অধ্যায় 258

258.1

মার্কণ্ডেয় উবাচ
প্রাপ্তমপ্রতিমং দুঃখং রামেণ ভরতর্ষভ
রক্ষসা জানকী তস্য হৃতা ভার্যা বলীয়সা

আশ্রমাদ্রাক্ষসেন্দ্রেণ রাবণেন বিহায়সা
মায়ামাস্থায় তরসা হত্বা গৃধ্রং জটায়ুষম্

প্রত্যাজহার তাং রামঃ সুগ্রীববলমাশ্রিতঃ
বদ্ধ্বা সেতুং সমুদ্রস্য দগ্ধ্বা লঙ্কাং শিতৈঃ শরৈঃ

যুধিষ্ঠির উবাচ
কস্মিন্রামঃ কুলে জাতঃ কিংবীর্যঃ কিংপরাক্রমঃ
রাবণঃ কস্য বা পুত্রঃ কিং বৈরং তস্য তেন হ

এতন্মে ভগবন্সর্বং সম্যগাখ্যাতুমর্হসি
শ্রোতুমিচ্ছামি চরিতং রামস্যাক্লিষ্টকর্মণঃ

মার্কণ্ডেয় উবাচ
অজো নামাভবদ্রাজা মহানিক্ষ্বাকুবংশজঃ
তস্য পুত্রো দশরথঃ শশ্বত্স্বাধ্যায়বাঞ্শুচিঃ

অভবংস্তস্য চত্বারঃ পুত্রা ধর্মার্থকোবিদাঃ
রামলক্ষ্মণশত্রুঘ্না ভরতশ্চ মহাবলঃ

রামস্য মাতা কৌসল্যা কৈকেয়ী ভরতস্য তু
সুতৌ লক্ষ্মণশত্রুঘ্নৌ সুমিত্রায়াঃ পরংতপৌ

বিদেহরাজো জনকঃ সীতা তস্যাত্মজা বিভো
যাং চকার স্বয়ং ত্বষ্টা রামস্য মহিষীং প্রিয়াম্

এতদ্রামস্য তে জন্ম সীতায়াশ্চ প্রকীর্তিতম্
রাবণস্যাপি তে জন্ম ব্যাখ্যাস্যামি জনেশ্বর

পিতামহো রাবণস্য সাক্ষাদ্দেবঃ প্রজাপতিঃ
স্বয়ংভূঃ সর্বলোকানাং প্রভুঃ স্রষ্টা মহাতপাঃ

পুলস্ত্যো নাম তস্যাসীন্মানসো দয়িতঃ সুতঃ
তস্য বৈশ্রবণো নাম গবি পুত্রোঽভবত্প্রভুঃ

পিতরং স সমুত্সৃজ্য পিতামহমুপস্থিতঃ
তস্য কোপাত্পিতা রাজন্সসর্জাত্মানমাত্মনা

স জজ্ঞে বিশ্রবা নাম তস্যাত্মার্ধেন বৈ দ্বিজঃ
প্রতীকারায় সক্রোধস্ততো বৈশ্রবণস্য বৈ

পিতামহস্তু প্রীতাত্মা দদৌ বৈশ্রবণস্য হ
অমরত্বং ধনেশত্বং লোকপালত্বমেব চ

ঈশানেন তথা সখ্যং পুত্রং চ নলকূবরম্
রাজধানীনিবেশং চ লঙ্কাং রক্ষোগণান্বিতাম্