Utshovঅধ্যায় 255
255.1
বৈশংপায়ন উবাচ
সংতিষ্ঠত প্রহরত তূর্ণং বিপরিধাবত
ইতি স্ম সৈন্ধবো রাজা চোদয়ামাস তান্নৃপান্
255.2
ততো ঘোরতরঃ শব্দো রণে সমভবত্তদা
ভীমার্জুনয়মান্দৃষ্ট্বা সৈন্যানাং সয়ুধিষ্ঠিরান্
255.3
শিবিসিন্ধুত্রিগর্তানাং বিষাদশ্চাপ্যজায়ত
তান্দৃষ্ট্বা পুরুষব্যাঘ্রান্ব্যাঘ্রানিব বলোত্কটান্
255.4
হেমচিত্রসমুত্সেধাং সর্বশৈক্যায়সীং গদাম্
প্রগৃহ্যাভ্যদ্রবদ্ভীমঃ সৈন্ধবং কালচোদিতম্
255.5
তদন্তরমথাবৃত্য কোটিকাশ্যোঽভ্যহারয়ৎ
মহতা রথবংশেন পরিবার্য বৃকোদরম্
255.6
শক্তিতোমরনারাচৈর্বীরবাহুপ্রচোদিতৈঃ
কীর্যমাণোঽপি বহুভির্ন স্ম ভীমোঽভ্যকম্পত
255.7
গজং তু সগজারোহং পদাতীংশ্চ চতুর্দশ
জঘান গদয়া ভীমঃ সৈন্ধবধ্বজিনীমুখে
255.8
পার্থঃ পঞ্চশতাঞ্শূরান্পার্বতীয়ান্মহারথান্
পরীপ্সমানঃ সৌবীরং জঘান ধ্বজিনীমুখে
255.9
রাজা স্বয়ং সুবীরাণাং প্রবরাণাং প্রহারিণাম্
নিমেষমাত্রেণ শতং জঘান সমরে তদা
255.10
দদৃশে নকুলস্তত্র রথাত্প্রস্কন্দ্য খড্গধৃক্
শিরাংসি পাদরক্ষাণাং বীজবত্প্রবপন্মুহুঃ
255.11
সহদেবস্তু সংয়ায় রথেন গজয়োধিনঃ
পাতয়ামাস নারাচৈর্দ্রুমেভ্য ইব বর্হিণঃ
255.12
ততস্ত্রিগর্তঃ সধনুরবতীর্য মহারথাৎ
গদয়া চতুরো বাহান্রাজ্ঞস্তস্য তদাবধীৎ
255.13
তমভ্যাশগতং রাজা পদাতিং কুন্তিনন্দনঃ
অর্ধচন্দ্রেণ বাণেন বিব্যাধোরসি ধর্মরাট্
255.14
স ভিন্নহৃদয়ো বীরো বক্ত্রাচ্ছোণিতমুদ্বমন্
পপাতাভিমুখঃ পার্থং ছিন্নমূল ইব দ্রুমঃ
255.15
ইন্দ্রসেনদ্বিতীয়স্তু রথাত্প্রস্কন্দ্য ধর্মরাট্
হতাশ্বঃ সহদেবস্য প্রতিপেদে মহারথম্
255.16
নকুলং ত্বভিসংধায় ক্ষেমংকরমহামুখৌ
উভাবুভয়তস্তীক্ষ্ণৈঃ শরবর্ষৈরবর্ষতাম্
255.17
তৌ শরৈরভিবর্ষন্তৌ জীমূতাবিব বার্ষিকৌ
একৈকেন বিপাঠেন জঘ্নে মাদ্রবতীসুতঃ
255.18
ত্রিগর্তরাজঃ সুরথস্তস্যাথ রথধূর্গতঃ
রথমাক্ষেপয়ামাস গজেন গজয়ানবিৎ
255.19
নকুলস্ত্বপভীস্তস্মাদ্রথাচ্চর্মাসিপাণিমান্
উদ্ভ্রান্তং স্থানমাস্থায় তস্থৌ গিরিরিবাচলঃ
255.20
সুরথস্তং গজবরং বধায় নকুলস্য তু
প্রেষয়ামাস সক্রোধমভ্যুচ্ছ্রিতকরং ততঃ
255.21
নকুলস্তস্য নাগস্য সমীপপরিবর্তিনঃ
সবিষাণং ভুজং মূলে খড্গেন নিরকৃন্তত
255.22
স বিনদ্য মহানাদং গজঃ কঙ্কণভূষণঃ
পতন্নবাক্শিরা ভূমৌ হস্ত্যারোহানপোথয়ৎ
255.23
স তত্কর্ম মহত্কৃত্বা শূরো মাদ্রবতীসুতঃ
ভীমসেনরথং প্রাপ্য শর্ম লেভে মহারথঃ
255.24
ভীমস্ত্বাপততো রাজ্ঞঃ কোটিকাশ্যস্য সংগরে
সূতস্য নুদতো বাহান্ক্ষুরেণাপাহরচ্ছিরঃ
255.25
ন বুবোধ হতং সূতং স রাজা বাহুশালিনা
তস্যাশ্বা ব্যদ্রবন্সংখ্যে হতসূতাস্ততস্ততঃ
255.26
বিমুখং হতসূতং তং ভীমঃ প্রহরতাং বরঃ
জঘান তলয়ুক্তেন প্রাসেনাভ্যেত্য পাণ্ডবঃ
255.27
দ্বাদশানাং তু সর্বেষাং সৌবীরাণাং ধনংজয়ঃ
চকর্ত নিষিতৈর্ভল্লৈর্ধনূংষি চ শিরাংসি চ
255.28
শিবীনিক্ষ্বাকুমুখ্যাংশ্চ ত্রিগর্তান্সৈন্ধবানপি
জঘানাতিরথঃ সংখ্যে বাণগোচরমাগতান্
255.29
সাদিতাঃ প্রত্যদৃশ্যন্ত বহবঃ সব্যসাচিনা
সপতাকাশ্চ মাতঙ্গাঃ সধ্বজাশ্চ মহারথাঃ
255.30
প্রচ্ছাদ্য পৃথিবীং তস্থুঃ সর্বমায়োধনং প্রতি
শরীরাণ্যশিরস্কানি বিদেহানি শিরাংসি চ
255.31
শ্বগৃধ্রকঙ্ককাকোলভাসগোমায়ুবায়সাঃ
অতৃপ্যংস্তত্র বীরাণাং হতানাং মাংসশোণিতৈঃ
255.32
হতেষু তেষু বীরেষু সিন্ধুরাজো জয়দ্রথঃ
বিমুচ্য কৃষ্ণাং সংত্রস্তঃ পলায়নপরোঽভবৎ
255.33
স তস্মিন্সংকুলে সৈন্যে দ্রৌপদীমবতার্য বৈ
প্রাণপ্রেপ্সুরুপাধাবদ্বনং যেন নরাধমঃ
255.34
দ্রৌপদীং ধর্মরাজস্তু দৃষ্ট্বা ধৌম্যপুরস্কৃতাম্
মাদ্রীপুত্রেণ বীরেণ রথমারোপয়ত্তদা
255.35
ততস্তদ্বিদ্রুতং সৈন্যমপয়াতে জয়দ্রথে
আদিশ্যাদিশ্য নারাচৈরাজঘান বৃকোদরঃ
255.36
সব্যসাচী তু তং দৃষ্ট্বা পলায়ন্তং জয়দ্রথম্
বারয়ামাস নিঘ্নন্তং ভীমং সৈন্ধবসৈনিকান্
255.37
অর্জুন উবাচ
যস্যাপচারাত্প্রাপ্তোঽয়মস্মান্ক্লেশো দুরাসদঃ
তমস্মিন্সমরোদ্দেশে ন পশ্যামি জয়দ্রথম্
255.38
তমেবান্বিষ ভদ্রং তে কিং তে যোধৈর্নিপাতিতৈঃ
অনামিষমিদং কর্ম কথং বা মন্যতে ভবান্
255.39
বৈশংপায়ন উবাচ
ইত্যুক্তো ভীমসেনস্তু গুডাকেশেন ধীমতা
যুধিষ্ঠিরমভিপ্রেক্ষ্য বাগ্মী বচনমব্রবীৎ
255.40
হতপ্রবীরা রিপবো ভূয়িষ্ঠং বিদ্রুতা দিশঃ
গৃহীত্বা দ্রৌপদীং রাজন্নিবর্ততু ভবানিতঃ
255.41
যমাভ্যাং সহ রাজেন্দ্র ধৌম্যেন চ মহাত্মনা
প্রাপ্যাশ্রমপদং রাজন্দ্রৌপদীং পরিসান্ত্বয়
255.42
ন হি মে মোক্ষ্যতে জীবন্মূঢঃ সৈন্ধবকো নৃপঃ
পাতালতলসংস্থোঽপি যদি শক্রোঽস্য সারথিঃ
255.43
যুধিষ্ঠির উবাচ
ন হন্তব্যো মহাবাহো দুরাত্মাপি স সৈন্ধবঃ
দুঃশলামভিসংস্মৃত্য গান্ধারীং চ যশস্বিনীম্
255.44
বৈশংপায়ন উবাচ
তচ্ছ্রুত্বা দ্রৌপদী ভীমমুবাচ ব্যাকুলেন্দ্রিয়া
কুপিতা হ্রীমতী প্রাজ্ঞা পতী ভীমার্জুনাবুভৌ
255.45
কর্তব্যং চেত্প্রিয়ং মহ্যং বধ্যঃ স পুরুষাধমঃ
সৈন্ধবাপসদঃ পাপো দুর্মতিঃ কুলপাংসনঃ
255.46
ভার্যাভিহর্তা নির্বৈরো যশ্চ রাজ্যহরো রিপুঃ
যাচমানোঽপি সংগ্রামে ন স জীবিতুমর্হতি
255.47
ইত্যুক্তৌ তৌ নরব্যাঘ্রৌ যয়তুর্যত্র সৈন্ধবঃ
রাজা নিববৃতে কৃষ্ণামাদায় সপুরোহিতঃ
255.48
স প্রবিশ্যাশ্রমপদং ব্যপবিদ্ধবৃসীঘটম্
মার্কণ্ডেয়াদিভির্বিপ্রৈরনুকীর্ণং দদর্শ হ
255.49
দ্রৌপদীমনুশোচদ্ভির্ব্রাহ্মণৈস্তৈঃ সমাগতৈঃ
সমিয়ায় মহাপ্রাজ্ঞঃ সভার্যো ভ্রাতৃমধ্যগঃ
255.50
তে স্ম তং মুদিতা দৃষ্ট্বা পুনরভ্যাগতং নৃপম্
জিত্বা তান্সিন্ধুসৌবীরান্দ্রৌপদীং চাহৃতাং পুনঃ
255.51
স তৈঃ পরিবৃতো রাজা তত্রৈবোপবিবেশ হ
প্রবিবেশাশ্রমং কৃষ্ণা যমাভ্যাং সহ ভামিনী
255.52
ভীমার্জুনাবপি শ্রুত্বা ক্রোশমাত্রগতং রিপুম্
স্বয়মশ্বাংস্তুদন্তৌ তৌ জবেনৈবাভ্যধাবতাম্
255.53
ইদমত্যদ্ভুতং চাত্র চকার পুরুষোঽর্জুনঃ
ক্রোশমাত্রগতানশ্বান্সৈন্ধবস্য জঘান যৎ
255.54
স হি দিব্যাস্ত্রসংপন্নঃ কৃচ্ছ্রকালেঽপ্যসংভ্রমঃ
অকরোদ্দুষ্করং কর্ম শরৈরস্ত্রানুমন্ত্রিতৈঃ
255.55
ততোঽভ্যধাবতাং বীরাবুভৌ ভীমধনংজয়ৌ
হতাশ্বং সৈন্ধবং ভীতমেকং ব্যাকুলচেতসম্
255.56
সৈন্ধবস্তু হতান্দৃষ্ট্বা তথাশ্বান্স্বান্সুদুঃখিতঃ
দৃষ্ট্বা বিক্রমকর্মাণি কুর্বাণং চ ধনংজয়ম্
পলায়নকৃতোত্সাহঃ প্রাদ্রবদ্যেন বৈ বনম্
255.57
সৈন্ধবং ত্বভিসংপ্রেক্ষ্য পরাক্রান্তং পলায়নে
অনুয়ায় মহাবাহুঃ ফল্গুনো বাক্যমব্রবীৎ
255.58
অনেন বীর্যেণ কথং স্ত্রিয়ং প্রার্থয়সে বলাৎ
রাজপুত্র নিবর্তস্ব ন তে যুক্তং পলায়নম্
কথং চানুচরান্হিত্বা শত্রুমধ্যে পলায়সে
255.59
ইত্যুচ্যমানঃ পার্থেন সৈন্ধবো ন ন্যবর্তত
তিষ্ঠ তিষ্ঠেতি তং ভীমঃ সহসাভ্যদ্রবদ্বলী
মা বধীরিতি পার্থস্তং দয়াবানভ্যভাষত