Utshovঅধ্যায় 238
238.1
দুর্যোধন উবাচ
চিত্রসেনং সমাগম্য প্রহসন্নর্জুনস্তদা
ইদং বচনমক্লীবমব্রবীত্পরবীরহা
238.2
ভ্রাতৄনর্হসি নো বীর মোক্তুং গন্ধর্বসত্তম
অনর্হা ধর্ষণং হীমে জীবমানেষু পাণ্ডুষু
238.3
এবমুক্তস্তু গন্ধর্বঃ পাণ্ডবেন মহাত্মনা
উবাচ যত্কর্ণ বয়ং মন্ত্রয়ন্তো বিনির্গতাঃ
দ্রষ্টারঃ স্ম সুখাদ্ধীনান্সদারান্পাণ্ডবানিতি
238.4
তস্মিন্নুচ্চার্যমাণে তু গন্ধর্বেণ বচস্যথ
ভূমের্বিবরমন্বৈচ্ছং প্রবেষ্টুং ব্রীডয়ান্বিতঃ
238.5
যুধিষ্ঠিরমথাগম্য গন্ধর্বাঃ সহ পাণ্ডবৈঃ
অস্মদ্দুর্মন্ত্রিতং তস্মৈ বদ্ধাংশ্চাস্মান্ন্যবেদয়ন্
238.6
স্ত্রীসমক্ষমহং দীনো বদ্ধঃ শত্রুবশং গতঃ
যুধিষ্ঠিরস্যোপহৃতঃ কিং নু দুঃখমতঃ পরম্
238.7
যে মে নিরাকৃতা নিত্যং রিপুর্যেষামহং সদা
তৈর্মোক্ষিতোঽহং দুর্বুদ্ধির্দত্তং তৈর্জীবিতং চ মে
238.8
প্রাপ্তঃ স্যাং যদ্যহং বীর বধং তস্মিন্মহারণে
শ্রেয়স্তদ্ভবিতা মহ্যমেবংভূতং ন জীবিতম্
238.9
ভবেদ্যশঃ পৃথিব্যাং মে খ্যাতং গন্ধর্বতো বধাৎ
প্রাপ্তাশ্চ লোকাঃ পুণ্যাঃ স্যুর্মহেন্দ্রসদনেঽক্ষয়াঃ
238.10
যত্ত্বদ্য মে ব্যবসিতং তচ্ছৃণুধ্বং নরর্ষভাঃ
ইহ প্রায়মুপাসিষ্যে যূয়ং ব্রজত বৈ গৃহান্
ভ্রাতরশ্চৈব মে সর্বে প্রয়ান্ত্বদ্য পুরং প্রতি
238.11
কর্ণপ্রভৃতয়শ্চৈব সুহৃদো বান্ধবাশ্চ যে
দুঃশাসনং পুরস্কৃত্য প্রয়ান্ত্বদ্য পুরং প্রতি
238.12
ন হ্যহং প্রতিয়াস্যামি পুরং শত্রুনিরাকৃতঃ
শত্রুমানাপহো ভূত্বা সুহৃদাং মানকৃত্তথা
238.13
স সুহৃচ্ছোকদো ভূত্বা শত্রূণাং হর্ষবর্ধনঃ
বারণাহ্বয়মাসাদ্য কিং বক্ষ্যামি জনাধিপম্
238.14
ভীষ্মো দ্রোণঃ কৃপো দ্রৌণির্বিদুরঃ সংজয়স্তথা
বাহ্লীকঃ সোমদত্তশ্চ যে চান্যে বৃদ্ধসংমতাঃ
238.15
ব্রাহ্মণাঃ শ্রেণিমুখ্যাশ্চ তথোদাসীনবৃত্তয়ঃ
কিং মাং বক্ষ্যন্তি কিং চাপি প্রতিবক্ষ্যামি তানহম্
238.16
রিপূণাং শিরসি স্থিত্বা তথা বিক্রম্য চোরসি
আত্মদোষাত্পরিভ্রষ্টঃ কথং বক্ষ্যামি তানহম্
238.17
দুর্বিনীতাঃ শ্রিয়ং প্রাপ্য বিদ্যামৈশ্বর্যমেব চ
তিষ্ঠন্তি ন চিরং ভদ্রে যথাহং মদগর্বিতঃ
238.18
অহো বত যথেদং মে কষ্টং দুশ্চরিতং কৃতম্
স্বয়ং দুর্বুদ্ধিনা মোহাদ্যেন প্রাপ্তোঽস্মি সংশয়ম্
238.19
তস্মাত্প্রায়মুপাসিষ্যে ন হি শক্ষ্যামি জীবিতুম্
চেতয়ানো হি কো জীবেত্কৃচ্ছ্রাচ্ছত্রুভিরুদ্ধৃতঃ
238.20
শত্রুভিশ্চাবহসিতো মানী পৌরুষবর্জিতঃ
পাণ্ডবৈর্বিক্রমাঢ্যৈশ্চ সাবমানমবেক্ষিতঃ
238.21
বৈশংপায়ন উবাচ
এবং চিন্তাপরিগতো দুঃশাসনমথাব্রবীৎ
দুঃশাসন নিবোধেদং বচনং মম ভারত
238.22
প্রতীচ্ছ ত্বং ময়া দত্তমভিষেকং নৃপো ভব
প্রশাধি পৃথিবীং স্ফীতাং কর্ণসৌবলপালিতাম্
238.23
ভ্রাতৄন্পালয় বিস্রব্ধং মরুতো বৃত্রহা যথা
বান্ধবাস্ত্বোপজীবন্তু দেবা ইব শতক্রতুম্
238.24
ব্রাহ্মণেষু সদা বৃত্তিং কুর্বীথাশ্চাপ্রমাদতঃ
বন্ধূনাং সুহৃদাং চৈব ভবেথাস্ত্বং গতিঃ সদা
238.25
জ্ঞাতীংশ্চাপ্যনুপশ্যেথা বিষ্ণুর্দেবগণানিব
গুরবঃ পালনীয়াস্তে গচ্ছ পালয় মেদিনীম্
238.26
নন্দয়ন্সুহৃদঃ সর্বাঞ্শাত্রবাংশ্চাবভর্ত্সয়ন্
কণ্ঠে চৈনং পরিষ্বজ্য গম্যতামিত্যুবাচ হ
238.27
তস্য তদ্বচনং শ্রুত্বা দীনো দুঃশাসনোঽব্রবীৎ
অশ্রুকণ্ঠঃ সুদুঃখার্তঃ প্রাঞ্জলিঃ প্রণিপত্য চ
সগদ্গদমিদং বাক্যং ভ্রাতরং জ্যেষ্ঠমাত্মনঃ
238.28
প্রসীদেত্যপতদ্ভূমৌ দূয়মানেন চেতসা
দুঃখিতঃ পাদয়োস্তস্য নেত্রজং জলমুত্সৃজন্
238.29
উক্তবাংশ্চ নরব্যাঘ্রো নৈতদেবং ভবিষ্যতি
বিদীর্যেত্সনগা ভূমির্দ্যৌশ্চাপি শকলীভবেৎ
রবিরাত্মপ্রভাং জহ্যাত্সোমঃ শীতাংশুতাং ত্যজেৎ
238.30
বায়ুঃ শৈঘ্র্যমথো জহ্যাদ্ধিমবাংশ্চ পরিব্রজেৎ
শুষ্যেত্তোয়ং সমুদ্রেষু বহ্নিরপ্যুষ্ণতাং ত্যজেৎ
238.31
ন চাহং ত্বদৃতে রাজন্প্রশাসেয়ং বসুংধরাম্
পুনঃ পুনঃ প্রসীদেতি বাক্যং চেদমুবাচ হ
ত্বমেব নঃ কুলে রাজা ভবিষ্যসি শতং সমাঃ
238.32
এবমুক্ত্বা স রাজেন্দ্র সস্বনং প্ররুরোদ হ
পাদৌ সংগৃহ্য মানার্হৌ ভ্রাতুর্জ্যেষ্ঠস্য ভারত
238.33
তথা তৌ দুঃখিতৌ দৃষ্ট্বা দুঃশাসনসুয়োধনৌ
অভিগম্য ব্যথাবিষ্টঃ কর্ণস্তৌ প্রত্যভাষত
238.34
বিষীদথঃ কিং কৌরব্যৌ বালিশ্যাত্প্রাকৃতাবিব
ন শোকঃ শোচমানস্য বিনিবর্তেত কস্যচিৎ
238.35
যদা চ শোচতঃ শোকো ব্যসনং নাপকর্ষতি
সামর্থ্যং কিং ত্বতঃ শোকে শোচমানৌ প্রপশ্যথঃ
ধৃতিং গৃহ্ণীত মা শত্রূঞ্শোচন্তৌ নন্দয়িষ্যথঃ
238.36
কর্তব্যং হি কৃতং রাজন্পাণ্ডবৈস্তব মোক্ষণম্
নিত্যমেব প্রিয়ং কার্যং রাজ্ঞো বিষয়বাসিভিঃ
পাল্যমানাস্ত্বয়া তে হি নিবসন্তি গতজ্বরাঃ
238.37
নার্হস্যেবংগতে মন্যুং কর্তুং প্রাকৃতবদ্যথা
বিষণ্ণাস্তব সোদর্যাস্ত্বয়ি প্রায়ং সমাস্থিতে
উত্তিষ্ঠ ব্রজ ভদ্রং তে সমাশ্বাসয় সোদরান্
238.38
রাজন্নদ্যাবগচ্ছামি তবেহ লঘুসত্ত্বতাম্
কিমত্র চিত্রং যদ্বীর মোক্ষিতঃ পাণ্ডবৈরসি
সদ্যো বশং সমাপন্নঃ শত্রূণাং শত্রুকর্শন
238.39
সেনাজীবৈশ্চ কৌরব্য তথা বিষয়বাসিভিঃ
অজ্ঞাতৈর্যদি বা জ্ঞাতৈঃ কর্তব্যং নৃপতেঃ প্রিয়ম্
238.40
প্রায়ঃ প্রধানাঃ পুরুষাঃ ক্ষোভয়ন্ত্যরিবাহিনীম্
নিগৃহ্যন্তে চ যুদ্ধেষু মোক্ষ্যন্তে চ স্বসৈনিকৈঃ
238.41
সেনাজীবাশ্চ যে রাজ্ঞাং বিষয়ে সন্তি মানবাঃ
তৈঃ সংগম্য নৃপার্থায় যতিতব্যং যথাতথম্
238.42
যদ্যেবং পাণ্ডবৈ রাজন্ভবদ্বিষয়বাসিভিঃ
যদৃচ্ছয়া মোক্ষিতোঽদ্য তত্র কা পরিদেবনা
238.43
ন চৈতত্সাধু যদ্রাজন্পাণ্ডবাস্ত্বাং নৃপোত্তম
স্বসেনয়া সংপ্রয়ান্তং নানুয়ান্তি স্ম পৃষ্ঠতঃ
238.44
শূরাশ্চ বলবন্তশ্চ সংয়ুগেষ্বপলায়িনঃ
ভবতস্তে সভায়াং বৈ প্রেষ্যতাং পূর্বমাগতাঃ
238.45
পাণ্ডবেয়ানি রত্নানি ত্বমদ্যাপ্যুপভুঞ্জসে
সত্ত্বস্থান্পাণ্ডবান্পশ্য ন তে প্রায়মুপাবিশন্
উত্তিষ্ঠ রাজন্ভদ্রং তে ন চিন্তাং কর্তুমর্হসি
238.46
অবশ্যমেব নৃপতে রাজ্ঞো বিষয়বাসিভিঃ
প্রিয়াণ্যাচরিতব্যানি তত্র কা পরিদেবনা
238.47
মদ্বাক্যমেতদ্রাজেন্দ্র যদ্যেবং ন করিষ্যসি
স্থাস্যামীহ ভবত্পাদৌ শুশ্রূষন্নরিমর্দন
238.48
নোত্সহে জীবিতুমহং ত্বদ্বিহীনো নরর্ষভ
প্রায়োপবিষ্টস্তু নৃপ রাজ্ঞাং হাস্যো ভবিষ্যসি
238.49
বৈশংপায়ন উবাচ
এবমুক্তস্তু কর্ণেন রাজা দুর্যোধনস্তদা
নৈবোত্থাতুং মনশ্চক্রে স্বর্গায় কৃতনিশ্চয়ঃ