Utshovঅধ্যায় 240
240.1
দানবা ঊচুঃ
ভোঃ সুয়োধন রাজেন্দ্র ভরতানাং কুলোদ্বহ
শূরৈঃ পরিবৃতো নিত্যং তথৈব চ মহাত্মভিঃ
240.2
অকার্ষীঃ সাহসমিদং কস্মাত্প্রায়োপবেশনম্
আত্মত্যাগী হ্যবাগ্যাতি বাচ্যতাং চায়শস্করীম্
240.3
ন হি কার্যবিরুদ্ধেষু বহ্বপায়েষু কর্মসু
মূলঘাতিষু সজ্জন্তে বুদ্ধিমন্তো ভবদ্বিধাঃ
240.4
নিয়চ্ছৈতাং মতিং রাজন্ধর্মার্থসুখনাশিনীম্
যশঃপ্রতাপধৈর্যঘ্নীং শত্রূণাং হর্ষবর্ধনীম্
240.5
শ্রূয়তাং চ প্রভো তত্ত্বং দিব্যতাং চাত্মনো নৃপ
নির্মাণং চ শরীরস্য ততো ধৈর্যমবাপ্নুহি
240.6
পুরা ত্বং তপসাস্মাভির্লব্ধো দেবান্মহেশ্বরাৎ
পূর্বকায়শ্চ সর্বস্তে নির্মিতো বজ্রসংচয়ৈঃ
240.7
অস্ত্রৈরভেদ্যঃ শস্ত্রৈশ্চাপ্যধঃকায়শ্চ তেঽনঘ
কৃতঃ পুষ্পময়ো দেব্যা রূপতঃ স্ত্রীমনোহরঃ
240.8
এবমীশ্বরসংয়ুক্তস্তব দেহো নৃপোত্তম
দেব্যা চ রাজশার্দূল দিব্যস্ত্বং হি ন মানুষঃ
240.9
ক্ষত্রিয়াশ্চ মহাবীর্যা ভগদত্তপুরোগমাঃ
দিব্যাস্ত্রবিদুষঃ শূরাঃ ক্ষপয়িষ্যন্তি তে রিপূন্
240.10
তদলং তে বিষাদেন ভয়ং তব ন বিদ্যতে
সাহ্যার্থং চ হি তে বীরাঃ সংভূতা ভুবি দানবাঃ
240.11
ভীষ্মদ্রোণকৃপাদীংশ্চ প্রবেক্ষ্যন্ত্যপরেঽসুরাঃ
যৈরাবিষ্টা ঘৃণাং ত্যক্ত্বা যোত্স্যন্তে তব বৈরিভিঃ
240.12
নৈব পুত্রান্ন চ ভ্রাতৄন্ন পিতৄন্ন চ বান্ধবান্
নৈব শিষ্যান্ন চ জ্ঞাতীন্ন বালান্স্থবিরান্ন চ
240.13
যুধি সংপ্রহরিষ্যন্তো মোক্ষ্যন্তি কুরুসত্তম
নিঃস্নেহা দানবাবিষ্টাঃ সমাক্রান্তেঽন্তরাত্মনি
240.14
প্রহরিষ্যন্তি বন্ধুভ্যঃ স্নেহমুত্সৃজ্য দূরতঃ
হৃষ্টাঃ পুরুষশার্দূলাঃ কলুষীকৃতমানসাঃ
অবিজ্ঞানবিমূঢাশ্চ দৈবাচ্চ বিধিনির্মিতাৎ
240.15
ব্যাভাষমাণাশ্চান্যোন্যং ন মে জীবন্বিমোক্ষ্যসে
সর্বশস্ত্রাস্ত্রমোক্ষেণ পৌরুষে সমবস্থিতাঃ
শ্লাঘমানাঃ কুরুশ্রেষ্ঠ করিষ্যন্তি জনক্ষয়ম্
240.16
তেঽপি শক্ত্যা মহাত্মানঃ প্রতিয়োত্স্যন্তি পাণ্ডবাঃ
বধং চৈষাং করিষ্যন্তি দৈবয়ুক্তা মহাবলাঃ
240.17
দৈত্যরক্ষোগণাশ্চাপি সংভূতাঃ ক্ষত্রয়োনিষু
যোত্স্যন্তি যুধি বিক্রম্য শত্রুভিস্তব পার্থিব
গদাভির্মুসলৈঃ খড্গৈঃ শস্ত্রৈরুচ্চাবচৈস্তথা
240.18
যচ্চ তেঽন্তর্গতং বীর ভয়মর্জুনসংভবম্
তত্রাপি বিহিতোঽস্মাভির্বধোপায়োঽর্জুনস্য বৈ
240.19
হতস্য নরকস্যাত্মা কর্ণমূর্তিমুপাশ্রিতঃ
তদ্বৈরং সংস্মরন্বীর যোত্স্যতে কেশবার্জুনৌ
240.20
স তে বিক্রমশৌণ্ডীরো রণে পার্থং বিজেষ্যতি
কর্ণঃ প্রহরতাং শ্রেষ্ঠঃ সর্বাংশ্চারীন্মহারথঃ
240.21
জ্ঞাত্বৈতচ্ছদ্মনা বজ্রী রক্ষার্থং সব্যসাচিনঃ
কুণ্ডলে কবচং চৈব কর্ণস্যাপহরিষ্যতি
240.22
তস্মাদস্মাভিরপ্যত্র দৈত্যাঃ শতসহস্রশঃ
নিয়ুক্তা রাক্ষসাশ্চৈব যে তে সংশপ্তকা ইতি
প্রখ্যাতাস্তেঽর্জুনং বীরং নিহনিষ্যন্তি মা শুচঃ
240.23
অসপত্না ত্বয়া হীয়ং ভোক্তব্যা বসুধা নৃপ
মা বিষাদং নয়স্বাস্মান্নৈতত্ত্বয্যুপপদ্যতে
বিনষ্টে ত্বয়ি চাস্মাকং পক্ষো হীয়েত কৌরব
240.24
গচ্ছ বীর ন তে বুদ্ধিরন্যা কার্যা কথংচন
ত্বমস্মাকং গতির্নিত্যং দেবতানাং চ পাণ্ডবাঃ
240.25
বৈশংপায়ন উবাচ
এবমুক্ত্বা পরিষ্বজ্য দৈত্যাস্তং রাজকুঞ্জরম্
সমাশ্বাস্য চ দুর্ধর্ষং পুত্রবদ্দানবর্ষভাঃ
240.26
স্থিরাং কৃত্বা বুদ্ধিমস্য প্রিয়াণ্যুক্ত্বা চ ভারত
গম্যতামিত্যনুজ্ঞায় জয়মাপ্নুহি চেত্যথ
240.27
তৈর্বিসৃষ্টং মহাবাহুং কৃত্যা সৈবানয়ত্পুনঃ
তমেব দেশং যত্রাসৌ তদা প্রায়মুপাবিশৎ
240.28
প্রতিনিক্ষিপ্য তং বীরং কৃত্যা সমভিপূজ্য চ
অনুজ্ঞাতা চ রাজ্ঞা সা তত্রৈবান্তরধীয়ত
240.29
গতায়ামথ তস্যাং তু রাজা দুর্যোধনস্তদা
স্বপ্নভূতমিদং সর্বমচিন্তয়ত ভারত
বিজেষ্যামি রণে পাণ্ডূনিতি তস্যাভবন্মতিঃ
240.30
কর্ণং সংশপ্তকাংশ্চৈব পার্থস্যামিত্রঘাতিনঃ
অমন্যত বধে যুক্তান্সমর্থাংশ্চ সুয়োধনঃ
240.31
এবমাশা দৃঢা তস্য ধার্তরাষ্ট্রস্য দুর্মতেঃ
বিনির্জয়ে পাণ্ডবানামভবদ্ভরতর্ষভ
240.32
কর্ণোঽপ্যাবিষ্টচিত্তাত্মা নরকস্যান্তরাত্মনা
অর্জুনস্য বধে ক্রূরামকরোত্স মতিং তদা
240.33
সংশপ্তকাশ্চ তে বীরা রাক্ষসাবিষ্টচেতসঃ
রজস্তমোভ্যামাক্রান্তাঃ ফল্গুনস্য বধৈষিণঃ
240.34
ভীষ্মদ্রোণকৃপাদ্যাশ্চ দানবাক্রান্তচেতসঃ
ন তথা পাণ্ডুপুত্রাণাং স্নেহবন্তো বিশাং পতে
ন চাচচক্ষে কস্মৈচিদেতদ্রাজা সুয়োধনঃ
240.35
দুর্যোধনং নিশান্তে চ কর্ণো বৈকর্তনোঽব্রবীৎ
স্ময়ন্নিবাঞ্জলিং কৃত্বা পার্থিবং হেতুমদ্বচঃ
240.36
ন মৃতো জয়তে শত্রূঞ্জীবন্ভদ্রাণি পশ্যতি
মৃতস্য ভদ্রাণি কুতঃ কৌরবেয় কুতো জয়ঃ
ন কালোঽদ্য বিষাদস্য ভয়স্য মরণস্য বা
240.37
পরিষ্বজ্যাব্রবীচ্চৈনং ভুজাভ্যাং স মহাভুজঃ
উত্তিষ্ঠ রাজন্কিং শেষে কস্মাচ্ছোচসি শত্রুহন্
শত্রূন্প্রতাপ্য বীর্যেণ স কথং মর্তুমিচ্ছসি
240.38
অথ বা তে ভয়ং জাতং দৃষ্ট্বার্জুনপরাক্রমম্
সত্যং তে প্রতিজানামি বধিষ্যামি রণেঽর্জুনম্
240.39
গতে ত্রয়োদশে বর্ষে সত্যেনায়ুধমালভে
আনয়িষ্যাম্যহং পার্থান্বশং তব জনাধিপ
240.40
এবমুক্তস্তু কর্ণেন দৈত্যানাং বচনাত্তথা
প্রণিপাতেন চান্যেষামুদতিষ্ঠত্সুয়োধনঃ
দৈত্যানাং তদ্বচঃ শ্রুত্বা হৃদি কৃত্বা স্থিরাং মতিম্
240.41
ততো মনুজশার্দূলো যোজয়ামাস বাহিনীম্
রথনাগাশ্বকলিলাং পদাতিজনসংকুলাম্
240.42
গঙ্গৌঘপ্রতিমা রাজন্প্রয়াতা সা মহাচমূঃ
শ্বেতচ্ছত্রৈঃ পতাকাভিশ্চামরৈশ্চ সুপাণ্ডুরৈঃ
240.43
রথৈর্নাগৈঃ পদাতৈশ্চ শুশুভেঽতীব সংকুলা
ব্যপেতাভ্রঘনে কালে দ্যৌরিবাব্যক্তশারদী
240.44
জয়াশীর্ভির্দ্বিজেন্দ্রৈস্তু স্তূয়মানোঽধিরাজবৎ
গৃহ্ণন্নঞ্জলিমালাশ্চ ধার্তরাষ্ট্রো জনাধিপঃ
240.45
সুয়োধনো যয়াবগ্রে শ্রিয়া পরময়া জ্বলন্
কর্ণেন সার্ধং রাজেন্দ্র সৌবলেন চ দেবিনা
240.46
দুঃশাসনাদয়শ্চাস্য ভ্রাতরঃ সর্ব এব তে
ভূরিশ্রবাঃ সোমদত্তো মহারাজশ্চ বাহ্লিকঃ
240.47
রথৈর্নানাবিধাকারৈর্হয়ৈর্গজবরৈস্তথা
প্রয়ান্তং নৃপসিংহং তমনুজগ্মুঃ কুরূদ্বহাঃ
কালেনাল্পেন রাজংস্তে বিবিশুঃ স্বপুরং তদা