Utshovঅধ্যায় 253
253.1
বৈশংপায়ন উবাচ
ততো দিশঃ সংপ্রবিহৃত্য পার্থা; মৃগান্বরাহান্মহিষাংশ্চ হত্বা
ধনুর্ধরাঃ শ্রেষ্ঠতমাঃ পৃথিব্যাং; পৃথক্চরন্তঃ সহিতা বভূবুঃ
253.2
ততো মৃগব্যালগণানুকীর্ণং; মহাবনং তদ্বিহগোপঘুষ্টম্
ভ্রাতৄংশ্চ তানভ্যবদদ্যুধিষ্ঠিরঃ; শ্রুত্বা গিরো ব্যাহরতাং মৃগাণাম্
253.3
আদিত্যদীপ্তাং দিশমভ্যুপেত্য; মৃগদ্বিজাঃ ক্রূরমিমে বদন্তি
আয়াসমুগ্রং প্রতিবেদয়ন্তো; মহাহবং শত্রুভির্বাবমানম্
253.4
ক্ষিপ্রং নিবর্তধ্বমলং মৃগৈর্নো; মনো হি মে দূয়তি দহ্যতে চ
বুদ্ধিং সমাচ্ছাদ্য চ মে সমন্যু;রুদ্ধূয়তে প্রাণপতিঃ শরীরে
253.5
সরঃ সুপর্ণেন হৃতোরগং যথা; রাষ্ট্রং যথারাজকমাত্তলক্ষ্মি
এবংবিধং মে প্রতিভাতি কাম্যকং; শৌণ্ডৈর্যথা পীতরসশ্চ কুম্ভঃ
253.6
তে সৈন্ধবৈরত্যনিলৌঘবেগৈ;র্মহাজবৈর্বাজিভিরুহ্যমানাঃ
যুক্তৈর্বৃহদ্ভিঃ সুরথৈর্নৃবীরা;স্তদাশ্রমায়াভিমুখা বভূবুঃ
253.7
তেষাং তু গোমায়ুরনল্পঘোষো; নিবর্ততাং বামমুপেত্য পার্শ্বম্
প্রব্যাহরত্তং প্রবিমৃশ্য রাজা; প্রোবাচ ভীমং চ ধনংজয়ং চ
253.8
যথা বদত্যেষ বিহীনয়োনিঃ; শালাবৃকো বামমুপেত্য পার্শ্বম্
সুব্যক্তমস্মানবমন্য পাপৈঃ; কৃতোঽভিমর্দঃ কুরুভিঃ প্রসহ্য
253.9
ইত্যেব তে তদ্বনমাবিশন্তো; মহত্যরণ্যে মৃগয়াং চরিত্বা
বালামপশ্যন্ত তদা রুদন্তীং; ধাত্রেয়িকাং প্রেষ্যবধূং প্রিয়ায়াঃ
253.10
তামিন্দ্রসেনস্ত্বরিতোঽভিসৃত্য; রথাদবপ্লুত্য ততোঽভ্যধাবৎ
প্রোবাচ চৈনাং বচনং নরেন্দ্র; ধাত্রেয়িকামার্ততরস্তদানীম্
253.11
কিং রোদিষি ত্বং পতিতা ধরণ্যাং; কিং তে মুখং শুষ্যতি দীনবর্ণম্
কচ্চিন্ন পাপৈঃ সুনৃশংসকৃদ্ভিঃ; প্রমাথিতা দ্রৌপদী রাজপুত্রী
অনিন্দ্যরূপা সুবিশালনেত্রা; শরীরতুল্যা কুরুপুংগবানাম্
253.12
যদ্যেব দেবী পৃথিবীং প্রবিষ্টা; দিবং প্রপন্নাপ্যথ বা সমুদ্রম্
তস্যা গমিষ্যন্তি পদং হি পার্থা;স্তথা হি সংতপ্যতি ধর্মরাজঃ
253.13
কো হীদৃশানামরিমর্দনানাং; ক্লেশক্ষমাণামপরাজিতানাম্
প্রাণৈঃ সমামিষ্টতমাং জিহীর্ষে;দনুত্তমং রত্নমিব প্রমূঢঃ
ন বুধ্যতে নাথবতীমিহাদ্য; বহিশ্চরং হৃদয়ং পাণ্ডবানাম্
253.14
কস্যাদ্য কায়ং প্রতিভিদ্য ঘোরা; মহীং প্রবেক্ষ্যন্তি শিতাঃ শরাগ্র্যাঃ
মা ত্বং শুচস্তাং প্রতি ভীরু বিদ্ধি; যথাদ্য কৃষ্ণা পুনরেষ্যতীতি
নিহত্য সর্বান্দ্বিষতঃ সমগ্রা;ন্পার্থাঃ সমেষ্যন্ত্যথ যাজ্ঞসেন্যা
253.15
অথাব্রবীচ্চারুমুখং প্রমৃজ্য; ধাত্রেয়িকা সারথিমিন্দ্রসেনম্
জয়দ্রথেনাপহৃতা প্রমথ্য; পঞ্চেন্দ্রকল্পান্পরিভূয় কৃষ্ণা
253.16
তিষ্ঠন্তি বর্ত্মানি নবান্যমূনি; বৃক্ষাশ্চ ন ম্লান্তি তথৈব ভগ্নাঃ
আবর্তয়ধ্বং হ্যনুয়াত শীঘ্রং; ন দূরয়াতৈব হি রাজপুত্রী
253.17
সংনহ্যধ্বং সর্ব এবেন্দ্রকল্পা; মহান্তি চারূণি চ দংশনানি
গৃহ্ণীত চাপানি মহাধনানি; শরাংশ্চ শীঘ্রং পদবীং ব্রজধ্বম্
253.18
পুরা হি নির্ভর্ত্সনদণ্ডমোহিতা; প্রমূঢচিত্তা বদনেন শুষ্যতা
দদাতি কস্মৈচিদনর্হতে তনুং; বরাজ্যপূর্ণামিব ভস্মনি স্রুচম্
253.19
পুরা তুষাগ্নাবিব হূয়তে হবিঃ; পুরা শ্মশানে স্রগিবাপবিধ্যতে
পুরা চ সোমোঽধ্বরগোঽবলিহ্যতে; শুনা যথা বিপ্রজনে প্রমোহিতে
মহত্যরণ্যে মৃগয়াং চরিত্বা; পুরা শৃগালো নলিনীং বিগাহতে
253.20
মা বঃ প্রিয়ায়াঃ সুনসং সুলোচনং; চন্দ্রপ্রভাচ্ছং বদনং প্রসন্নম্
স্পৃশ্যাচ্ছুভং কশ্চিদকৃত্যকারী; শ্বা বৈ পুরোডাশমিবোপয়ুঙ্ক্ষীৎ
এতানি বর্ত্মান্যনুয়াত শীঘ্রং; মা বঃ কালঃ ক্ষিপ্রমিহাত্যগাদ্বৈ
253.21
যুধিষ্ঠির উবাচ
ভদ্রে তূষ্ণীমাস্স্ব নিয়চ্ছ বাচং; মাস্মত্সকাশে পরুষাণ্যবোচঃ
রাজানো বা যদি বা রাজপুত্রা; বলেন মত্তা বঞ্চনাং প্রাপ্নুবন্তি
253.22
বৈশংপায়ন উবাচ
এতাবদুক্ত্বা প্রয়য়ুর্হি শীঘ্রং; তান্যেব বর্ত্মান্যনুবর্তমানাঃ
মুহুর্মুহুর্ব্যালবদুচ্ছ্বসন্তো; জ্যাং বিক্ষিপন্তশ্চ মহাধনুর্ভ্যঃ
253.23
ততোঽপশ্যংস্তস্য সৈন্যস্য রেণু;মুদ্ধূতং বৈ বাজিখুরপ্রণুন্নম্
পদাতীনাং মধ্যগতং চ ধৌম্যং; বিক্রোশন্তং ভীমমভিদ্রবেতি
253.24
তে সান্ত্ব্য ধৌম্যং পরিদীনসত্ত্বাঃ; সুখং ভবানেত্বিতি রাজপুত্রাঃ
শ্যেনা যথৈবামিষসংপ্রয়ুক্তা; জবেন তত্সৈন্যমথাভ্যধাবন্
253.25
তেষাং মহেন্দ্রোপমবিক্রমাণাং; সংরব্ধানাং ধর্ষণাদ্যাজ্ঞসেন্যাঃ
ক্রোধঃ প্রজজ্বাল জয়দ্রথং চ; দৃষ্ট্বা প্রিয়াং তস্য রথে স্থিতাং চ
253.26
প্রচুক্রুশুশ্চাপ্যথ সিন্ধুরাজং; বৃকোদরশ্চৈব ধনংজয়শ্চ
যমৌ চ রাজা চ মহাধনুর্ধরা;স্ততো দিশঃ সংমুমুহুঃ পরেষাম্