অধ্যায় 257

257.1

জনমেজয় উবাচ
এবং হৃতায়াং কৃষ্ণায়াং প্রাপ্য ক্লেশমনুত্তমম্
অত ঊর্ধ্বং নরব্যাঘ্রাঃ কিমকুর্বত পাণ্ডবাঃ

বৈশংপায়ন উবাচ
এবং কৃষ্ণাং মোক্ষয়িত্বা বিনির্জিত্য জয়দ্রথম্
আসাং চক্রে মুনিগণৈর্ধর্মরাজো যুধিষ্ঠিরঃ

তেষাং মধ্যে মহর্ষীণাং শৃণ্বতামনুশোচতাম্
মার্কণ্ডেয়মিদং বাক্যমব্রবীত্পাণ্ডুনন্দনঃ

মন্যে কালশ্চ বলবান্দৈবং চ বিধিনির্মিতম্
ভবিতব্যং চ ভূতানাং যস্য নাস্তি ব্যতিক্রমঃ

কথং হি পত্নীমস্মাকং ধর্মজ্ঞাং ধর্মচারিণীম্
সংস্পৃশেদীদৃশো ভাবঃ শুচিং স্তৈন্যমিবানৃতম্

ন হি পাপং কৃতং কিংচিত্কর্ম বা নিন্দিতং ক্বচিৎ
দ্রৌপদ্যা ব্রাহ্মণেষ্বেব ধর্মঃ সুচরিতো মহান্

তাং জহার বলাদ্রাজা মূঢবুদ্ধির্জয়দ্রথঃ
তস্যাঃ সংহরণাত্প্রাপ্তঃ শিরসঃ কেশবাপনম্
পরাজয়ং চ সংগ্রামে সসহায়ঃ সমাপ্তবান্

প্রত্যাহৃতা তথাস্মাভির্হত্বা তত্সৈন্ধবং বলম্
তদ্দারহরণং প্রাপ্তমস্মাভিরবিতর্কিতম্

দুঃখশ্চায়ং বনে বাসো মৃগয়ায়াং চ জীবিকা
হিংসা চ মৃগজাতীনাং বনৌকোভির্বনৌকসাম্
জ্ঞাতিভির্বিপ্রবাসশ্চ মিথ্যা ব্যবসিতৈরয়ম্

অস্তি নূনং ময়া কশ্চিদল্পভাগ্যতরো নরঃ
ভবতা দৃষ্টপূর্বো বা শ্রুতপূর্বোঽপি বা ভবেৎ