Utshovঅধ্যায় 247
247.1
দেবদূত উবাচ
মহর্ষেঽকার্যবুদ্ধিস্ত্বং যঃ স্বর্গসুখমুত্তমম্
সংপ্রাপ্তং বহু মন্তব্যং বিমৃশস্যবুধো যথা
247.2
উপরিষ্টাদসৌ লোকো যোঽয়ং স্বরিতি সংজ্ঞিতঃ
ঊর্ধ্বগঃ সত্পথঃ শশ্বদ্দেবয়ানচরো মুনে
247.3
নাতপ্ততপসঃ পুংসো নামহায়জ্ঞয়াজিনঃ
নানৃতা নাস্তিকাশ্চৈব তত্র গচ্ছন্তি মুদ্গল
247.4
ধর্মাত্মানো জিতাত্মানঃ শান্তা দান্তা বিমত্সরাঃ
দানধর্মরতাঃ পুংসঃ শূরাশ্চাহতলক্ষণাঃ
247.5
তত্র গচ্ছন্তি কর্মাগ্র্যং কৃত্বা শমদমাত্মকম্
লোকান্পুণ্যকৃতাং ব্রহ্মন্সদ্ভিরাসেবিতান্নৃভিঃ
247.6
দেবাঃ সাধ্যাস্তথা বিশ্বে মরুতশ্চ মহর্ষিভিঃ
যামা ধামাশ্চ মৌদ্গল্য গন্ধর্বাপ্সরসস্তথা
247.7
এষাং দেবনিকায়ানাং পৃথক্পৃথগনেকশঃ
ভাস্বন্তঃ কামসংপন্না লোকাস্তেজোময়াঃ শুভাঃ
247.8
ত্রয়স্ত্রিংশত্সহস্রাণি যোজনানাং হিরণ্ময়ঃ
মেরুঃ পর্বতরাড্যত্র দেবোদ্যানানি মুদ্গল
247.9
নন্দনাদীনি পুণ্যানি বিহারাঃ পুণ্যকর্মণাম্
ন ক্ষুত্পিপাসে ন গ্লানির্ন শীতোষ্ণভয়ং তথা
247.10
বীভত্সমশুভং বাপি রোগা বা তত্র কেচন
মনোজ্ঞাঃ সর্বতো গন্ধাঃ সুখস্পর্শাশ্চ সর্বশঃ
247.11
শব্দাঃ শ্রুতিমনোগ্রাহ্যাঃ সর্বতস্তত্র বৈ মুনে
ন শোকো ন জরা তত্র নায়াসপরিদেবনে
247.12
ঈদৃশঃ স মুনে লোকঃ স্বকর্মফলহেতুকঃ
সুকৃতৈস্তত্র পুরুষাঃ সংভবন্ত্যাত্মকর্মভিঃ
247.13
তৈজসানি শরীরাণি ভবন্ত্যত্রোপপদ্যতাম্
কর্মজান্যেব মৌদ্গল্য ন মাতৃপিতৃজান্যুত
247.14
ন চ স্বেদো ন দৌর্গন্ধ্যং পুরীষং মূত্রমেব চ
তেষাং ন চ রজো বস্ত্রং বাধতে তত্র বৈ মুনে
247.15
ন ম্লায়ন্তি স্রজস্তেষাং দিব্যগন্ধা মনোরমাঃ
পর্যুহ্যন্তে বিমানৈশ্চ ব্রহ্মন্নেবংবিধাশ্চ তে
247.16
ঈর্ষ্যাশোকক্লমাপেতা মোহমাত্সর্যবর্জিতাঃ
সুখং স্বর্গজিতস্তত্র বর্তয়ন্তি মহামুনে
247.17
তেষাং তথাবিধানাং তু লোকানাং মুনিপুংগব
উপর্যুপরি শক্রস্য লোকা দিব্যগুণান্বিতাঃ
247.18
পুরস্তাদ্ব্রহ্মণস্তত্র লোকাস্তেজোময়াঃ শুভাঃ
যত্র যান্ত্যৃষয়ো ব্রহ্মন্পূতাঃ স্বৈঃ কর্মভিঃ শুভৈঃ
247.19
ঋভবো নাম তত্রান্যে দেবানামপি দেবতাঃ
তেষাং লোকাঃ পরতরে তান্যজন্তীহ দেবতাঃ
247.20
স্বয়ংপ্রভাস্তে ভাস্বন্তো লোকাঃ কামদুঘাঃ পরে
ন তেষাং স্ত্রীকৃতস্তাপো ন লোকৈশ্বর্যমত্সরঃ
247.21
ন বর্তয়ন্ত্যাহুতিভিস্তে নাপ্যমৃতভোজনাঃ
তথা দিব্যশরীরাস্তে ন চ বিগ্রহমূর্তয়ঃ
247.22
ন সুখে সুখকামাশ্চ দেবদেবাঃ সনাতনাঃ
ন কল্পপরিবর্তেষু পরিবর্তন্তি তে তথা
247.23
জরা মৃত্যুঃ কুতস্তেষাং হর্ষঃ প্রীতিঃ সুখং ন চ
ন দুঃখং ন সুখং চাপি রাগদ্বেষৌ কুতো মুনে
247.24
দেবানামপি মৌদ্গল্য কাঙ্ক্ষিতা সা গতিঃ পরা
দুষ্প্রাপা পরমা সিদ্ধিরগম্যা কামগোচরৈঃ
247.25
ত্রয়স্ত্রিংশদিমে লোকাঃ শেষা লোকা মনীষিভিঃ
গম্যন্তে নিয়মৈঃ শ্রেষ্ঠৈর্দানৈর্বা বিধিপূর্বকৈঃ
247.26
সেয়ং দানকৃতা ব্যুষ্টিরত্র প্রাপ্তা সুখাবহা
তাং ভুঙ্ক্ষ্ব সুকৃতৈর্লব্ধাং তপসা দ্যোতিতপ্রভঃ
247.27
এতত্স্বর্গসুখং বিপ্র লোকা নানাবিধাস্তথা
গুণাঃ স্বর্গস্য প্রোক্তাস্তে দোষানপি নিবোধ মে
247.28
কৃতস্য কর্মণস্তত্র ভুজ্যতে যত্ফলং দিবি
ন চান্যত্ক্রিয়তে কর্ম মূলচ্ছেদেন ভুজ্যতে
247.29
সোঽত্র দোষো মম মতস্তস্যান্তে পতনং চ যৎ
সুখব্যাপ্তমনস্কানাং পতনং যচ্চ মুদ্গল
247.30
অসংতোষঃ পরীতাপো দৃষ্ট্বা দীপ্ততরাঃ শ্রিয়ঃ
যদ্ভবত্যবরে স্থানে স্থিতানাং তচ্চ দুষ্করম্
247.31
সংজ্ঞামোহশ্চ পততাং রজসা চ প্রধর্ষণম্
প্রম্লানেষু চ মাল্যেষু ততঃ পিপতিষোর্ভয়ম্
247.32
আ ব্রহ্মভবনাদেতে দোষা মৌদ্গল্য দারুণাঃ
নাকলোকে সুকৃতিনাং গুণাস্ত্বয়ুতশো নৃণাম্
247.33
অয়ং ত্বন্যো গুণঃ শ্রেষ্ঠশ্চ্যুতানাং স্বর্গতো মুনে
শুভানুশয়য়োগেন মনুষ্যেষূপজায়তে
247.34
তত্রাপি সুমহাভাগঃ সুখভাগভিজায়তে
ন চেত্সংবুধ্যতে তত্র গচ্ছত্যধমতাং ততঃ
247.35
ইহ যত্ক্রিয়তে কর্ম তত্পরত্রোপভুজ্যতে
কর্মভূমিরিয়ং ব্রহ্মন্ফলভূমিরসৌ মতা
247.36
এতত্তে সর্বমাখ্যাতং যন্মাং পৃচ্ছসি মুদ্গল
তবানুকম্পয়া সাধো সাধু গচ্ছাম মাচিরম্
247.37
ব্যাস উবাচ
এতচ্ছ্রুত্বা তু মৌদ্গল্যো বাক্যং বিমমৃশে ধিয়া
বিমৃশ্য চ মুনিশ্রেষ্ঠো দেবদূতমুবাচ হ
247.38
দেবদূত নমস্তেঽস্তু গচ্ছ তাত যথাসুখম্
মহাদোষেণ মে কার্যং ন স্বর্গেণ সুখেন বা
247.39
পতনং তন্মহদ্দুঃখং পরিতাপঃ সুদারুণঃ
স্বর্গভাজশ্চ্যবন্তীহ তস্মাত্স্বর্গং ন কাময়ে
247.40
যত্র গত্বা ন শোচন্তি ন ব্যথন্তি চলন্তি বা
তদহং স্থানমত্যন্তং মার্গয়িষ্যামি কেবলম্
247.41
ইত্যুক্ত্বা স মুনির্বাক্যং দেবদূতং বিসৃজ্য তম্
শিলোঞ্ছবৃত্তিমুত্সৃজ্য শমমাতিষ্ঠদুত্তমম্
247.42
তুল্যনিন্দাস্তুতির্ভূত্বা সমলোষ্টাশ্মকাঞ্চনঃ
জ্ঞানয়োগেন শুদ্ধেন ধ্যাননিত্যো বভূব হ
247.43
ধ্যানয়োগাদ্বলং লব্ধ্বা প্রাপ্য চর্দ্ধিমনুত্তমাম্
জগাম শাশ্বতীং সিদ্ধিং পরাং নির্বাণলক্ষণাম্
247.44
তস্মাত্ত্বমপি কৌন্তেয় ন শোকং কর্তুমর্হসি
রাজ্যাত্স্ফীতাত্পরিভ্রষ্টস্তপসা তদবাপ্স্যসি
247.45
সুখস্যানন্তরং দুঃখং দুঃখস্যানন্তরং সুখম্
পর্যায়েণোপবর্তন্তে নরং নেমিমরা ইব
247.46
পিতৃপৈতামহং রাজ্যং প্রাপ্স্যস্যমিতবিক্রম
বর্ষাত্ত্রয়োদশাদূর্ধ্বং ব্যেতু তে মানসো জ্বরঃ
247.47
বৈশংপায়ন উবাচ
এবমুক্ত্বা স ভগবান্ব্যাসঃ পাণ্ডবনন্দনম্
জগাম তপসে ধীমান্পুনরেবাশ্রমং প্রতি