Utshovঅধ্যায় 241
241.1
জনমেজয় উবাচ
বসমানেষু পার্থেষু বনে তস্মিন্মহাত্মসু
ধার্তরাষ্ট্রা মহেষ্বাসাঃ কিমকুর্বন্ত সত্তম
241.2
কর্ণো বৈকর্তনশ্চাপি শকুনিশ্চ মহাবলঃ
ভীষ্মদ্রোণকৃপাশ্চৈব তন্মে শংসিতুমর্হসি
241.3
বৈশংপায়ন উবাচ
এবং গতেষু পার্থেষু বিসৃষ্টে চ সুয়োধনে
আগতে হাস্তিনপুরং মোক্ষিতে পাণ্ডুনন্দনৈঃ
ভীষ্মোঽব্রবীন্মহারাজ ধার্তরাষ্ট্রমিদং বচঃ
241.4
উক্তং তাত ময়া পূর্বং গচ্ছতস্তে তপোবনম্
গমনং মে ন রুচিতং তব তন্ন কৃতং চ তে
241.5
ততঃ প্রাপ্তং ত্বয়া বীর গ্রহণং শত্রুভির্বলাৎ
মোক্ষিতশ্চাসি ধর্মজ্ঞৈঃ পাণ্ডবৈর্ন চ লজ্জসে
241.6
প্রত্যক্ষং তব গান্ধারে সসৈন্যস্য বিশাং পতে
সূতপুত্রোঽপয়াদ্ভীতো গন্ধর্বাণাং তদা রণাৎ
ক্রোশতস্তব রাজেন্দ্র সসৈন্যস্য নৃপাত্মজ
241.7
দৃষ্টস্তে বিক্রমশ্চৈব পাণ্ডবানাং মহাত্মনাম্
কর্ণস্য চ মহাবাহো সূতপুত্রস্য দুর্মতেঃ
241.8
ন চাপি পাদভাক্কর্ণঃ পাণ্ডবানাং নৃপোত্তম
ধনুর্বেদে চ শৌর্যে চ ধর্মে বা ধর্মবত্সল
241.9
তস্য তেঽহং ক্ষমং মন্যে পাণ্ডবৈস্তৈর্মহাত্মভিঃ
সংধিং সংধিবিদাং শ্রেষ্ঠ কুলস্যাস্য বিবৃদ্ধয়ে
241.10
এবমুক্তস্তু ভীষ্মেণ ধার্তরাষ্ট্রো জনেশ্বরঃ
প্রহস্য সহসা রাজন্বিপ্রতস্থে সসৌবলঃ
241.11
তং তু প্রস্থিতমাজ্ঞায় কর্ণদুঃশাসনাদয়ঃ
অনুজগ্মুর্মহেষ্বাসা ধার্তরাষ্ট্রং মহাবলম্
241.12
তাংস্তু সংপ্রস্থিতান্দৃষ্ট্বা ভীষ্মঃ কুরুপিতামহঃ
লজ্জয়া ব্রীডিতো রাজঞ্জগাম স্বং নিবেশনম্
241.13
গতে ভীষ্মে মহারাজ ধার্তরাষ্ট্রো জনাধিপঃ
পুনরাগম্য তং দেশমমন্ত্রয়ত মন্ত্রিভিঃ
241.14
কিমস্মাকং ভবেচ্ছ্রেয়ঃ কিং কার্যমবশিষ্যতে
কথং নু সুকৃতং চ স্যান্মন্ত্রয়ামাস ভারত
241.15
কর্ণ উবাচ
দুর্যোধন নিবোধেদং যত্ত্বা বক্ষ্যামি কৌরব
শ্রুত্বা চ তত্তথা সর্বং কর্তুমর্হস্যরিংদম
241.16
তবাদ্য পৃথিবী বীর নিঃসপত্না নৃপোত্তম
তাং পালয় যথা শক্রো হতশত্রুর্মহামনাঃ
241.17
বৈশংপায়ন উবাচ
এবমুক্তস্তু কর্ণেন কর্ণং রাজাব্রবীত্পুনঃ
ন কিংচিদ্দুর্লভং তস্য যস্য ত্বং পুরুষর্ষভ
241.18
সহায়শ্চানুরক্তশ্চ মদর্থং চ সমুদ্যতঃ
অভিপ্রায়স্তু মে কশ্চিত্তং বৈ শৃণু যথাতথম্
241.19
রাজসূয়ং পাণ্ডবস্য দৃষ্ট্বা ক্রতুবরং তদা
মম স্পৃহা সমুত্পন্না তাং সংপাদয় সূতজ
241.20
এবমুক্তস্ততঃ কর্ণো রাজানমিদমব্রবীৎ
তবাদ্য পৃথিবীপালা বশ্যাঃ সর্বে নৃপোত্তম
241.21
আহূয়ন্তাং দ্বিজবরাঃ সংভারাশ্চ যথাবিধি
সংভ্রিয়ন্তাং কুরুশ্রেষ্ঠ যজ্ঞোপকরণানি চ
241.22
ঋত্বিজশ্চ সমাহূতা যথোক্তং বেদপারগাঃ
ক্রিয়াং কুর্বন্তু তে রাজন্যথাশাস্ত্রমরিংদম
241.23
বহ্বন্নপানসংয়ুক্তঃ সুসমৃদ্ধগুণান্বিতঃ
প্রবর্ততাং মহায়জ্ঞস্তবাপি ভরতর্ষভ
241.24
এবমুক্তস্তু কর্ণেন ধার্তরাষ্ট্রো বিশাং পতে
পুরোহিতং সমানায্য ইদং বচনমব্রবীৎ
241.25
রাজসূয়ং ক্রতুশ্রেষ্ঠং সমাপ্তবরদক্ষিণম্
আহর ত্বং মম কৃতে যথান্যায়ং যথাক্রমম্
241.26
স এবমুক্তো নৃপতিমুবাচ দ্বিজপুংগবঃ
ন স শক্যঃ ক্রতুশ্রেষ্ঠো জীবমানে যুধিষ্ঠিরে
আহর্তুং কৌরবশ্রেষ্ঠ কুলে তব নৃপোত্তম
241.27
দীর্ঘায়ুর্জীবতি চ বৈ ধৃতরাষ্ট্রঃ পিতা তব
অতশ্চাপি বিরুদ্ধস্তে ক্রতুরেষ নৃপোত্তম
241.28
অস্তি ত্বন্যন্মহত্সত্রং রাজসূয়সমং প্রভো
তেন ত্বং যজ রাজেন্দ্র শৃণু চেদং বচো মম
241.29
য ইমে পৃথিবীপালাঃ করদাস্তব পার্থিব
তে করান্সংপ্রয়চ্ছন্তু সুবর্ণং চ কৃতাকৃতম্
241.30
তেন তে ক্রিয়তামদ্য লাঙ্গলং নৃপসত্তম
যজ্ঞবাটস্য তে ভূমিঃ কৃষ্যতাং তেন ভারত
241.31
তত্র যজ্ঞো নৃপশ্রেষ্ঠ প্রভূতান্নঃ সুসংস্কৃতঃ
প্রবর্ততাং যথান্যায়ং সর্বতো হ্যনিবারিতঃ
241.32
এষ তে বৈষ্ণবো নাম যজ্ঞঃ সত্পুরুষোচিতঃ
এতেন নেষ্টবান্কশ্চিদৃতে বিষ্ণুং পুরাতনম্
241.33
রাজসূয়ং ক্রতুশ্রেষ্ঠং স্পর্ধত্যেষ মহাক্রতুঃ
অস্মাকং রোচতে চৈব শ্রেয়শ্চ তব ভারত
অবিঘ্নশ্চ ভবেদেষ সফলা স্যাত্স্পৃহা তব
241.34
এবমুক্তস্তু তৈর্বিপ্রৈর্ধার্তরাষ্ট্রো মহীপতিঃ
কর্ণং চ সৌবলং চৈব ভ্রাতৄংশ্চৈবেদমব্রবীৎ
241.35
রোচতে মে বচঃ কৃত্স্নং ব্রাহ্মণানাং ন সংশয়ঃ
রোচতে যদি যুষ্মাকং তন্মা প্রব্রূত মাচিরম্
241.36
এবমুক্তাস্তু তে সর্বে তথেত্যূচুর্নরাধিপম্
সংদিদেশ ততো রাজা ব্যাপারস্থান্যথাক্রমম্
241.37
হলস্য করণে চাপি ব্যাদিষ্টাঃ সর্বশিল্পিনঃ
যথোক্তং চ নৃপশ্রেষ্ঠ কৃতং সর্বং যথাক্রমম্