Utshovঅধ্যায় 249
249.1
কোটিকাশ্য উবাচ
কা ত্বং কদম্বস্য বিনম্য শাখা;মেকাশ্রমে তিষ্ঠসি শোভমানা
দেদীপ্যমানাগ্নিশিখেব নক্তং; দোধূয়মানা পবনেন সুভ্রূঃ
249.2
অতীব রূপেণ সমন্বিতা ত্বং; ন চাপ্যরণ্যেষু বিভেষি কিং নু
দেবী নু যক্ষী যদি দানবী বা; বরাপ্সরা দৈত্যবরাঙ্গনা বা
249.3
বপুষ্মতী বোরগরাজকন্যা; বনেচরী বা ক্ষণদাচরস্ত্রী
যদ্যেব রাজ্ঞো বরুণস্য পত্নী; যমস্য সোমস্য ধনেশ্বরস্য
249.4
ধাতুর্বিধাতুঃ সবিতুর্বিভোর্বা; শক্রস্য বা ত্বং সদনাত্প্রপন্না
ন হ্যেব নঃ পৃচ্ছসি যে বয়ং স্ম; ন চাপি জানীম তবেহ নাথম্
249.5
বয়ং হি মানং তব বর্ধয়ন্তঃ; পৃচ্ছাম ভদ্রে প্রভবং প্রভুং চ
আচক্ষ্ব বন্ধূংশ্চ পতিং কুলং চ; তত্ত্বেন যচ্চেহ করোষি কার্যম্
249.6
অহং তু রাজ্ঞঃ সুরথস্য পুত্রো; যং কোটিকাশ্যেতি বিদুর্মনুষ্যাঃ
অসৌ তু যস্তিষ্ঠতি কাঞ্চনাঙ্গে; রথে হুতোঽগ্নিশ্চয়নে যথৈব
ত্রিগর্তরাজঃ কমলায়তাক্ষি; ক্ষেমংকরো নাম স এষ বীরঃ
249.7
অস্মাত্পরস্ত্বেষ মহাধনুষ্মা;ন্পুত্রঃ কুণিন্দাধিপতের্বরিষ্ঠঃ
নিরীক্ষতে ত্বাং বিপুলায়তাংসঃ; সুবিস্মিতঃ পর্বতবাসনিত্যঃ
249.8
অসৌ তু যঃ পুষ্করিণীসমীপে; শ্যামো যুবা তিষ্ঠতি দর্শনীয়ঃ
ইক্ষ্বাকুরাজ্ঞঃ সুবলস্য পুত্রঃ; স এষ হন্তা দ্বিষতাং সুগাত্রি
249.9
যস্যানুয়াত্রং ধ্বজিনঃ প্রয়ান্তি; সৌবীরকা দ্বাদশ রাজপুত্রাঃ
শোণাশ্বয়ুক্তেষু রথেষু সর্বে; মখেষু দীপ্তা ইব হব্যবাহাঃ
249.10
অঙ্গারকঃ কুঞ্জরগুপ্তকশ্চ; শত্রুংজয়ঃ সংজয়সুপ্রবৃদ্ধৌ
প্রভংকরোঽথ ভ্রমরো রবিশ্চ; শূরঃ প্রতাপঃ কুহরশ্চ নাম
249.11
যং ষট্সহস্রা রথিনোঽনুয়ান্তি; নাগা হয়াশ্চৈব পদাতিনশ্চ
জয়দ্রথো নাম যদি শ্রুতস্তে; সৌবীররাজঃ সুভগে স এষঃ
249.12
তস্যাপরে ভ্রাতরোঽদীনসত্ত্বা; বলাহকানীকবিদারণাধ্যাঃ
সৌবীরবীরাঃ প্রবরা যুবানো; রাজানমেতে বলিনোঽনুয়ান্তি
249.13
এতৈঃ সহায়ৈরুপয়াতি রাজা; মরুদ্গণৈরিন্দ্র ইবাভিগুপ্তঃ
অজানতাং খ্যাপয় নঃ সুকেশি; কস্যাসি ভার্যা দুহিতা চ কস্য