Utshovঅধ্যায় 262
262.1
মার্কণ্ডেয় উবাচ
মারীচস্ত্বথ সংভ্রান্তো দৃষ্ট্বা রাবণমাগতম্
পূজয়ামাস সত্কারৈঃ ফলমূলাদিভিস্তথা
262.2
বিশ্রান্তং চৈনমাসীনমন্বাসীনঃ স রাক্ষসঃ
উবাচ প্রশ্রিতং বাক্যং বাক্যজ্ঞো বাক্যকোবিদম্
262.3
ন তে প্রকৃতিমান্বর্ণঃ কচ্চিত্ক্ষেমং পুরে তব
কচ্চিত্প্রকৃতয়ঃ সর্বা ভজন্তে ত্বাং যথা পুরা
262.4
কিমিহাগমনে চাপি কার্যং তে রাক্ষসেশ্বর
কৃতমিত্যেব তদ্বিদ্ধি যদ্যপি স্যাত্সুদুষ্করম্
262.5
শশংস রাবণস্তস্মৈ তত্সর্বং রামচেষ্টিতম্
মারীচস্ত্বব্রবীচ্ছ্রুত্বা সমাসেনৈব রাবণম্
262.6
অলং তে রামমাসাদ্য বীর্যজ্ঞো হ্যস্মি তস্য বৈ
বাণবেগং হি কস্তস্য শক্তঃ সোঢুং মহাত্মনঃ
262.7
প্রব্রজ্যায়াং হি মে হেতুঃ স এব পুরুষর্ষভঃ
বিনাশমুখমেতত্তে কেনাখ্যাতং দুরাত্মনা
262.8
তমুবাচাথ সক্রোধো রাবণঃ পরিভর্ত্সয়ন্
অকুর্বতোঽস্মদ্বচনং স্যান্মৃত্যুরপি তে ধ্রুবম্
262.9
মারীচশ্চিন্তয়ামাস বিশিষ্টান্মরণং বরম্
অবশ্যং মরণে প্রাপ্তে করিষ্যাম্যস্য যন্মতম্
262.10
ততস্তং প্রত্যুবাচাথ মারীচো রাক্ষসেশ্বরম্
কিং তে সাহ্যং ময়া কার্যং করিষ্যাম্যবশোঽপি তৎ
262.11
তমব্রবীদ্দশগ্রীবো গচ্ছ সীতাং প্রলোভয়
রত্নশৃঙ্গো মৃগো ভূত্বা রত্নচিত্রতনূরুহঃ
262.12
ধ্রুবং সীতা সমালক্ষ্য ত্বাং রামং চোদয়িষ্যতি
অপক্রান্তে চ কাকুত্স্থে সীতা বশ্যা ভবিষ্যতি
262.13
তামাদায়াপনেষ্যামি ততঃ স ন ভবিষ্যতি
ভার্যাবিয়োগাদ্দুর্বুদ্ধিরেতত্সাহ্যং কুরুষ্ব মে
262.14
ইত্যেবমুক্তো মারীচঃ কৃত্বোদকমথাত্মনঃ
রাবণং পুরতো যান্তমন্বগচ্ছত্সুদুঃখিতঃ
262.15
ততস্তস্যাশ্রমং গত্বা রামস্যাক্লিষ্টকর্মণঃ
চক্রতুস্তত্তথা সর্বমুভৌ যত্পূর্বমন্ত্রিতম্
262.16
রাবণস্তু যতির্ভূত্বা মুণ্ডঃ কুণ্ডী ত্রিদণ্ডধৃক্
মৃগশ্চ ভূত্বা মারীচস্তং দেশমুপজগ্মতুঃ
262.17
দর্শয়ামাস বৈদেহীং মারীচো মৃগরূপধৃক্
চোদয়ামাস তস্যার্থে সা রামং বিধিচোদিতা
262.18
রামস্তস্যাঃ প্রিয়ং কুর্বন্ধনুরাদায় সত্বরঃ
রক্ষার্থে লক্ষ্মণং ন্যস্য প্রয়য়ৌ মৃগলিপ্সয়া
262.19
স ধন্বী বদ্ধতূণীরঃ খড্গগোধাঙ্গুলিত্রবান্
অন্বধাবন্মৃগং রামো রুদ্রস্তারামৃগং যথা
262.20
সোঽন্তর্হিতঃ পুনস্তস্য দর্শনং রাক্ষসো ব্রজন্
চকর্ষ মহদধ্বানং রামস্তং বুবুধে ততঃ
262.21
নিশাচরং বিদিত্বা তং রাঘবঃ প্রতিভানবান্
অমোঘং শরমাদায় জঘান মৃগরূপিণম্
262.22
স রামবাণাভিহতঃ কৃত্বা রামস্বরং তদা
হা সীতে লক্ষ্মণেত্যেবং চুক্রোশার্তস্বরেণ হ
262.23
শুশ্রাব তস্য বৈদেহী ততস্তাং করুণাং গিরম্
সা প্রাদ্রবদ্যতঃ শব্দস্তামুবাচাথ লক্ষ্মণঃ
262.24
অলং তে শঙ্কয়া ভীরু কো রামং বিষহিষ্যতি
মুহূর্তাদ্দ্রক্ষ্যসে রামমাগতং তং শুচিস্মিতে
262.25
ইত্যুক্ত্বা সা প্ররুদতী পর্যশঙ্কত দেবরম্
হতা বৈ স্ত্রীস্বভাবেন শুদ্ধচারিত্রভূষণম্
262.26
সা তং পরুষমারব্ধা বক্তুং সাধ্বী পতিব্রতা
নৈষ কালো ভবেন্মূঢ যং ত্বং প্রার্থয়সে হৃদা
262.27
অপ্যহং শস্ত্রমাদায় হন্যামাত্মানমাত্মনা
পতেয়ং গিরিশৃঙ্গাদ্বা বিশেয়ং বা হুতাশনম্
262.28
রামং ভর্তারমুত্সৃজ্য ন ত্বহং ত্বাং কথংচন
নিহীনমুপতিষ্ঠেয়ং শার্দূলী ক্রোষ্টুকং যথা
262.29
এতাদৃশং বচঃ শ্রুত্বা লক্ষ্মণঃ প্রিয়রাঘবঃ
পিধায় কর্ণৌ সদ্বৃত্তঃ প্রস্থিতো যেন রাঘবঃ
স রামস্য পদং গৃহ্য প্রসসার ধনুর্ধরঃ
262.30
এতস্মিন্নন্তরে রক্ষো রাবণঃ প্রত্যদৃশ্যত
অভব্যো ভব্যরূপেণ ভস্মচ্ছন্ন ইবানলঃ
যতিবেষপ্রতিচ্ছন্নো জিহীর্ষুস্তামনিন্দিতাম্
262.31
সা তমালক্ষ্য সংপ্রাপ্তং ধর্মজ্ঞা জনকাত্মজা
নিমন্ত্রয়ামাস তদা ফলমূলাশনাদিভিঃ
262.32
অবমন্য স তত্সর্বং স্বরূপং প্রতিপদ্য চ
সান্ত্বয়ামাস বৈদেহীমিতি রাক্ষসপুংগবঃ
262.33
সীতে রাক্ষসরাজোঽহং রাবণো নাম বিশ্রুতঃ
মম লঙ্কা পুরী নাম্না রম্যা পারে মহোদধেঃ
262.34
তত্র ত্বং বরনারীষু শোভিষ্যসি ময়া সহ
ভার্যা মে ভব সুশ্রোণি তাপসং ত্যজ রাঘবম্
262.35
এবমাদীনি বাক্যানি শ্রুত্বা সীতাথ জানকী
পিধায় কর্ণৌ সুশ্রোণী মৈবমিত্যব্রবীদ্বচঃ
262.36
প্রপতেদ্দ্যৌঃ সনক্ষত্রা পৃথিবী শকলীভবেৎ
শৈত্যমগ্নিরিয়ান্নাহং ত্যজেয়ং রঘুনন্দনম্
262.37
কথং হি ভিন্নকরটং পদ্মিনং বনগোচরম্
উপস্থায় মহানাগং করেণুঃ সূকরং স্পৃশেৎ
262.38
কথং হি পীত্বা মাধ্বীকং পীত্বা চ মধুমাধবীম্
লোভং সৌবীরকে কুর্যান্নারী কাচিদিতি স্মরে
262.39
ইতি সা তং সমাভাষ্য প্রবিবেশাশ্রমং পুনঃ
তামনুদ্রুত্য সুশ্রোণীং রাবণঃ প্রত্যষেধয়ৎ
262.40
ভর্ত্সয়িত্বা তু রূক্ষেণ স্বরেণ গতচেতনাম্
মূর্ধজেষু নিজগ্রাহ খমুপাচক্রমে ততঃ
262.41
তাং দদর্শ তদা গৃধ্রো জটায়ুর্গিরিগোচরঃ
রুদতীং রাম রামেতি হ্রিয়মাণাং তপস্বিনীম্