Utshovঅধ্যায় 261
261.1
যুধিষ্ঠির উবাচ
উক্তং ভগবতা জন্ম রামাদীনাং পৃথক্পৃথক্
প্রস্থানকারণং ব্রহ্মঞ্শ্রোতুমিচ্ছামি কথ্যতাম্
261.2
কথং দাশরথী বীরৌ ভ্রাতরৌ রামলক্ষ্মণৌ
প্রস্থাপিতৌ বনং ব্রহ্ম মৈথিলী চ যশস্বিনী
261.3
মার্কণ্ডেয় উবাচ
জাতপুত্রো দশরথঃ প্রীতিমানভবন্নৃপঃ
ক্রিয়ারতির্ধর্মপরঃ সততং বৃদ্ধসেবিতা
261.4
ক্রমেণ চাস্য তে পুত্রা ব্যবর্ধন্ত মহৌজসঃ
বেদেষু সরহস্যেষু ধনুর্বেদে চ পারগাঃ
261.5
চরিতব্রহ্মচর্যাস্তে কৃতদারাশ্চ পার্থিব
যদা তদা দশরথঃ প্রীতিমানভবত্সুখী
261.6
জ্যেষ্ঠো রামোঽভবত্তেষাং রময়ামাস হি প্রজাঃ
মনোহরতয়া ধীমান্পিতুর্হৃদয়তোষণঃ
261.7
ততঃ স রাজা মতিমান্মত্বাত্মানং বয়োঽধিকম্
মন্ত্রয়ামাস সচিবৈর্ধর্মজ্ঞৈশ্চ পুরোহিতৈঃ
261.8
অভিষেকায় রামস্য যৌবরাজ্যেন ভারত
প্রাপ্তকালং চ তে সর্বে মেনিরে মন্ত্রিসত্তমাঃ
261.9
লোহিতাক্ষং মহাবাহুং মত্তমাতঙ্গগামিনম্
দীর্ঘবাহুং মহোরস্কং নীলকুঞ্চিতমূর্ধজম্
261.10
দীপ্যমানং শ্রিয়া বীরং শক্রাদনবমং বলে
পারগং সর্বধর্মাণাং বৃহস্পতিসমং মতৌ
261.11
সর্বানুরক্তপ্রকৃতিং সর্ববিদ্যাবিশারদম্
জিতেন্দ্রিয়মমিত্রাণামপি দৃষ্টিমনোহরম্
261.12
নিয়ন্তারমসাধূনাং গোপ্তারং ধর্মচারিণাম্
ধৃতিমন্তমনাধৃষ্যং জেতারমপরাজিতম্
261.13
পুত্রং রাজা দশরথঃ কৌসল্যানন্দবর্ধনম্
সংদৃশ্য পরমাং প্রীতিমগচ্ছত্কুরুনন্দন
261.14
চিন্তয়ংশ্চ মহাতেজা গুণান্রামস্য বীর্যবান্
অভ্যভাষত ভদ্রং তে প্রীয়মাণঃ পুরোহিতম্
261.15
অদ্য পুষ্যো নিশি ব্রহ্মন্পুণ্যং যোগমুপৈষ্যতি
সংভারাঃ সংভ্রিয়ন্তাং মে রামশ্চোপনিমন্ত্র্যতাম্
261.16
ইতি তদ্রাজবচনং প্রতিশ্রুত্যাথ মন্থরা
কৈকেয়ীমভিগম্যেদং কালে বচনমব্রবীৎ
261.17
অদ্য কৈকেয়ি দৌর্ভাগ্যং রাজ্ঞা তে খ্যাপিতং মহৎ
আশীবিষস্ত্বাং সংক্রুদ্ধশ্চণ্ডো দশতি দুর্ভগে
261.18
সুভগা খলু কৌসল্যা যস্যাঃ পুত্রোঽভিষেক্ষ্যতে
কুতো হি তব সৌভাগ্যং যস্যাঃ পুত্রো ন রাজ্যভাক্
261.19
সা তদ্বচনমাজ্ঞায় সর্বাভরণভূষিতা
বেদীবিলগ্নমধ্যেব বিভ্রতী রূপমুত্তমম্
261.20
বিবিক্তে পতিমাসাদ্য হসন্তীব শুচিস্মিতা
প্রণয়ং ব্যঞ্জয়ন্তীব মধুরং বাক্যমব্রবীৎ
261.21
সত্যপ্রতিজ্ঞ যন্মে ত্বং কামমেকং নিসৃষ্টবান্
উপাকুরুষ্ব তদ্রাজংস্তস্মান্মুচ্যস্ব সংকটাৎ
261.22
রাজোবাচ
বরং দদানি তে হন্ত তদ্গৃহাণ যদিচ্ছসি
অবধ্যো বধ্যতাং কোঽদ্য বধ্যঃ কোঽদ্য বিমুচ্যতাম্
261.23
ধনং দদানি কস্যাদ্য হ্রিয়তাং কস্য বা পুনঃ
ব্রাহ্মণস্বাদিহান্যত্র যত্কিংচিদ্বিত্তমস্তি মে
261.24
মার্কণ্ডেয় উবাচ
সা তদ্বচনমাজ্ঞায় পরিগৃহ্য নরাধিপম্
আত্মনো বলমাজ্ঞায় তত এনমুবাচ হ
261.25
আভিষেচনিকং যত্তে রামার্থমুপকল্পিতম্
ভরতস্তদবাপ্নোতু বনং গচ্ছতু রাঘবঃ
261.26
স তদ্রাজা বচঃ শ্রুত্বা বিপ্রিয়ং দারুণোদয়ম্
দুঃখার্তো ভরতশ্রেষ্ঠ ন কিংচিদ্ব্যাজহার হ
261.27
ততস্তথোক্তং পিতরং রামো বিজ্ঞায় বীর্যবান্
বনং প্রতস্থে ধর্মাত্মা রাজা সত্যো ভবত্বিতি
261.28
তমন্বগচ্ছল্লক্ষ্মীবান্ধনুষ্মাঁল্লক্ষ্মণস্তদা
সীতা চ ভার্যা ভদ্রং তে বৈদেহী জনকাত্মজা
261.29
ততো বনং গতে রামে রাজা দশরথস্তদা
সময়ুজ্যত দেহস্য কালপর্যায়ধর্মণা
261.30
রামং তু গতমাজ্ঞায় রাজানং চ তথাগতম্
আনায্য ভরতং দেবী কৈকেয়ী বাক্যমব্রবীৎ
261.31
গতো দশরথঃ স্বর্গং বনস্থৌ রামলক্ষ্মণৌ
গৃহাণ রাজ্যং বিপুলং ক্ষেমং নিহতকণ্টকম্
261.32
তামুবাচ স ধর্মাত্মা নৃশংসং বত তে কৃতম্
পতিং হত্বা কুলং চেদমুত্সাদ্য ধনলুব্ধয়া
261.33
অয়শঃ পাতয়িত্বা মে মূর্ধ্নি ত্বং কুলপাংসনে
সকামা ভব মে মাতরিত্যুক্ত্বা প্ররুরোদ হ
261.34
স চারিত্রং বিশোধ্যাথ সর্বপ্রকৃতিসংনিধৌ
অন্বয়াদ্ভ্রাতরং রামং বিনিবর্তনলালসঃ
261.35
কৌসল্যাং চ সুমিত্রাং চ কৈকেয়ীং চ সুদুঃখিতঃ
অগ্রে প্রস্থাপ্য যানৈঃ স শত্রুঘ্নসহিতো যয়ৌ
261.36
বসিষ্ঠবামদেবাভ্যাং বিপ্রৈশ্চান্যৈঃ সহস্রশঃ
পৌরজানপদৈঃ সার্ধং রামানয়নকাঙ্ক্ষয়া
261.37
দদর্শ চিত্রকূটস্থং স রামং সহলক্ষ্মণম্
তাপসানামলংকারং ধারয়ন্তং ধনুর্ধরম্
261.38
বিসর্জিতঃ স রামেণ পিতুর্বচনকারিণা
নন্দিগ্রামেঽকরোদ্রাজ্যং পুরস্কৃত্যাস্য পাদুকে
261.39
রামস্তু পুনরাশঙ্ক্য পৌরজানপদাগমম্
প্রবিবেশ মহারণ্যং শরভঙ্গাশ্রমং প্রতি
261.40
সত্কৃত্য শরভঙ্গং স দণ্ডকারণ্যমাশ্রিতঃ
নদীং গোদাবরীং রম্যামাশ্রিত্য ন্যবসত্তদা
261.41
বসতস্তস্য রামস্য ততঃ শূর্পণখাকৃতম্
খরেণাসীন্মহদ্বৈরং জনস্থাননিবাসিনা
261.42
রক্ষার্থং তাপসানাং চ রাঘবো ধর্মবত্সলঃ
চতুর্দশ সহস্রাণি জঘান ভুবি রক্ষসাম্
261.43
দূষণং চ খরং চৈব নিহত্য সুমহাবলৌ
চক্রে ক্ষেমং পুনর্ধীমান্ধর্মারণ্যং স রাঘবঃ
261.44
হতেষু তেষু রক্ষঃসু ততঃ শূর্পণখা পুনঃ
যয়ৌ নিকৃত্তনাসোষ্ঠী লঙ্কাং ভ্রাতুর্নিবেশনম্
261.45
ততো রাবণমভ্যেত্য রাক্ষসী দুঃখমূর্ছিতা
পপাত পাদয়োর্ভ্রাতুঃ সংশুষ্করুধিরাননা
261.46
তাং তথা বিকৃতাং দৃষ্ট্বা রাবণঃ ক্রোধমূর্ছিতঃ
উত্পপাতাসনাত্ক্রুদ্ধো দন্তৈর্দন্তানুপস্পৃশন্
261.47
স্বানমাত্যান্বিসৃজ্যাথ বিবিক্তে তামুবাচ সঃ
কেনাস্যেবং কৃতা ভদ্রে মামচিন্ত্যাবমন্য চ
261.48
কঃ শূলং তীক্ষ্ণমাসাদ্য সর্বগাত্রৈর্নিষেবতে
কঃ শিরস্যগ্নিমাদায় বিশ্বস্তঃ স্বপতে সুখম্
261.49
আশীবিষং ঘোরতরং পাদেন স্পৃশতীহ কঃ
সিংহং কেসরিণং কশ্চ দংষ্ট্রাসু স্পৃশ্য তিষ্ঠতি
261.50
ইত্যেবং ব্রুবতস্তস্য স্রোতোভ্যস্তেজসোঽর্চিষঃ
নিশ্চেরুর্দহ্যতো রাত্রৌ বৃক্ষস্যেব স্বরন্ধ্রতঃ
261.51
তস্য তত্সর্বমাচখ্যৌ ভগিনী রামবিক্রমম্
খরদূষণসংয়ুক্তং রাক্ষসানাং পরাভবম্
261.52
স নিশ্চিত্য ততঃ কৃত্যং স্বসারমুপসান্ত্ব্য চ
ঊর্ধ্বমাচক্রমে রাজা বিধায় নগরে বিধিম্
261.53
ত্রিকূটং সমতিক্রম্য কালপর্বতমেব চ
দদর্শ মকরাবাসং গম্ভীরোদং মহোদধিম্
261.54
তমতীত্যাথ গোকর্ণমভ্যগচ্ছদ্দশাননঃ
দয়িতং স্থানমব্যগ্রং শূলপাণের্মহাত্মনঃ
261.55
তত্রাভ্যগচ্ছন্মারীচং পূর্বামাত্যং দশাননঃ
পুরা রামভয়াদেব তাপস্যং সমুপাশ্রিতম্