অধ্যায় 260

260.1

মার্কণ্ডেয় উবাচ
ততো ব্রহ্মর্ষয়ঃ সিদ্ধা দেবরাজর্ষয়স্তথা
হব্যবাহং পুরস্কৃত্য ব্রহ্মাণং শরণং গতাঃ

অগ্নিরুবাচ
যঃ স বিশ্রবসঃ পুত্রো দশগ্রীবো মহাবলঃ
অবধ্যো বরদানেন কৃতো ভগবতা পুরা

স বাধতে প্রজাঃ সর্বা বিপ্রকারৈর্মহাবলঃ
ততো নস্ত্রাতু ভগবন্নান্যস্ত্রাতা হি বিদ্যতে

ব্রহ্মোবাচ
ন স দেবাসুরৈঃ শক্যো যুদ্ধে জেতুং বিভাবসো
বিহিতং তত্র যত্কার্যমভিতস্তস্য নিগ্রহে

তদর্থমবতীর্ণোঽসৌ মন্নিয়োগাচ্চতুর্ভুজঃ
বিষ্ণুঃ প্রহরতাং শ্রেষ্ঠঃ স কর্মৈতত্করিষ্যতি

মার্কণ্ডেয় উবাচ
পিতামহস্ততস্তেষাং সংনিধৌ বাক্যমব্রবীৎ
সর্বৈর্দেবগণৈঃ সার্ধং সংভবধ্বং মহীতলে

বিষ্ণোঃ সহায়ানৃক্ষীষু বানরীষু চ সর্বশঃ
জনয়ধ্বং সুতান্বীরান্কামরূপবলান্বিতান্

ততো ভাগানুভাগেন দেবগন্ধর্বদানবাঃ
অবতর্তুং মহীং সর্বে রঞ্জয়ামাসুরঞ্জসা

তেষাং সমক্ষং গন্ধর্বীং দুন্দুভীং নাম নামতঃ
শশাস বরদো দেবো দেবকার্যার্থসিদ্ধয়ে

পিতামহবচঃ শ্রুত্বা গন্ধর্বী দুন্দুভী ততঃ
মন্থরা মানুষে লোকে কুব্জা সমভবত্তদা

শক্রপ্রভৃতয়শ্চৈব সর্বে তে সুরসত্তমাঃ
বানরর্ক্ষবরস্ত্রীষু জনয়ামাসুরাত্মজান্
তেঽন্ববর্তন্পিতৄন্সর্বে যশসা চ বলেন চ

ভেত্তারো গিরিশৃঙ্গাণাং শালতালশিলায়ুধাঃ
বজ্রসংহননাঃ সর্বে সর্বে চৌঘবলাস্তথা

কামবীর্যধরাশ্চৈব সর্বে যুদ্ধবিশারদাঃ
নাগায়ুতসমপ্রাণা বায়ুবেগসমা জবে
যত্রেচ্ছকনিবাসাশ্চ কেচিদত্র বনৌকসঃ

এবং বিধায় তত্সর্বং ভগবাঁল্লোকভাবনঃ
মন্থরাং বোধয়ামাস যদ্যত্কার্যং যথা যথা

সা তদ্বচনমাজ্ঞায় তথা চক্রে মনোজবা
ইতশ্চেতশ্চ গচ্ছন্তী বৈরসংধুক্ষণে রতা