Utshovঅধ্যায় 239
239.1
বৈশংপায়ন উবাচ
প্রায়োপবিষ্টং রাজানং দুর্যোধনমমর্ষণম্
উবাচ সান্ত্বয়ন্রাজঞ্শকুনিঃ সৌবলস্তদা
239.2
সম্যগুক্তং হি কর্ণেন তচ্ছ্রুতং কৌরব ত্বয়া
ময়াহৃতাং শ্রিয়ং স্ফীতাং মোহাত্সমপহায় কিম্
ত্বমবুদ্ধ্যা নৃপবর প্রাণানুত্স্রষ্টুমিচ্ছসি
239.3
অদ্য চাপ্যবগচ্ছামি ন বৃদ্ধাঃ সেবিতাস্ত্বয়া
যঃ সমুত্পতিতং হর্ষং দৈন্যং বা ন নিয়চ্ছতি
স নশ্যতি শ্রিয়ং প্রাপ্য পাত্রমামমিবাম্ভসি
239.4
অতিভীরুমতিক্লীবং দীর্ঘসূত্রং প্রমাদিনম্
ব্যসনাদ্বিষয়াক্রান্তং ন ভজন্তি নৃপং শ্রিয়ঃ
239.5
সত্কৃতস্য হি তে শোকো বিপরীতে কথং ভবেৎ
মা কৃতং শোভনং পার্থৈঃ শোকমালম্ব্য নাশয়
239.6
যত্র হর্ষস্ত্বয়া কার্যঃ সত্কর্তব্যাশ্চ পাণ্ডবাঃ
তত্র শোচসি রাজেন্দ্র বিপরীতমিদং তব
239.7
প্রসীদ মা ত্যজাত্মানং তুষ্টশ্চ সুকৃতং স্মর
প্রয়চ্ছ রাজ্যং পার্থানাং যশো ধর্মমবাপ্নুহি
239.8
ক্রিয়ামেতাং সমাজ্ঞায় কৃতঘ্নো ন ভবিষ্যসি
সৌভ্রাত্রং পাণ্ডবৈঃ কৃত্বা সমবস্থাপ্য চৈব তান্
পিত্র্যং রাজ্যং প্রয়চ্ছৈষাং ততঃ সুখমবাপ্নুহি
239.9
শকুনেস্তু বচঃ শ্রুত্বা দুঃশাসনমবেক্ষ্য চ
পাদয়োঃ পতিতং বীরং বিক্লবং ভ্রাতৃসৌহৃদাৎ
239.10
বাহুভ্যাং সাধুজাতাভ্যাং দুঃশাসনমরিংদমম্
উত্থাপ্য সংপরিষ্বজ্য প্রীত্যাজিঘ্রত মূর্ধনি
239.11
কর্ণসৌবলয়োশ্চাপি সংস্মৃত্য বচনান্যসৌ
নির্বেদং পরমং গত্বা রাজা দুর্যোধনস্তদা
ব্রীডয়াভিপরীতাত্মা নৈরাশ্যমগমত্পরম্
239.12
সুহৃদাং চৈব তচ্ছ্রুত্বা সমন্যুরিদমব্রবীৎ
ন ধর্মধনসৌখ্যেন নৈশ্বর্যেণ ন চাজ্ঞয়া
নৈব ভোগৈশ্চ মে কার্যং মা বিহন্যত গচ্ছত
239.13
নিশ্চিতেয়ং মম মতিঃ স্থিতা প্রায়োপবেশনে
গচ্ছধ্বং নগরং সর্বে পূজ্যাশ্চ গুরবো মম
239.14
ত এবমুক্তাঃ প্রত্যূচূ রাজানমরিমর্দনম্
যা গতিস্তব রাজেন্দ্র সাস্মাকমপি ভারত
কথং বা সংপ্রবেক্ষ্যামস্ত্বদ্বিহীনাঃ পুরং বয়ম্
239.15
স সুহৃদ্ভিরমাত্যৈশ্চ ভ্রাতৃভিঃ স্বজনেন চ
বহুপ্রকারমপ্যুক্তো নিশ্চয়ান্ন ব্যচাল্যত
239.16
দর্ভপ্রস্তরমাস্তীর্য নিশ্চয়াদ্ধৃতরাষ্ট্রজঃ
সংস্পৃশ্যাপঃ শুচির্ভূত্বা ভূতলং সমুপাশ্রিতঃ
239.17
কুশচীরাম্বরধরঃ পরং নিয়মমাস্থিতঃ
বাগ্যতো রাজশার্দূলঃ স স্বর্গগতিকাঙ্ক্ষয়া
মনসোপচিতিং কৃত্বা নিরস্য চ বহিষ্ক্রিয়াঃ
239.18
অথ তং নিশ্চয়ং তস্য বুদ্ধ্বা দৈতেয়দানবাঃ
পাতালবাসিনো রৌদ্রাঃ পূর্বং দেবৈর্বিনির্জিতাঃ
239.19
তে স্বপক্ষক্ষয়ং তং তু জ্ঞাত্বা দুর্যোধনস্য বৈ
আহ্বানায় তদা চক্রুঃ কর্ম বৈতানসংভবম্
239.20
বৃহস্পত্যুশনোক্তৈশ্চ মন্ত্রৈর্মন্ত্রবিশারদাঃ
অথর্ববেদপ্রোক্তৈশ্চ যাশ্চোপনিষদি ক্রিয়াঃ
মন্ত্রজপ্যসমায়ুক্তাস্তাস্তদা সমবর্তয়ন্
239.21
জুহ্বত্যগ্নৌ হবিঃ ক্ষীরং মন্ত্রবত্সুসমাহিতাঃ
ব্রাহ্মণা বেদবেদাঙ্গপারগাঃ সুদৃঢব্রতাঃ
239.22
কর্মসিদ্ধৌ তদা তত্র জৃম্ভমাণা মহাদ্ভুতা
কৃত্যা সমুত্থিতা রাজন্কিং করোমীতি চাব্রবীৎ
239.23
আহুর্দৈত্যাশ্চ তাং তত্র সুপ্রীতেনান্তরাত্মনা
প্রায়োপবিষ্টং রাজানং ধার্তরাষ্ট্রমিহানয়
239.24
তথেতি চ প্রতিশ্রুত্য সা কৃত্যা প্রয়য়ৌ তদা
নিমেষাদগমচ্চাপি যত্র রাজা সুয়োধনঃ
239.25
সমাদায় চ রাজানং প্রবিবেশ রসাতলম্
দানবানাং মুহূর্তাচ্চ তমানীতং ন্যবেদয়ৎ
239.26
তমানীতং নৃপং দৃষ্ট্বা রাত্রৌ সংহত্য দানবাঃ
প্রহৃষ্টমনসঃ সর্বে কিংচিদুত্ফুল্ললোচনাঃ
সাভিমানমিদং বাক্যং দুর্যোধনমথাব্রুবন্