বৈদেহ্যা মম চায়মুপপ্লবঃ
রাজ্যভ্রংশশ্চ ভবতস্তাতস্য মরণং তথা
263.29
নাহং ত্বাং সহ বৈদেহ্যা সমেতং কোসলাগতম্
দ্রক্ষ্যামি পৃথিবীরাজ্যে পিতৃপৈতামহে স্থিতম্
263.30
দ্রক্ষ্যন্ত্যার্যস্য ধন্যা যে কুশলাজশমীলবৈঃ
অভিষিক্তস্য বদনং সোমং সাভ্রলবং যথা
263.31
এবং বহুবিধং ধীমান্বিললাপ স লক্ষ্মণঃ
তমুবাচাথ কাকুত্স্থঃ সংভ্রমেষ্বপ্যসংভ্রমঃ
263.32
মা বিষীদ নরব্যাঘ্র নৈষ কশ্চিন্ময়ি স্থিতে
ছিন্ধ্যস্য দক্ষিণং বাহুং ছিন্নঃ সব্যো ময়া ভুজঃ
263.33
ইত্যেবং বদতা তস্য ভুজো রামেণ পাতিতঃ
খড্গেন ভৃশতীক্ষ্ণেন নিকৃত্তস্তিলকাণ্ডবৎ
263.34
ততোঽস্য দক্ষিণং বাহুং খড্গেনাজঘ্নিবান্বলী
সৌমিত্রিরপি সংপ্রেক্ষ্য ভ্রাতরং রাঘবং স্থিতম্
263.35
পুনরভ্যাহনত্পার্শ্বে তদ্রক্ষো লক্ষ্মণো ভৃশম্
গতাসুরপতদ্ভূমৌ কবন্ধঃ সুমহাংস্ততঃ
263.36
তস্য দেহাদ্বিনিঃসৃত্য পুরুষো দিব্যদর্শনঃ
দদৃশে দিবমাস্থায় দিবি সূর্য ইব জ্বলন্
263.37
পপ্রচ্ছ রামস্তং বাগ্মী কস্ত্বং প্রব্রূহি পৃচ্ছতঃ
কাময়া কিমিদং চিত্রমাশ্চর্যং প্রতিভাতি মে
263.38
তস্যাচচক্ষে গন্ধর্বো বিশ্বাবসুরহং নৃপ
প্রাপ্তো ব্রহ্মানুশাপেন যোনিং রাক্ষসসেবিতাম্
263.39
রাবণেন হৃতা সীতা রাজ্ঞা লঙ্কানিবাসিনা
সুগ্রীবমভিগচ্ছস্ব স তে সাহ্যং করিষ্যতি
263.40
এষা পম্পা শিবজলা হংসকারণ্ডবায়ুতা
ঋশ্যমূকস্য শৈলস্য সংনিকর্ষে তটাকিনী
263.41
সংবসত্যত্র সুগ্রীবশ্চতুর্ভিঃ সচিবৈঃ সহ
ভ্রাতা বানররাজস্য বালিনো হেমমালিনঃ
263.42
এতাবচ্ছক্যমস্মাভির্বক্তুং দ্রষ্টাসি জানকীম্
ধ্রুবং বানররাজস্য বিদিতো রাবণালয়ঃ
263.43
ইত্যুক্ত্বান্তর্হিতো দিব্যঃ পুরুষঃ স মহাপ্রভঃ
বিস্ময়ং জগ্মতুশ্চোভৌ তৌ বীরৌ রামলক্ষ্মণৌ