Utshovঅধ্যায় 254
254.1
বৈশংপায়ন উবাচ
ততো ঘোরতরঃ শব্দো বনে সমভবত্তদা
ভীমসেনার্জুনৌ দৃষ্ট্বা ক্ষত্রিয়াণামমর্ষিণাম্
254.2
তেষাং ধ্বজাগ্রাণ্যভিবীক্ষ্য রাজা; স্বয়ং দুরাত্মা কুরুপুংগবানাম্
জয়দ্রথো যাজ্ঞসেনীমুবাচ; রথে স্থিতাং ভানুমতীং হতৌজাঃ
254.3
আয়ান্তীমে পঞ্চ রথা মহান্তো; মন্যে চ কৃষ্ণে পতয়স্তবৈতে
সা জানতী খ্যাপয় নঃ সুকেশি; পরং পরং পাণ্ডবানাং রথস্থম্
254.4
দ্রৌপদ্যুবাচ
কিং তে জ্ঞাতৈর্মূঢ মহাধনুর্ধরৈ;রনায়ুষ্যং কর্ম কৃত্বাতিঘোরম্
এতে বীরাঃ পতয়ো মে সমেতা; ন বঃ শেষঃ কশ্চিদিহাস্তি যুদ্ধে
254.5
আখ্যাতব্যং ত্বেব সর্বং মুমূর্ষো;র্ময়া তুভ্যং পৃষ্টয়া ধর্ম এষঃ
ন মে ব্যথা বিদ্যতে ত্বদ্ভয়ং বা; সংপশ্যন্ত্যাঃ সানুজং ধর্মরাজম্
254.6
যস্য ধ্বজাগ্রে নদতো মৃদঙ্গৌ; নন্দোপনন্দৌ মধুরৌ যুক্তরূপৌ
এতং স্বধর্মার্থবিনিশ্চয়জ্ঞং; সদা জনাঃ কৃত্যবন্তোঽনুয়ান্তি
254.7
য এষ জাম্বূনদশুদ্ধগৌরঃ; প্রচণ্ডঘোণস্তনুরায়তাক্ষঃ
এতং কুরুশ্রেষ্ঠতমং বদন্তি; যুধিষ্ঠিরং ধর্মসুতং পতিং মে
254.8
অপ্যেষ শত্রোঃ শরণাগতস্য; দদ্যাত্প্রাণান্ধর্মচারী নৃবীরঃ
পরৈহ্যেনং মূঢ জবেন ভূতয়ে; ত্বমাত্মনঃ প্রাঞ্জলির্ন্যস্তশস্ত্রঃ
254.9
অথাপ্যেনং পশ্যসি যং রথস্থং; মহাভুজং শালমিব প্রবৃদ্ধম্
সংদষ্টোষ্ঠং ভ্রুকুটীসংহতভ্রুবং; বৃকোদরো নাম পতির্মমৈষঃ
254.10
আজানেয়া বলিনঃ সাধু দান্তা; মহাবলাঃ শূরমুদাবহন্তি
এতস্য কর্মাণ্যতিমানুষাণি; ভীমেতি শব্দোঽস্য গতঃ পৃথিব্যাম্
254.11
নাস্যাপরাদ্ধাঃ শেষমিহাপ্নুবন্তি; নাপ্যস্য বৈরং বিস্মরতে কদাচিৎ
বৈরস্যান্তং সংবিধায়োপয়াতি; পশ্চাচ্ছান্তিং ন চ গচ্ছত্যতীব
254.12
মৃদুর্বদান্যো ধৃতিমান্যশস্বী; জিতেন্দ্রিয়ো বৃদ্ধসেবী নৃবীরঃ
ভ্রাতা চ শিষ্যশ্চ যুধিষ্ঠিরস্য; ধনংজয়ো নাম পতির্মমৈষঃ
254.13
যো বৈ ন কামান্ন ভয়ান্ন লোভা;ত্ত্যজেদ্ধর্মং ন নৃশংসং চ কুর্যাৎ
স এষ বৈশ্বানরতুল্যতেজাঃ; কুন্তীসুতঃ শত্রুসহঃ প্রমাথী
254.14
যঃ সর্বধর্মার্থবিনিশ্চয়জ্ঞো; ভয়ার্তানাং ভয়হর্তা মনীষী
যস্যোত্তমং রূপমাহুঃ পৃথিব্যাং; যং পাণ্ডবাঃ পরিরক্ষন্তি সর্বে
254.15
প্রাণৈর্গরীয়াংসমনুব্রতং বৈ; স এষ বীরো নকুলঃ পতির্মে
যঃ খড্গয়োধী লঘুচিত্রহস্তো; মহাংশ্চ ধীমান্সহদেবোঽদ্বিতীয়ঃ
254.16
যস্যাদ্য কর্ম দ্রক্ষ্যসে মূঢসত্ত্ব; শতক্রতোর্বা দৈত্যসেনাসু সংখ্যে
শূরঃ কৃতাস্ত্রো মতিমান্মনীষী; প্রিয়ংকরো ধর্মসুতস্য রাজ্ঞঃ
254.17
য এষ চন্দ্রার্কসমানতেজা; জঘন্যজঃ পাণ্ডবানাং প্রিয়শ্চ
বুদ্ধ্যা সমো যস্য নরো ন বিদ্যতে; বক্তা তথা সত্সু বিনিশ্চয়জ্ঞঃ
254.18
স এষ শূরো নিত্যমমর্ষণশ্চ; ধীমান্প্রাজ্ঞঃ সহদেবঃ পতির্মে
ত্যজেত্প্রাণান্প্রবিশেদ্ধব্যবাহং; ন ত্বেবৈষ ব্যাহরেদ্ধর্মবাহ্যম্
সদা মনস্বী ক্ষত্রধর্মে নিবিষ্টঃ; কুন্ত্যাঃ প্রাণৈরিষ্টতমো নৃবীরঃ
254.19
বিশীর্যন্তীং নাবমিবার্ণবান্তে; রত্নাভিপূর্ণাং মকরস্য পৃষ্ঠে
সেনাং তবেমাং হতসর্বয়োধাং; বিক্ষোভিতাং দ্রক্ষ্যসি পাণ্ডুপুত্রৈঃ
254.20
ইত্যেতে বৈ কথিতাঃ পাণ্ডুপুত্রা; যাংস্ত্বং মোহাদবমন্য প্রবৃত্তঃ
যদ্যেতৈস্ত্বং মুচ্যসেঽরিষ্টদেহঃ; পুনর্জন্ম প্রাপ্স্যসে জীব এব
254.21
বৈশংপায়ন উবাচ
ততঃ পার্থাঃ পঞ্চ পঞ্চেন্দ্রকল্পা;স্ত্যক্ত্বা ত্রস্তান্প্রাঞ্জলীংস্তান্পদাতীন্
রথানীকং শরবর্ষান্ধকারং; চক্রুঃ ক্রুদ্ধাঃ সর্বতঃ সংনিগৃহ্য