Utshovঅধ্যায় 259
259.1
মার্কণ্ডেয় উবাচ
পুলস্ত্যস্য তু যঃ ক্রোধাদর্ধদেহোঽভবন্মুনিঃ
বিশ্রবা নাম সক্রোধঃ স বৈশ্রবণমৈক্ষত
259.2
বুবুধে তং তু সক্রোধং পিতরং রাক্ষসেশ্বরঃ
কুবেরস্তত্প্রসাদার্থং যততে স্ম সদা নৃপ
259.3
স রাজরাজো লঙ্কায়াং নিবসন্নরবাহনঃ
রাক্ষসীঃ প্রদদৌ তিস্রঃ পিতুর্বৈ পরিচারিকাঃ
259.4
তাস্তদা তং মহাত্মানং সংতোষয়িতুমুদ্যতাঃ
ঋষিং ভরতশার্দূল নৃত্তগীতবিশারদাঃ
259.5
পুষ্পোত্কটা চ রাকা চ মালিনী চ বিশাং পতে
অন্যোন্যস্পর্ধয়া রাজঞ্শ্রেয়স্কামাঃ সুমধ্যমাঃ
259.6
তাসাং স ভগবাংস্তুষ্টো মহাত্মা প্রদদৌ বরান্
লোকপালোপমান্পুত্রানেকৈকস্যা যথেপ্সিতান্
259.7
পুষ্পোত্কটায়াং জজ্ঞাতে দ্বৌ পুত্রৌ রাক্ষসেশ্বরৌ
কুম্ভকর্ণদশগ্রীবৌ বলেনাপ্রতিমৌ ভুবি
259.8
মালিনী জনয়ামাস পুত্রমেকং বিভীষণম্
রাকায়াং মিথুনং জজ্ঞে খরঃ শূর্পণখা তথা
259.9
বিভীষণস্তু রূপেণ সর্বেভ্যোঽভ্যধিকোঽভবৎ
স বভূব মহাভাগো ধর্মগোপ্তা ক্রিয়ারতিঃ
259.10
দশগ্রীবস্তু সর্বেষাং জ্যেষ্ঠো রাক্ষসপুংগবঃ
মহোত্সাহো মহাবীর্যো মহাসত্ত্বপরাক্রমঃ
259.11
কুম্ভকর্ণো বলেনাসীত্সর্বেভ্যোঽভ্যধিকস্তদা
মায়াবী রণশৌণ্ডশ্চ রৌদ্রশ্চ রজনীচরঃ
259.12
খরো ধনুষি বিক্রান্তো ব্রহ্মদ্বিট্পিশিতাশনঃ
সিদ্ধবিঘ্নকরী চাপি রৌদ্রা শূর্পণখা তথা
259.13
সর্বে বেদবিদঃ শূরাঃ সর্বে সুচরিতব্রতাঃ
ঊষুঃ পিত্রা সহ রতা গন্ধমাদনপর্বতে
259.14
ততো বৈশ্রবণং তত্র দদৃশুর্নরবাহনম্
পিত্রা সার্ধং সমাসীনমৃদ্ধ্যা পরময়া যুতম্
259.15
জাতস্পর্ধাস্ততস্তে তু তপসে ধৃতনিশ্চয়াঃ
ব্রহ্মাণং তোষয়ামাসুর্ঘোরেণ তপসা তদা
259.16
অতিষ্ঠদেকপাদেন সহস্রং পরিবত্সরান্
বায়ুভক্ষো দশগ্রীবঃ পঞ্চাগ্নিঃ সুসমাহিতঃ
259.17
অধঃশায়ী কুম্ভকর্ণো যতাহারো যতব্রতঃ
বিভীষণঃ শীর্ণপর্ণমেকমভ্যবহারয়ৎ
259.18
উপবাসরতির্ধীমান্সদা জপ্যপরায়ণঃ
তমেব কালমাতিষ্ঠত্তীব্রং তপ উদারধীঃ
259.19
খরঃ শূর্পণখা চৈব তেষাং বৈ তপ্যতাং তপঃ
পরিচর্যাং চ রক্ষাং চ চক্রতুর্হৃষ্টমানসৌ
259.20
পূর্ণে বর্ষসহস্রে তু শিরশ্ছিত্ত্বা দশাননঃ
জুহোত্যগ্নৌ দুরাধর্ষস্তেনাতুষ্যজ্জগত্প্রভুঃ
259.21
ততো ব্রহ্মা স্বয়ং গত্বা তপসস্তান্ন্যবারয়ৎ
প্রলোভ্য বরদানেন সর্বানেব পৃথক্পৃথক্
259.22
ব্রহ্মোবাচ
প্রীতোঽস্মি বো নিবর্তধ্বং বরান্বৃণুত পুত্রকাঃ
যদ্যদিষ্টমৃতে ত্বেকমমরত্বং তথাস্তু তৎ
259.23
যদ্যদগ্নৌ হুতং সর্বং শিরস্তে মহদীপ্সয়া
তথৈব তানি তে দেহে ভবিষ্যন্তি যথেপ্সিতম্
259.24
বৈরূপ্যং চ ন তে দেহে কামরূপধরস্তথা
ভবিষ্যসি রণেঽরীণাং বিজেতাসি ন সংশয়ঃ
259.25
রাবণ উবাচ
গন্ধর্বদেবাসুরতো যক্ষরাক্ষসতস্তথা
সর্পকিংনরভূতেভ্যো ন মে ভূয়াত্পরাভবঃ
259.26
ব্রহ্মোবাচ
য এতে কীর্তিতাঃ সর্বে ন তেভ্যোঽস্তি ভয়ং তব
ঋতে মনুষ্যাদ্ভদ্রং তে তথা তদ্বিহিতং ময়া
259.27
মার্কণ্ডেয় উবাচ
এবমুক্তো দশগ্রীবস্তুষ্টঃ সমভবত্তদা
অবমেনে হি দুর্বুদ্ধির্মনুষ্যান্পুরুষাদকঃ
259.28
কুম্ভকর্ণমথোবাচ তথৈব প্রপিতামহঃ
স বব্রে মহতীং নিদ্রাং তমসা গ্রস্তচেতনঃ
259.29
তথা ভবিষ্যতীত্যুক্ত্বা বিভীষণমুবাচ হ
বরং বৃণীষ্ব পুত্র ত্বং প্রীতোঽস্মীতি পুনঃ পুনঃ
259.30
বিভীষণ উবাচ
পরমাপদ্গতস্যাপি নাধর্মে মে মতির্ভবেৎ
অশিক্ষিতং চ ভগবন্ব্রহ্মাস্ত্রং প্রতিভাতু মে
259.31
ব্রহ্মোবাচ
যস্মাদ্রাক্ষসয়োনৌ তে জাতস্যামিত্রকর্শন
নাধর্মে রমতে বুদ্ধিরমরত্বং দদামি তে
259.32
মার্কণ্ডেয় উবাচ
রাক্ষসস্তু বরং লব্ধ্বা দশগ্রীবো বিশাং পতে
লঙ্কায়াশ্চ্যাবয়ামাস যুধি জিত্বা ধনেশ্বরম্
259.33
হিত্বা স ভগবাঁল্লঙ্কামাবিশদ্গন্ধমাদনম্
গন্ধর্বয়ক্ষানুগতো রক্ষঃকিংপুরুষৈঃ সহ
259.34
বিমানং পুষ্পকং তস্য জহারাক্রম্য রাবণঃ
শশাপ তং বৈশ্রবণো ন ত্বামেতদ্বহিষ্যতি
259.35
যস্তু ত্বাং সমরে হন্তা তমেবৈতদ্বহিষ্যতি
অবমন্য গুরুং মাং চ ক্ষিপ্রং ত্বং ন ভবিষ্যসি
259.36
বিভীষণস্তু ধর্মাত্মা সতাং ধর্মমনুস্মরন্
অন্বগচ্ছন্মহারাজ শ্রিয়া পরময়া যুতঃ
259.37
তস্মৈ স ভগবাংস্তুষ্টো ভ্রাতা ভ্রাত্রে ধনেশ্বরঃ
সেনাপত্যং দদৌ ধীমান্যক্ষরাক্ষসসেনয়োঃ
259.38
রাক্ষসাঃ পুরুষাদাশ্চ পিশাচাশ্চ মহাবলাঃ
সর্বে সমেত্য রাজানমভ্যষিঞ্চদ্দশাননম্
259.39
দশগ্রীবস্তু দৈত্যানাং দেবানাং চ বলোত্কটঃ
আক্রম্য রত্নান্যহরত্কামরূপী বিহংগমঃ
259.40
রাবয়ামাস লোকান্যত্তস্মাদ্রাবণ উচ্যতে
দশগ্রীবঃ কামবলো দেবানাং ভয়মাদধৎ