Utshovঅধ্যায় 246
246.1
যুধিষ্ঠির উবাচ
ব্রীহিদ্রোণঃ পরিত্যক্তঃ কথং তেন মহাত্মনা
কস্মৈ দত্তশ্চ ভগবন্বিধিনা কেন চাত্থ মে
246.2
প্রত্যক্ষধর্মা ভগবান্যস্য তুষ্টো হি কর্মভিঃ
সফলং তস্য জন্মাহং মন্যে সদ্ধর্মচারিণঃ
246.3
ব্যাস উবাচ
শিলোঞ্ছবৃত্তির্ধর্মাত্মা মুদ্গলঃ সংশিতব্রতঃ
আসীদ্রাজন্কুরুক্ষেত্রে সত্যবাগনসূয়কঃ
246.4
অতিথিব্রতী ক্রিয়াবাংশ্চ কাপোতীং বৃত্তিমাস্থিতঃ
সত্রমিষ্টীকৃতং নাম সমুপাস্তে মহাতপাঃ
246.5
সপুত্রদারো হি মুনিঃ পক্ষাহারো বভূব সঃ
কপোতবৃত্ত্যা পক্ষেণ ব্রীহিদ্রোণমুপার্জয়ৎ
246.6
দর্শং চ পৌর্ণমাসং চ কুর্বন্বিগতমত্সরঃ
দেবতাতিথিশেষেণ কুরুতে দেহয়াপনম্
246.7
তস্যেন্দ্রঃ সহিতো দেবৈঃ সাক্ষাত্ত্রিভুবনেশ্বরঃ
প্রত্যগৃহ্ণান্মহারাজ ভাগং পর্বণি পর্বণি
246.8
স পর্বকালং কৃত্বা তু মুনিবৃত্ত্যা সমন্বিতঃ
অতিথিভ্যো দদাবন্নং প্রহৃষ্টেনান্তরাত্মনা
246.9
ব্রীহিদ্রোণস্য তদহো দদতোঽন্নং মহাত্মনঃ
শিষ্টং মাত্সর্যহীনস্য বর্ধত্যতিথিদর্শনাৎ
246.10
তচ্ছতান্যপি ভুঞ্জন্তি ব্রাহ্মণানাং মনীষিণাম্
মুনেস্ত্যাগবিশুদ্ধ্যা তু তদন্নং বৃদ্ধিমৃচ্ছতি
246.11
তং তু শুশ্রাব ধর্মিষ্ঠং মুদ্গলং সংশিতব্রতম্
দুর্বাসা নৃপ দিগ্বাসাস্তমথাভ্যাজগাম হ
246.12
বিভ্রচ্চানিয়তং বেষমুন্মত্ত ইব পাণ্ডব
বিকচঃ পরুষা বাচো ব্যাহরন্বিবিধা মুনিঃ
246.13
অভিগম্যাথ তং বিপ্রমুবাচ মুনিসত্তমঃ
অন্নার্থিনমনুপ্রাপ্তং বিদ্ধি মাং মুনিসত্তম
246.14
স্বাগতং তেঽস্ত্বিতি মুনিং মুদ্গলঃ প্রত্যভাষত
পাদ্যমাচমনীয়ং চ প্রতিবেদ্যান্নমুত্তমম্
246.15
প্রাদাত্স তপসোপাত্তং ক্ষুধিতায়াতিথিব্রতী
উন্মত্তায় পরাং শ্রদ্ধামাস্থায় স ধৃতব্রতঃ
246.16
ততস্তদন্নং রসবত্স এব ক্ষুধয়ান্বিতঃ
বুভুজে কৃত্স্নমুন্মত্তঃ প্রাদাত্তস্মৈ চ মুদ্গলঃ
246.17
ভুক্ত্বা চান্নং ততঃ সর্বমুচ্ছিষ্টেনাত্মনস্ততঃ
অথানুলিলিপেঽঙ্গানি জগাম চ যথাগতম্
246.18
এবং দ্বিতীয়ে সংপ্রাপ্তে পর্বকালে মনীষিণঃ
আগম্য বুভুজে সর্বমন্নমুঞ্ছোপজীবিনঃ
246.19
নিরাহারস্তু স মুনিরুঞ্ছমার্জয়তে পুনঃ
ন চৈনং বিক্রিয়াং নেতুমশকন্মুদ্গলং ক্ষুধা
246.20
ন ক্রোধো ন চ মাত্সর্যং নাবমানো ন সংভ্রমঃ
সপুত্রদারমুঞ্ছন্তমাবিবেশ দ্বিজোত্তমম্
246.21
তথা তমুঞ্ছধর্মাণং দুর্বাসা মুনিসত্তমম্
উপতস্থে যথাকালং ষট্কৃত্বঃ কৃতনিশ্চয়ঃ
246.22
ন চাস্য মানসং কিংচিদ্বিকারং দদৃশে মুনিঃ
শুদ্ধসত্ত্বস্য শুদ্ধং স দদৃশে নির্মলং মনঃ
246.23
তমুবাচ ততঃ প্রীতঃ স মুনির্মুদ্গলং তদা
ত্বত্সমো নাস্তি লোকেঽস্মিন্দাতা মাত্সর্যবর্জিতঃ
246.24
ক্ষুদ্ধর্মসংজ্ঞাং প্রণুদত্যাদত্তে ধৈর্যমেব চ
বিষয়ানুসারিণী জিহ্বা কর্ষত্যেব রসান্প্রতি
246.25
আহারপ্রভবাঃ প্রাণা মনো দুর্নিগ্রহং চলম্
মনসশ্চেন্দ্রিয়াণাং চাপ্যৈকাগ্র্যং নিশ্চিতং তপঃ
246.26
শ্রমেণোপার্জিতং ত্যক্তুং দুঃখং শুদ্ধেন চেতসা
তত্সর্বং ভবতা সাধো যথাবদুপপাদিতম্
246.27
প্রীতাঃ স্মোঽনুগৃহীতাশ্চ সমেত্য ভবতা সহ
ইন্দ্রিয়াভিজয়ো ধৈর্যং সংবিভাগো দমঃ শমঃ
246.28
দয়া সত্যং চ ধর্মশ্চ ত্বয়ি সর্বং প্রতিষ্ঠিতম্
জিতাস্তে কর্মভির্লোকাঃ প্রাপ্তোঽসি পরমাং গতিম্
246.29
অহো দানং বিঘুষ্টং তে সুমহত্স্বর্গবাসিভিঃ
সশরীরো ভবান্গন্তা স্বর্গং সুচরিতব্রত
246.30
ইত্যেবং বদতস্তস্য তদা দুর্বাসসো মুনেঃ
দেবদূতো বিমানেন মুদ্গলং প্রত্যুপস্থিতঃ
246.31
হংসসারসয়ুক্তেন কিঙ্কিণীজালমালিনা
কামগেন বিচিত্রেণ দিব্যগন্ধবতা তথা
246.32
উবাচ চৈনং বিপ্রর্ষিং বিমানং কর্মভির্জিতম্
সমুপারোহ সংসিদ্ধিং প্রাপ্তোঽসি পরমাং মুনে
246.33
তমেবংবাদিনমৃষির্দেবদূতমুবাচ হ
ইচ্ছামি ভবতা প্রোক্তান্গুণান্স্বর্গনিবাসিনাম্
246.34
কে গুণাস্তত্র বসতাং কিং তপঃ কশ্চ নিশ্চয়ঃ
স্বর্গে স্বর্গসুখং কিং চ দোষো বা দেবদূতক
246.35
সতাং সপ্তপদং মিত্রমাহুঃ সন্তঃ কুলোচিতাঃ
মিত্রতাং চ পুরস্কৃত্য পৃচ্ছামি ত্বামহং বিভো
246.36
যদত্র তথ্যং পথ্যং চ তদ্ব্রবীহ্যবিচারয়ন্
শ্রুত্বা তথা করিষ্যামি ব্যবসায়ং গিরা তব