অধ্যায় 242

242.1

বৈশংপায়ন উবাচ
ততস্তু শিল্পিনঃ সর্বে অমাত্যপ্রবরাশ্চ হ
বিদুরশ্চ মহাপ্রাজ্ঞো ধার্তরাষ্ট্রে ন্যবেদয়ৎ

242.2

সজ্জং ক্রতুবরং রাজন্কালপ্রাপ্তং চ ভারত
সৌবর্ণং চ কৃতং দিব্যং লাঙ্গলং সুমহাধনম্

242.3

এতচ্ছ্রুত্বা নৃপশ্রেষ্ঠো ধার্তরাষ্ট্রো বিশাং পতে
আজ্ঞাপয়ামাস নৃপঃ ক্রতুরাজপ্রবর্তনম্

242.4

ততঃ প্রববৃতে যজ্ঞঃ প্রভূতান্নঃ সুসংস্কৃতঃ
দীক্ষিতশ্চাপি গান্ধারির্যথাশাস্ত্রং যথাক্রমম্

242.5

প্রহৃষ্টো ধৃতরাষ্ট্রোঽভূদ্বিদুরশ্চ মহায়শাঃ
ভীষ্মো দ্রোণঃ কৃপঃ কর্ণো গান্ধারী চ যশস্বিনী

242.6

নিমন্ত্রণার্থং দূতাংশ্চ প্রেষয়ামাস শীঘ্রগান্
পার্থিবানাং চ রাজেন্দ্র ব্রাহ্মণানাং তথৈব চ
তে প্রয়াতা যথোদ্দিষ্টং দূতাস্ত্বরিতবাহনাঃ

242.7

তত্র কংচিত্প্রয়াতং তু দূতং দুঃশাসনোঽব্রবীৎ
গচ্ছ দ্বৈতবনং শীঘ্রং পাণ্ডবান্পাপপূরুষান্
নিমন্ত্রয় যথান্যায়ং বিপ্রাংস্তস্মিন্মহাবনে

242.8

স গত্বা পাণ্ডবাবাসমুবাচাভিপ্রণম্য তান্
দুর্যোধনো মহারাজ যজতে নৃপসত্তমঃ

242.9

স্ববীর্যার্জিতমর্থৌঘমবাপ্য কুরুনন্দনঃ
তত্র গচ্ছন্তি রাজানো ব্রাহ্মণাশ্চ ততস্ততঃ

242.10

অহং তু প্রেষিতো রাজন্কৌরবেণ মহাত্মনা
আমন্ত্রয়তি বো রাজা ধার্তরাষ্ট্রো জনেশ্বরঃ
মনোঽভিলষিতং রাজ্ঞস্তং ক্রতুং দ্রষ্টুমর্হথ

242.11

ততো যুধিষ্ঠিরো রাজা তচ্ছ্রুত্বা দূতভাষিতম্
অব্রবীন্নৃপশার্দূলো দিষ্ট্যা রাজা সুয়োধনঃ
যজতে ক্রতুমুখ্যেন পূর্বেষাং কীর্তিবর্ধনঃ

242.12

বয়মপ্যুপয়াস্যামো ন ত্বিদানীং কথংচন
সময়ঃ পরিপাল্যো নো যাবদ্বর্ষং ত্রয়োদশম্

242.13

শ্রুত্বৈতদ্ধর্মরাজস্য ভীমো বচনমব্রবীৎ
তদা তু নৃপতির্গন্তা ধর্মরাজো যুধিষ্ঠিরঃ

242.14

অস্ত্রশস্ত্রপ্রদীপ্তেঽগ্নৌ যদা তং পাতয়িষ্যতি
বর্ষাত্ত্রয়োদশাদূর্ধ্বং রণসত্রে নরাধিপঃ

242.15

যদা ক্রোধহবির্মোক্তা ধার্তরাষ্ট্রেষু পাণ্ডবঃ
আগন্তারস্তদা স্মেতি বাচ্যস্তে স সুয়োধনঃ

242.16

শেষাস্তু পাণ্ডবা রাজন্নৈবোচুঃ কিংচিদপ্রিয়ম্
দূতশ্চাপি যথাবৃত্তং ধার্তরাষ্ট্রে ন্যবেদয়ৎ

242.17

অথাজগ্মুর্নরশ্রেষ্ঠা নানাজনপদেশ্বরাঃ
ব্রাহ্মণাশ্চ মহাভাগা ধার্তরাষ্ট্রপুরং প্রতি

242.18

তে ত্বর্চিতা যথাশাস্ত্রং যথাবর্ণং যথাক্রমম্
মুদা পরময়া যুক্তাঃ প্রীত্যা চাপি নরেশ্বর

242.19

ধৃতরাষ্ট্রোঽপি রাজেন্দ্র সংবৃতঃ সর্বকৌরবৈঃ
হর্ষেণ মহতা যুক্তো বিদুরং প্রত্যভাষত

242.20

যথা সুখী জনঃ সর্বঃ ক্ষত্তঃ স্যাদন্নসংয়ুতঃ
তুষ্যেচ্চ যজ্ঞসদনে তথা ক্ষিপ্রং বিধীয়তাম্

242.21

বিদুরস্ত্বেবমাজ্ঞপ্তঃ সর্ববর্ণানরিংদম
যথাপ্রমাণতো বিদ্বান্পূজয়ামাস ধর্মবিৎ

242.22

ভক্ষ্যভোজ্যান্নপানেন মাল্যৈশ্চাপি সুগন্ধিভিঃ
বাসোভির্বিবিধৈশ্চৈব যোজয়ামাস হৃষ্টবৎ

242.23

কৃত্বা হ্যবভৃথং বীরো যথাশাস্ত্রং যথাক্রমম্
সান্ত্বয়িত্বা চ রাজেন্দ্রো দত্ত্বা চ বিবিধং বসু
বিসর্জয়ামাস নৃপান্ব্রাহ্মণাংশ্চ সহস্রশঃ

242.24

বিসর্জয়িত্বা স নৃপান্ভ্রাতৃভিঃ পরিবারিতঃ
বিবেশ হাস্তিনপুরং সহিতঃ কর্ণসৌবলৈঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.