অধ্যায় 250

250.1

বৈশংপায়ন উবাচ
অথাব্রবীদ্দ্রৌপদী রাজপুত্রী; পৃষ্টা শিবীনাং প্রবরেণ তেন
অবেক্ষ্য মন্দং প্রবিমুচ্য শাখাং; সংগৃহ্ণতী কৌশিকমুত্তরীয়ম্

বুদ্ধ্যাভিজানামি নরেন্দ্রপুত্র; ন মাদৃশী ত্বামভিভাষ্টুমর্হা
ন ত্বেহ বক্তাস্তি তবেহ বাক্য;মন্যো নরো বাপ্যথ বাপি নারী

একা হ্যহং সংপ্রতি তেন বাচং; দদানি বৈ ভদ্র নিবোধ চেদম্
অহং হ্যরণ্যে কথমেকমেকা; ত্বামালপেয়ং নিরতা স্বধর্মে

জানামি চ ত্বাং সুরথস্য পুত্রং; যং কোটিকাশ্যেতি বিদুর্মনুষ্যাঃ
তস্মাদহং শৈব্য তথৈব তুভ্য;মাখ্যামি বন্ধূন্প্রতি তন্নিবোধ

অপত্যমস্মি দ্রুপদস্য রাজ্ঞঃ; কৃষ্ণেতি মাং শৈব্য বিদুর্মনুষ্যাঃ
সাহং বৃণে পঞ্চ জনান্পতিত্বে; যে খাণ্ডবপ্রস্থগতাঃ শ্রুতাস্তে

যুধিষ্ঠিরো ভীমসেনার্জুনৌ চ; মাদ্র্যাশ্চ পুত্রৌ পুরুষপ্রবীরৌ
তে মাং নিবেশ্যেহ দিশশ্চতস্রো; বিভজ্য পার্থা মৃগয়াং প্রয়াতাঃ

প্রাচীং রাজা দক্ষিণাং ভীমসেনো; জয়ঃ প্রতীচীং যমজাবুদীচীম্
মন্যে তু তেষাং রথসত্তমানাং; কালোঽভিতঃ প্রাপ্ত ইহোপয়াতুম্

সংমানিতা যাস্যথ তৈর্যথেষ্টং; বিমুচ্য বাহানবগাহয়ধ্বম্
প্রিয়াতিথির্ধর্মসুতো মহাত্মা; প্রীতো ভবিষ্যত্যভিবীক্ষ্য যুষ্মান্

এতাবদুক্ত্বা দ্রুপদাত্মজা সা; শৈব্যাত্মজং চন্দ্রমুখী প্রতীতা
বিবেশ তাং পর্ণকুটীং প্রশস্তাং; সংচিন্ত্য তেষামতিথিস্বধর্মম্