Utshovঅধ্যায় 256
256.1
বৈশংপায়ন উবাচ
জয়দ্রথস্তু সংপ্রেক্ষ্য ভ্রাতরাবুদ্যতায়ুধৌ
প্রাদ্রবত্তূর্ণমব্যগ্রো জীবিতেপ্সুঃ সুদুঃখিতঃ
256.2
তং ভীমসেনো ধাবন্তমবতীর্য রথাদ্বলী
অভিদ্রুত্য নিজগ্রাহ কেশপক্ষেঽত্যমর্ষণঃ
256.3
সমুদ্যম্য চ তং রোষান্নিষ্পিপেষ মহীতলে
গলে গৃহীত্বা রাজানং তাডয়ামাস চৈব হ
256.4
পুনঃ সংজীবমানস্য তস্যোত্পতিতুমিচ্ছতঃ
পদা মূর্ধ্নি মহাবাহুঃ প্রাহরদ্বিলপিষ্যতঃ
256.5
তস্য জানুং দদৌ ভীমো জঘ্নে চৈনমরত্নিনা
স মোহমগমদ্রাজা প্রহারবরপীডিতঃ
256.6
বিরোষং ভীমসেনং তু বারয়ামাস ফল্গুনঃ
দুঃশলায়াঃ কৃতে রাজা যত্তদাহেতি কৌরব
256.7
ভীমসেন উবাচ
নায়ং পাপসমাচারো মত্তো জীবিতুমর্হতি
দ্রৌপদ্যাস্তদনর্হায়াঃ পরিক্লেষ্টা নরাধমঃ
256.8
কিং নু শক্যং ময়া কর্তুং যদ্রাজা সততং ঘৃণী
ত্বং চ বালিশয়া বুদ্ধ্যা সদৈবাস্মান্প্রবাধসে
256.9
এবমুক্ত্বা সটাস্তস্য পঞ্চ চক্রে বৃকোদরঃ
অর্ধচন্দ্রেণ বাণেন কিংচিদব্রুবতস্তদা
256.10
বিকল্পয়িত্বা রাজানং ততঃ প্রাহ বৃকোদরঃ
জীবিতুং চেচ্ছসে মূঢ হেতুং মে গদতঃ শৃণু
256.11
দাসোঽস্মীতি ত্বয়া বাচ্যং সংসত্সু চ সভাসু চ
এবং তে জীবিতং দদ্যামেষ যুদ্ধজিতো বিধিঃ
256.12
এবমস্ত্বিতি তং রাজা কৃচ্ছ্রপ্রাণো জয়দ্রথঃ
প্রোবাচ পুরুষব্যাঘ্রং ভীমমাহবশোভিনম্
256.13
তত এনং বিচেষ্টন্তং বদ্ধ্বা পার্থো বৃকোদরঃ
রথমারোপয়ামাস বিসংজ্ঞং পাংসুগুণ্ঠিতম্
256.14
ততস্তং রথমাস্থায় ভীমঃ পার্থানুগস্তদা
অভ্যেত্যাশ্রমমধ্যস্থমভ্যগচ্ছদ্যুধিষ্ঠিরম্
256.15
দর্শয়ামাস ভীমস্তু তদবস্থং জয়দ্রথম্
তং রাজা প্রাহসদ্দৃষ্ট্বা মুচ্যতামিতি চাব্রবীৎ
256.16
রাজানং চাব্রবীদ্ভীমো দ্রৌপদ্যৈ কথয়েতি বৈ
দাসভাবং গতো হ্যেষ পাণ্ডূনাং পাপচেতনঃ
256.17
তমুবাচ ততো জ্যেষ্ঠো ভ্রাতা সপ্রণয়ং বচঃ
মুঞ্চৈনমধমাচারং প্রমাণং যদি তে বয়ম্
256.18
দ্রৌপদী চাব্রবীদ্ভীমমভিপ্রেক্ষ্য যুধিষ্ঠিরম্
দাসোঽয়ং মুচ্যতাং রাজ্ঞস্ত্বয়া পঞ্চসটঃ কৃতঃ
256.19
স মুক্তোঽভ্যেত্য রাজানমভিবাদ্য যুধিষ্ঠিরম্
ববন্দে বিহ্বলো রাজা তাংশ্চ সর্বান্মুনীংস্তদা
256.20
তমুবাচ ঘৃণী রাজা ধর্মপুত্রো যুধিষ্ঠিরঃ
তথা জয়দ্রথং দৃষ্ট্বা গৃহীতং সব্যসাচিনা
256.21
অদাসো গচ্ছ মুক্তোঽসি মৈবং কার্ষীঃ পুনঃ ক্বচিৎ
স্ত্রীকামুক ধিগস্তু ত্বাং ক্ষুদ্রঃ ক্ষুদ্রসহায়বান্
এবংবিধং হি কঃ কুর্যাত্ত্বদন্যঃ পুরুষাধমঃ
256.22
গতসত্ত্বমিব জ্ঞাত্বা কর্তারমশুভস্য তম্
সংপ্রেক্ষ্য ভরতশ্রেষ্ঠঃ কৃপাং চক্রে নরাধিপঃ
256.23
ধর্মে তে বর্ধতাং বুদ্ধির্মা চাধর্মে মনঃ কৃথাঃ
সাশ্বঃ সরথপাদাতঃ স্বস্তি গচ্ছ জয়দ্রথ
256.24
এবমুক্তস্তু সব্রীডং তূষ্ণীং কিংচিদবাঙ্মুখঃ
জগাম রাজা দুঃখার্তো গঙ্গাদ্বারায় ভারত
256.25
স দেবং শরণং গত্বা বিরূপাক্ষমুমাপতিম্
তপশ্চচার বিপুলং তস্য প্রীতো বৃষধ্বজঃ
256.26
বলিং স্বয়ং প্রত্যগৃহ্ণাত্প্রীয়মাণস্ত্রিলোচনঃ
বরং চাস্মৈ দদৌ দেবঃ স চ জগ্রাহ তচ্ছৃণু
256.27
সমস্তান্সরথান্পঞ্চ জয়েয়ং যুধি পাণ্ডবান্
ইতি রাজাব্রবীদ্দেবং নেতি দেবস্তমব্রবীৎ
256.28
অজয্যাংশ্চাপ্যবধ্যাংশ্চ বারয়িষ্যসি তান্যুধি
ঋতেঽর্জুনং মহাবাহুং দেবৈরপি দুরাসদম্
256.29
যমাহুরজিতং দেবং শঙ্খচক্রগদাধরম্
প্রধানঃ সোঽস্ত্রবিদুষাং তেন কৃষ্ণেন রক্ষ্যতে
256.30
এবমুক্তস্তু নৃপতিঃ স্বমেব ভবনং যয়ৌ
পাণ্ডবাশ্চ বনে তস্মিন্ন্যবসন্কাম্যকে তদা