Utshovঅধ্যায় 252
252.1
বৈশংপায়ন উবাচ
সরোষরাগোপহতেন বল্গুনা; সরাগনেত্রেণ নতোন্নতভ্রুবা
মুখেন বিস্ফূর্য সুবীররাষ্ট্রপং; ততোঽব্রবীত্তং দ্রুপদাত্মজা পুনঃ
252.2
যশস্বিনস্তীক্ষ্ণবিষান্মহারথা;নধিক্ষিপন্মূঢ ন লজ্জসে কথম্
মহেন্দ্রকল্পান্নিরতান্স্বকর্মসু; স্থিতান্সমূহেষ্বপি যক্ষরক্ষসাম্
252.3
ন কিংচিদীড্যং প্রবদন্তি পাপং; বনেচরং বা গৃহমেধিনং বা
তপস্বিনং সংপরিপূর্ণবিদ্যং; ভষন্তি হৈবং শ্বনরাঃ সুবীর
252.4
অহং তু মন্যে তব নাস্তি কশ্চি;দেতাদৃশে ক্ষত্রিয়সংনিবেশে
যস্ত্বাদ্য পাতালমুখে পতন্তং; পাণৌ গৃহীত্বা প্রতিসংহরেত
252.5
নাগং প্রভিন্নং গিরিকূটকল্প;মুপত্যকাং হৈমবতীং চরন্তম্
দণ্ডীব যূথাদপসেধসে ত্বং; যো জেতুমাশংসসি ধর্মরাজম্
252.6
বাল্যাত্প্রসুপ্তস্য মহাবলস্য; সিংহস্য পক্ষ্মাণি মুখাল্লুনাসি
পদা সমাহত্য পলায়মানঃ; ক্রুদ্ধং যদা দ্রক্ষ্যসি ভীমসেনম্
252.7
মহাবলং ঘোরতরং প্রবৃদ্ধং; জাতং হরিং পর্বতকন্দরেষু
প্রসুপ্তমুগ্রং প্রপদেন হংসি; যঃ ক্রুদ্ধমাসেত্স্যসি জিষ্ণুমুগ্রম্
252.8
কৃষ্ণোরগৌ তীক্ষ্ণবিষৌ দ্বিজিহ্বৌ; মত্তঃ পদাক্রামসি পুচ্ছদেশে
যঃ পাণ্ডবাভ্যাং পুরুষোত্তমাভ্যাং; জঘন্যজাভ্যাং প্রয়ুয়ুত্সসে ত্বম্
252.9
যথা চ বেণুঃ কদলী নলো বা; ফলন্ত্যভাবায় ন ভূতয়েঽঽত্মনঃ
তথৈব মাং তৈঃ পরিরক্ষ্যমাণা;মাদাস্যসে কর্কটকীব গর্ভম্
252.10
জয়দ্রথ উবাচ
জানামি কৃষ্ণে বিদিতং মমৈত;দ্যথাবিধাস্তে নরদেবপুত্রাঃ
ন ত্বেবমেতেন বিভীষণেন; শক্যা বয়ং ত্রাসয়িতুং ত্বয়াদ্য
252.11
বয়ং পুনঃ সপ্তদশেষু কৃষ্ণে; কুলেষু সর্বেঽনবমেষু জাতাঃ
ষড্ভ্যো গুণেভ্যোঽভ্যধিকা বিহীনা;ন্মন্যামহে দ্রৌপদি পাণ্ডুপুত্রান্
252.12
সা ক্ষিপ্রমাতিষ্ঠ গজং রথং বা; ন বাক্যমাত্রেণ বয়ং হি শক্যাঃ
আশংস বা ত্বং কৃপণং বদন্তী; সৌবীররাজস্য পুনঃ প্রসাদম্
252.13
দ্রৌপদ্যুবাচ
মহাবলা কিং ত্বিহ দুর্বলেব; সৌবীররাজস্য মতাহমস্মি
যাহং প্রমাথাদিহ সংপ্রতীতা; সৌবীররাজং কৃপণং বদেয়ম্
252.14
যস্যা হি কৃষ্ণৌ পদবীং চরেতাং; সমাস্থিতাবেকরথে সহায়ৌ
ইন্দ্রোঽপি তাং নাপহরেত্কথংচি;ন্মনুষ্যমাত্রঃ কৃপণঃ কুতোঽন্যঃ
252.15
যদা কিরীটী পরবীরঘাতী; নিঘ্নন্রথস্থো দ্বিষতাং মনাংসি
মদন্তরে ত্বদ্ধ্বজিনীং প্রবেষ্টা; কক্ষং দহন্নগ্নিরিবোষ্ণগেষু
252.16
জনার্দনস্যানুগা বৃষ্ণিবীরা; মহেষ্বাসাঃ কেকয়াশ্চাপি সর্বে
এতে হি সর্বে মম রাজপুত্রাঃ; প্রহৃষ্টরূপাঃ পদবীং চরেয়ুঃ
252.17
মৌর্বীবিসৃষ্টাঃ স্তনয়িত্নুঘোষা; গাণ্ডীবমুক্তাস্ত্বতিবেগবন্তঃ
হস্তং সমাহত্য ধনংজয়স্য; ভীমাঃ শব্দং ঘোরতরং নদন্তি
252.18
গাণ্ডীবমুক্তাংশ্চ মহাশরৌঘা;ন্পতংগসংঘানিব শীঘ্রবেগান্
সশঙ্খঘোষঃ সতলত্রঘোষো; গাণ্ডীবধন্বা মুহুরুদ্বমংশ্চ
যদা শরানর্পয়িতা তবোরসি; তদা মনস্তে কিমিবাভবিষ্যৎ
252.19
গদাহস্তং ভীমমভিদ্রবন্তং; মাদ্রীপুত্রৌ সংপতন্তৌ দিশশ্চ
অমর্ষজং ক্রোধবিষং বমন্তৌ; দৃষ্ট্বা চিরং তাপমুপৈষ্যসেঽধম
252.20
যথা চাহং নাতিচরে কথংচি;ত্পতীন্মহার্হান্মনসাপি জাতু
তেনাদ্য সত্যেন বশীকৃতং ত্বাং; দ্রষ্টাস্মি পার্থৈঃ পরিকৃষ্যমাণম্
252.21
ন সংভ্রমং গন্তুমহং হি শক্ষ্যে; ত্বয়া নৃশংসেন বিকৃষ্যমাণা
সমাগতাহং হি কুরুপ্রবীরৈঃ; পুনর্বনং কাম্যকমাগতা চ
252.22
বৈশংপায়ন উবাচ
সা তাননুপ্রেক্ষ্য বিশালনেত্রা; জিঘৃক্ষমাণানবভর্ত্সয়ন্তী
প্রোবাচ মা মা স্পৃশতেতি ভীতা; ধৌম্যং প্রচুক্রোশ পুরোহিতং সা
252.23
জগ্রাহ তামুত্তরবস্ত্রদেশে; জয়দ্রথস্তং সমবাক্ষিপত্সা
তয়া সমাক্ষিপ্ততনুঃ স পাপঃ; পপাত শাখীব নিকৃত্তমূলঃ
252.24
প্রগৃহ্যমাণা তু মহাজবেন; মুহুর্বিনিঃশ্বস্য চ রাজপুত্রী
সা কৃষ্যমাণা রথমারুরোহ; ধৌম্যস্য পাদাবভিবাদ্য কৃষ্ণা
252.25
ধৌম্য উবাচ
নেয়ং শক্যা ত্বয়া নেতুমবিজিত্য মহারথান্
ধর্মং ক্ষত্রস্য পৌরাণমবেক্ষস্ব জয়দ্রথ
252.26
ক্ষুদ্রং কৃত্বা ফলং পাপং প্রাপ্স্যসি ত্বমসংশয়ম্
আসাদ্য পাণ্ডবান্বীরান্ধর্মরাজপুরোগমান্
252.27
বৈশংপায়ন উবাচ
ইত্যুক্ত্বা হ্রিয়মাণাং তাং রাজপুত্রীং যশস্বিনীম্
অন্বগচ্ছত্তদা ধৌম্যঃ পদাতিগণমধ্যগঃ