Utshovঅধ্যায় 245
245.1
বৈশংপায়ন উবাচ
বনে নিবসতাং তেষাং পাণ্ডবানাং মহাত্মনাম্
বর্ষাণ্যেকাদশাতীয়ুঃ কৃচ্ছ্রেণ ভরতর্ষভ
245.2
ফলমূলাশনাস্তে হি সুখার্হা দুঃখমুত্তমম্
প্রাপ্তকালমনুধ্যান্তঃ সেহুরুত্তমপূরুষাঃ
245.3
যুধিষ্ঠিরস্তু রাজর্ষিরাত্মকর্মাপরাধজম্
চিন্তয়ন্স মহাবাহুর্ভ্রাতৄণাং দুঃখমুত্তমম্
245.4
ন সুষ্বাপ সুখং রাজা হৃদি শল্যৈরিবার্পিতৈঃ
দৌরাত্ম্যমনুপশ্যংস্তত্কালে দ্যূতোদ্ভবস্য হি
245.5
সংস্মরন্পরুষা বাচঃ সূতপুত্রস্য পাণ্ডবঃ
নিঃশ্বাসপরমো দীনো বিভ্রত্কোপবিষং মহৎ
245.6
অর্জুনো যমজৌ চোভৌ দ্রৌপদী চ যশস্বিনী
স চ ভীমো মহাতেজাঃ সর্বেষামুত্তমো বলী
যুধিষ্ঠিরমুদীক্ষন্তঃ সেহুর্দুঃখমনুত্তমম্
245.7
অবশিষ্টমল্পকালং মন্বানাঃ পুরুষর্ষভাঃ
বপুরন্যদিবাকার্ষুরুত্সাহামর্ষচেষ্টিতৈঃ
245.8
কস্যচিত্ত্বথ কালস্য ব্যাসঃ সত্যবতীসুতঃ
আজগাম মহায়োগী পাণ্ডবানবলোককঃ
245.9
তমাগতমভিপ্রেক্ষ্য কুন্তীপুত্রো যুধিষ্ঠিরঃ
প্রত্যুদ্গম্য মহাত্মানং প্রত্যগৃহ্ণাদ্যথাবিধি
245.10
তমাসীনমুপাসীনঃ শুশ্রূষুর্নিয়তেন্দ্রিয়ঃ
তোষয়ন্প্রণিপাতেন ব্যাসং পাণ্ডবনন্দনঃ
245.11
তানবেক্ষ্য কৃশান্পৌত্রান্বনে বন্যেন জীবতঃ
মহর্ষিরনুকম্পার্থমব্রবীদ্বাষ্পগদ্গদম্
245.12
যুধিষ্ঠির মহাবাহো শৃণু ধর্মভৃতাং বর
নাতপ্ততপসঃ পুত্র প্রাপ্নুবন্তি মহত্সুখম্
245.13
সুখদুঃখে হি পুরুষঃ পর্যায়েণোপসেবতে
নাত্যন্তমসুখং কশ্চিত্প্রাপ্নোতি পুরুষর্ষভ
245.14
প্রজ্ঞাবাংস্ত্বেব পুরুষঃ সংয়ুক্তঃ পরয়া ধিয়া
উদয়াস্তময়জ্ঞো হি ন শোচতি ন হৃষ্যতি
245.15
সুখমাপতিতং সেবেদ্দুঃখমাপতিতং সহেৎ
কালপ্রাপ্তমুপাসীত সস্যানামিব কর্ষকঃ
245.16
তপসো হি পরং নাস্তি তপসা বিন্দতে মহৎ
নাসাধ্যং তপসঃ কিংচিদিতি বুধ্যস্ব ভারত
245.17
সত্যমার্জবমক্রোধঃ সংবিভাগো দমঃ শমঃ
অনসূয়াবিহিংসা চ শৌচমিন্দ্রিয়সংয়মঃ
সাধনানি মহারাজ নরাণাং পুণ্যকর্মণাম্
245.18
অধর্মরুচয়ো মূঢাস্তির্যগ্গতিপরায়ণাঃ
কৃচ্ছ্রাং যোনিমনুপ্রাপ্য ন সুখং বিন্দতে জনাঃ
245.19
ইহ যত্ক্রিয়তে কর্ম তত্পরত্রোপভুজ্যতে
তস্মাচ্ছরীরং যুঞ্জীত তপসা নিয়মেন চ
245.20
যথাশক্তি প্রয়চ্ছেচ্চ সংপূজ্যাভিপ্রণম্য চ
কালে পাত্রে চ হৃষ্টাত্মা রাজন্বিগতমত্সরঃ
245.21
সত্যবাদী লভেতায়ুরনায়াসমথার্জবী
অক্রোধনোঽনসূয়শ্চ নির্বৃতিং লভতে পরাম্
245.22
দান্তঃ শমপরঃ শশ্বত্পরিক্লেশং ন বিন্দতি
ন চ তপ্যতি দান্তাত্মা দৃষ্ট্বা পরগতাং শ্রিয়ম্
245.23
সংবিভক্তা চ দাতা চ ভোগবান্সুখবান্নরঃ
ভবত্যহিংসকশ্চৈব পরমারোগ্যমশ্নুতে
245.24
মান্যান্মানয়িতা জন্ম কুলে মহতি বিন্দতি
ব্যসনৈর্ন তু সংয়োগং প্রাপ্নোতি বিজিতেন্দ্রিয়ঃ
245.25
শুভানুশয়বুদ্ধির্হি সংয়ুক্তঃ কালধর্মণা
প্রাদুর্ভবতি তদ্যোগাত্কল্যাণমতিরেব সঃ
245.26
যুধিষ্ঠির উবাচ
ভগবন্দানধর্মাণাং তপসো বা মহামুনে
কিং স্বিদ্বহুগুণং প্রেত্য কিং বা দুষ্করমুচ্যতে
245.27
ব্যাস উবাচ
দানান্ন দুষ্করতরং পৃথিব্যামস্তি কিংচন
অর্থে হি মহতী তৃষ্ণা স চ দুঃখেন লভ্যতে
245.28
পরিত্যজ্য প্রিয়ান্প্রাণান্ধনার্থং হি মহাহবম্
প্রবিশন্তি নরা বীরাঃ সমুদ্রমটবীং তথা
245.29
কৃষিগোরক্ষ্যমিত্যেকে প্রতিপদ্যন্তি মানবাঃ
পুরুষাঃ প্রেষ্যতামেকে নির্গচ্ছন্তি ধনার্থিনঃ
245.30
তস্য দুঃখার্জিতস্যৈবং পরিত্যাগঃ সুদুষ্করঃ
ন দুষ্করতরং দানাত্তস্মাদ্দানং মতং মম
245.31
বিশেষস্ত্বত্র বিজ্ঞেয়ো ন্যায়েনোপার্জিতং ধনম্
পাত্রে দেশে চ কালে চ সাধুভ্যঃ প্রতিপাদয়েৎ
245.32
অন্যায়সমুপাত্তেন দানধর্মো ধনেন যঃ
ক্রিয়তে ন স কর্তারং ত্রায়তে মহতো ভয়াৎ
245.33
পাত্রে দানং স্বল্পমপি কালে দত্তং যুধিষ্ঠির
মনসা সুবিশুদ্ধেন প্রেত্যানন্তফলং স্মৃতম্
245.34
অত্রাপ্যুদাহরন্তীমমিতিহাসং পুরাতনম্
ব্রীহিদ্রোণপরিত্যাগাদ্যত্ফলং প্রাপ মুদ্গলঃ