অধ্যায় 248

248.1

বৈশংপায়ন উবাচ
তস্মিন্বহুমৃগেঽরণ্যে রমমাণা মহারথাঃ
কাম্যকে ভরতশ্রেষ্ঠা বিজহ্রুস্তে যথামরাঃ

প্রেক্ষমাণা বহুবিধান্বনোদ্দেশান্সমন্ততঃ
যথর্তুকালরম্যাশ্চ বনরাজীঃ সুপুষ্পিতাঃ

পাণ্ডবা মৃগয়াশীলাশ্চরন্তস্তন্মহাবনম্
বিজহ্রুরিন্দ্রপ্রতিমাঃ কংচিত্কালমরিংদমাঃ

ততস্তে যৌগপদ্যেন যয়ুঃ সর্বে চতুর্দিশম্
মৃগয়াং পুরুষব্যাঘ্রা ব্রাহ্মণার্থে পরংতপাঃ

দ্রৌপদীমাশ্রমে ন্যস্য তৃণবিন্দোরনুজ্ঞয়া
মহর্ষের্দীপ্ততপসো ধৌম্যস্য চ পুরোধসঃ

ততস্তু রাজা সিন্ধূনাং বার্দ্ধক্ষত্রির্মহায়শাঃ
বিবাহকামঃ শাল্বেয়ান্প্রয়াতঃ সোঽভবত্তদা

মহতা পরিবর্হেণ রাজয়োগ্যেন সংবৃতঃ
রাজভির্বহুভিঃ সার্ধমুপায়াত্কাম্যকং চ সঃ

তত্রাপশ্যত্প্রিয়াং ভার্যাং পাণ্ডবানাং যশস্বিনীম্
তিষ্ঠন্তীমাশ্রমদ্বারি দ্রৌপদীং নির্জনে বনে

বিভ্রাজমানাং বপুষা বিভ্রতীং রূপমুত্তমম্
ভ্রাজয়ন্তীং বনোদ্দেশং নীলাভ্রমিব বিদ্যুতম্

অপ্সরা দেবকন্যা বা মায়া বা দেবনির্মিতা
ইতি কৃত্বাঞ্জলিং সর্বে দদৃশুস্তামনিন্দিতাম্

ততঃ স রাজা সিন্ধূনাং বার্দ্ধক্ষত্রির্জয়দ্রথঃ
বিস্মিতস্তামনিন্দ্যাঙ্গীং দৃষ্ট্বাসীদ্ধৃষ্টমানসঃ

স কোটিকাশ্যং রাজানমব্রবীত্কামমোহিতঃ
কস্য ত্বেষানবদ্যাঙ্গী যদি বাপি ন মানুষী

বিবাহার্থো ন মে কশ্চিদিমাং দৃষ্ট্বাতিসুন্দরীম্
এতামেবাহমাদায় গমিষ্যামি স্বমালয়ম্

গচ্ছ জানীহি সৌম্যৈনাং কস্য কা চ কুতোঽপি বা
কিমর্থমাগতা সুভ্রূরিদং কণ্টকিতং বনম্

অপি নাম বরারোহা মামেষা লোকসুন্দরী
ভজেদদ্যায়তাপাঙ্গী সুদতী তনুমধ্যমা

অপ্যহং কৃতকামঃ স্যামিমাং প্রাপ্য বরস্ত্রিয়ম্
গচ্ছ জানীহি কো ন্বস্যা নাথ ইত্যেব কোটিক

স কোটিকাশ্যস্তচ্ছ্রুত্বা রথাত্প্রস্কন্দ্য কুণ্ডলী
উপেত্য পপ্রচ্ছ তদা ক্রোষ্টা ব্যাঘ্রবধূমিব