অধ্যায় 244

244.1

জনমেজয় উবাচ
দুর্যোধনং মোচয়িত্বা পাণ্ডুপুত্রা মহাবলাঃ
কিমকার্ষুর্বনে তস্মিংস্তন্মমাখ্যাতুমর্হসি

বৈশংপায়ন উবাচ
ততঃ শয়ানং কৌন্তেয়ং রাত্রৌ দ্বৈতবনে মৃগাঃ
স্বপ্নান্তে দর্শয়ামাসুর্বাষ্পকণ্ঠা যুধিষ্ঠিরম্

তানব্রবীত্স রাজেন্দ্রো বেপমানান্কৃতাঞ্জলীন্
ব্রূত যদ্বক্তুকামাঃ স্থ কে ভবন্তঃ কিমিষ্যতে

এবমুক্তাঃ পাণ্ডবেন কৌন্তেয়েন যশস্বিনা
প্রত্যব্রুবন্মৃগাস্তত্র হতশেষা যুধিষ্ঠিরম্

বয়ং মৃগা দ্বৈতবনে হতশিষ্টাঃ স্ম ভারত
নোত্সীদেম মহারাজ ক্রিয়তাং বাসপর্যয়ঃ

ভবন্তো ভ্রাতরঃ শূরাঃ সর্ব এবাস্ত্রকোবিদাঃ
কুলান্যল্পাবশিষ্টানি কৃতবন্তো বনৌকসাম্

বীজভূতা বয়ং কেচিদবশিষ্টা মহামতে
বিবর্ধেমহি রাজেন্দ্র প্রসাদাত্তে যুধিষ্ঠির

তান্বেপমানান্বিত্রস্তান্বীজমাত্রাবশেষিতান্
মৃগান্দৃষ্ট্বা সুদুঃখার্তো ধর্মরাজো যুধিষ্ঠিরঃ

তাংস্তথেত্যব্রবীদ্রাজা সর্বভূতহিতে রতঃ
তথ্যং ভবন্তো ব্রুবতে করিষ্যামি চ তত্তথা

ইত্যেবং প্রতিবুদ্ধঃ স রাত্র্যন্তে রাজসত্তমঃ
অব্রবীত্সহিতান্ভ্রাতৄন্দয়াপন্নো মৃগান্প্রতি

উক্তো রাত্রৌ মৃগৈরস্মি স্বপ্নান্তে হতশেষিতৈঃ
তনুভূতাঃ স্ম ভদ্রং তে দয়া নঃ ক্রিয়তামিতি

তে সত্যমাহুঃ কর্তব্যা দয়াস্মাভির্বনৌকসাম্
সাষ্টমাসং হি নো বর্ষং যদেনানুপয়ুঞ্জ্মহে

পুনর্বহুমৃগং রম্যং কাম্যকং কাননোত্তমম্
মরুভূমেঃ শিরঃ খ্যাতং তৃণবিন্দুসরঃ প্রতি
তত্রেমা বসতীঃ শিষ্টা বিহরন্তো রমেমহি

ততস্তে পাণ্ডবাঃ শীঘ্রং প্রয়য়ুর্ধর্মকোবিদাঃ
ব্রাহ্মণৈঃ সহিতা রাজন্যে চ তত্র সহোষিতাঃ
ইন্দ্রসেনাদিভিশ্চৈব প্রেষ্যৈরনুগতাস্তদা

তে যাত্বানুসৃতৈর্মার্গৈঃ স্বন্নৈঃ শুচিজলান্বিতৈঃ
দদৃশুঃ কাম্যকং পুণ্যমাশ্রমং তাপসায়ুতম্

বিবিশুস্তে স্ম কৌরব্যা বৃতা বিপ্রর্ষভৈস্তদা
তদ্বনং ভরতশ্রেষ্ঠাঃ স্বর্গং সুকৃতিনো যথা