Utshovঅধ্যায় 243
243.1
বৈশংপায়ন উবাচ
প্রবিশন্তং মহারাজ সূতাস্তুষ্টুবুরচ্যুতম্
জনাশ্চাপি মহেষ্বাসং তুষ্টুবূ রাজসত্তমম্
243.2
লাজৈশ্চন্দনচূর্ণৈশ্চাপ্যবকীর্য জনাস্তদা
ঊচুর্দিষ্ট্যা নৃপাবিঘ্নাত্সমাপ্তোঽয়ং ক্রতুস্তব
243.3
অপরে ত্বব্রুবংস্তত্র বাতিকাস্তং মহীপতিম্
যুধিষ্ঠিরস্য যজ্ঞেন ন সমো হ্যেষ তু ক্রতুঃ
নৈব তস্য ক্রতোরেষ কলামর্হতি ষোডশীম্
243.4
এবং তত্রাব্রুবন্কেচিদ্বাতিকাস্তং নরেশ্বরম্
সুহৃদস্ত্বব্রুবংস্তত্র অতি সর্বানয়ং ক্রতুঃ
243.5
যয়াতির্নহুষশ্চাপি মান্ধাতা ভরতস্তথা
ক্রতুমেনং সমাহৃত্য পূতাঃ সর্বে দিবং গতাঃ
243.6
এতা বাচঃ শুভাঃ শৃণ্বন্সুহৃদাং ভরতর্ষভ
প্রবিবেশ পুরং হৃষ্টঃ স্ববেশ্ম চ নরাধিপঃ
243.7
অভিবাদ্য ততঃ পাদৌ মাতাপিত্রোর্বিশাং পতে
ভীষ্মদ্রোণকৃপাণাং চ বিদুরস্য চ ধীমতঃ
243.8
অভিবাদিতঃ কনীয়োভির্ভ্রাতৃভির্ভ্রাতৃবত্সলঃ
নিষসাদাসনে মুখ্যে ভ্রাতৃভিঃ পরিবারিতঃ
243.9
তমুত্থায় মহারাজ সূতপুত্রোঽব্রবীদ্বচঃ
দিষ্ট্যা তে ভরতশ্রেষ্ঠ সমাপ্তোঽয়ং মহাক্রতুঃ
243.10
হতেষু যুধি পার্থেষু রাজসূয়ে তথা ত্বয়া
আহৃতেঽহং নরশ্রেষ্ঠ ত্বাং সভাজয়িতা পুনঃ
243.11
তমব্রবীন্মহারাজো ধার্তরাষ্ট্রো মহায়শাঃ
সত্যমেতত্ত্বয়া বীর পাণ্ডবেষু দুরাত্মসু
243.12
নিহতেষু নরশ্রেষ্ঠ প্রাপ্তে চাপি মহাক্রতৌ
রাজসূয়ে পুনর্বীর ত্বং মাং সংবর্ধয়িষ্যসি
243.13
এবমুক্ত্বা মহাপ্রাজ্ঞঃ কর্ণমাশ্লিষ্য ভারত
রাজসূয়ং ক্রতুশ্রেষ্ঠং চিন্তয়ামাস কৌরবঃ
243.14
সোঽব্রবীত্সুহৃদশ্চাপি পার্শ্বস্থান্নৃপসত্তমঃ
কদা তু তং ক্রতুবরং রাজসূয়ং মহাধনম্
নিহত্য পাণ্ডবান্সর্বানাহরিষ্যামি কৌরবাঃ
243.15
তমব্রবীত্তদা কর্ণঃ শৃণু মে রাজকুঞ্জর
পাদৌ ন ধাবয়ে তাবদ্যাবন্ন নিহতোঽর্জুনঃ
243.16
অথোত্ক্রুষ্টং মহেষ্বাসৈর্ধার্তরাষ্ট্রৈর্মহারথৈঃ
প্রতিজ্ঞাতে ফল্গুনস্য বধে কর্ণেন সংয়ুগে
বিজিতাংশ্চাপ্যমন্যন্ত পাণ্ডবান্ধৃতরাষ্ট্রজাঃ
243.17
দুর্যোধনোঽপি রাজেন্দ্র বিসৃজ্য নরপুংগবান্
প্রবিবেশ গৃহং শ্রীমান্যথা চৈত্ররথং প্রভুঃ
তেঽপি সর্বে মহেষ্বাসা জগ্মুর্বেশ্মানি ভারত
243.18
পাণ্ডবাশ্চ মহেষ্বাসা দূতবাক্যপ্রচোদিতাঃ
চিন্তয়ন্তস্তমেবার্থং নালভন্ত সুখং ক্বচিৎ
243.19
ভূয়শ্চ চারৈ রাজেন্দ্র প্রবৃত্তিরুপপাদিতা
প্রতিজ্ঞা সূতপুত্রস্য বিজয়স্য বধং প্রতি
243.20
এতচ্ছ্রুত্বা ধর্মসুতঃ সমুদ্বিগ্নো নরাধিপ
অভেদ্যকবচং মত্বা কর্ণমদ্ভুতবিক্রমম্
অনুস্মরংশ্চ সংক্লেশান্ন শান্তিমুপয়াতি সঃ
243.21
তস্য চিন্তাপরীতস্য বুদ্ধির্জজ্ঞে মহাত্মনঃ
বহুব্যালমৃগাকীর্ণং ত্যক্তুং দ্বৈতবনং বনম্
243.22
ধার্তরাষ্ট্রোঽপি নৃপতিঃ প্রশশাস বসুংধরাম্
ভ্রাতৃভিঃ সহিতো বীরৈর্ভীষ্মদ্রোণকৃপৈস্তথা
243.23
সংগম্য সূতপুত্রেণ কর্ণেনাহবশোভিনা
দুর্যোধনঃ প্রিয়ে নিত্যং বর্তমানো মহীপতিঃ
পূজয়ামাস বিপ্রেন্দ্রান্ক্রতুভির্ভূরিদক্ষিণৈঃ
243.24
ভ্রাতৄণাং চ প্রিয়ং রাজন্স চকার পরংতপঃ
নিশ্চিত্য মনসা বীরো দত্তভুক্তফলং ধনম্