অধ্যায় 251

251.1

বৈশংপায়ন উবাচ
অথাসীনেষু সর্বেষু তেষু রাজসু ভারত
কোটিকাশ্যবচঃ শ্রুত্বা শৈব্যং সৌবীরকোঽব্রবীৎ

যদা বাচং ব্যাহরন্ত্যামস্যাং মে রমতে মনঃ
সীমন্তিনীনাং মুখ্যায়াং বিনিবৃত্তঃ কথং ভবান্

এতাং দৃষ্ট্বা স্ত্রিয়ো মেঽন্যা যথা শাখামৃগস্ত্রিয়ঃ
প্রতিভান্তি মহাবাহো সত্যমেতদ্ব্রবীমি তে

দর্শনাদেব হি মনস্তয়া মেঽপহৃতং ভৃশম্
তাং সমাচক্ষ্ব কল্যাণীং যদি স্যাচ্ছৈব্য মানুষী

কোটিকাশ্য উবাচ
এষা বৈ দ্রৌপদী কৃষ্ণা রাজপুত্রী যশস্বিনী
পঞ্চানাং পাণ্ডুপুত্রাণাং মহিষী সংমতা ভৃশম্

সর্বেষাং চৈব পার্থানাং প্রিয়া বহুমতা সতী
তয়া সমেত্য সৌবীর সুবীরান্সুসুখী ব্রজ

বৈশংপায়ন উবাচ
এবমুক্তঃ প্রত্যুবাচ পশ্যামো দ্রৌপদীমিতি
পতিঃ সৌবীরসিন্ধূনাং দুষ্টভাবো জয়দ্রথঃ

স প্রবিশ্যাশ্রমং শূন্যং সিংহগোষ্ঠং বৃকো যথা
আত্মনা সপ্তমঃ কৃষ্ণামিদং বচনমব্রবীৎ

কুশলং তে বরারোহে ভর্তারস্তেঽপ্যনাময়াঃ
যেষাং কুশলকামাসি তেঽপি কচ্চিদনাময়াঃ

দ্রৌপদ্যুবাচ
কৌরব্যঃ কুশলী রাজা কুন্তীপুত্রো যুধিষ্ঠিরঃ
অহং চ ভ্রাতরশ্চাস্য যাংশ্চান্যান্পরিপৃচ্ছসি

পাদ্যং প্রতিগৃহাণেদমাসনং চ নৃপাত্মজ
মৃগান্পঞ্চাশতং চৈব প্রাতরাশং দদানি তে

ঐণেয়ান্পৃষতান্ন্যঙ্কূন্হরিণাঞ্শরভাঞ্শশান্
ঋশ্যান্রুরূঞ্শম্বরাংশ্চ গবয়াংশ্চ মৃগান্বহূন্

বরাহান্মহিষাংশ্চৈব যাশ্চান্যা মৃগজাতয়ঃ
প্রদাস্যতি স্বয়ং তুভ্যং কুন্তীপুত্রো যুধিষ্ঠিরঃ

জয়দ্রথ উবাচ
কুশলং প্রাতরাশস্য সর্বা মেঽপচিতিঃ কৃতা
এহি মে রথমারোহ সুখমাপ্নুহি কেবলম্

গতশ্রীকাংশ্চ্যুতান্রাজ্যাত্কৃপণান্গতচেতসঃ
অরণ্যবাসিনঃ পার্থান্নানুরোদ্ধুং ত্বমর্হসি

ন বৈ প্রাজ্ঞা গতশ্রীকং ভর্তারমুপয়ুঞ্জতে
যুঞ্জানমনুয়ুঞ্জীত ন শ্রিয়ঃ সংক্ষয়ে বসেৎ

শ্রিয়া বিহীনা রাজ্যাচ্চ বিনষ্টাঃ শাশ্বতীঃ সমাঃ
অলং তে পাণ্ডুপুত্রাণাং ভক্ত্যা ক্লেশমুপাসিতুম্

ভার্যা মে ভব সুশ্রোণি ত্যজৈনান্সুখমাপ্নুহি
অখিলান্সিন্ধুসৌবীরানবাপ্নুহি ময়া সহ

বৈশংপায়ন উবাচ
ইত্যুক্তা সিন্ধুরাজেন বাক্যং হৃদয়কম্পনম্
কৃষ্ণা তস্মাদপাক্রামদ্দেশাত্সভ্রুকুটীমুখী

অবমত্যাস্য তদ্বাক্যমাক্ষিপ্য চ সুমধ্যমা
মৈবমিত্যব্রবীত্কৃষ্ণা লজ্জস্বেতি চ সৈন্ধবম্

সা কাঙ্ক্ষমাণা ভর্তৄণামুপয়ানমনিন্দিতা
বিলোভয়ামাস পরং বাক্যৈর্বাক্যানি যুঞ্জতী