অধ্যায় 237

237.1

দুর্যোধন উবাচ
অজানতস্তে রাধেয় নাভ্যসূয়াম্যহং বচঃ
জানাসি ত্বং জিতাঞ্শত্রূন্গন্ধর্বাংস্তেজসা ময়া

আয়োধিতাস্তু গন্ধর্বাঃ সুচিরং সোদরৈর্মম
ময়া সহ মহাবাহো কৃতশ্চোভয়তঃ ক্ষয়ঃ

মায়াধিকাস্ত্বয়ুধ্যন্ত যদা শূরা বিয়দ্গতাঃ
তদা নো নসমং যুদ্ধমভবত্সহ খেচরৈঃ

পরাজয়ং চ প্রাপ্তাঃ স্ম রণে বন্ধনমেব চ
সভৃত্যামাত্যপুত্রাশ্চ সদারধনবাহনাঃ
উচ্চৈরাকাশমার্গেণ হ্রিয়ামস্তৈঃ সুদুঃখিতাঃ

অথ নঃ সৈনিকাঃ কেচিদমাত্যাশ্চ মহারথান্
উপগম্যাব্রুবন্দীনাঃ পাণ্ডবাঞ্শরণপ্রদান্

এষ দুর্যোধনো রাজা ধার্তরাষ্ট্রঃ সহানুজঃ
সামাত্যদারো হ্রিয়তে গন্ধর্বৈর্দিবমাস্থিতৈঃ

তং মোক্ষয়ত ভদ্রং বঃ সহদারং নরাধিপম্
পরামর্শো মা ভবিষ্যত্কুরুদারেষু সর্বশঃ

এবমুক্তে তু ধর্মাত্মা জ্যেষ্ঠঃ পাণ্ডুসুতস্তদা
প্রসাদ্য সোদরান্সর্বানাজ্ঞাপয়ত মোক্ষণে

অথাগম্য তমুদ্দেশং পাণ্ডবাঃ পুরুষর্ষভাঃ
সান্ত্বপূর্বময়াচন্ত শক্তাঃ সন্তো মহারথাঃ

যদা চাস্মান্ন মুমুচুর্গন্ধর্বাঃ সান্ত্বিতা অপি
ততোঽর্জুনশ্চ ভীমশ্চ যমজৌ চ বলোত্কটৌ
মুমুচুঃ শরবর্ষাণি গন্ধর্বান্প্রত্যনেকশঃ

অথ সর্বে রণং মুক্ত্বা প্রয়াতাঃ খচরা দিবম্
অস্মানেবাভিকর্ষন্তো দীনান্মুদিতমানসাঃ

ততঃ সমন্তাত্পশ্যামি শরজালেন বেষ্টিতম্
অমানুষাণি চাস্ত্রাণি প্রয়ুঞ্জানং ধনংজয়ম্

সমাবৃতা দিশো দৃষ্ট্বা পাণ্ডবেন শিতৈঃ শরৈঃ
ধনংজয়সখাত্মানং দর্শয়ামাস বৈ তদা

চিত্রসেনঃ পাণ্ডবেন সমাশ্লিষ্য পরংতপঃ
কুশলং পরিপপ্রচ্ছ তৈঃ পৃষ্টশ্চাপ্যনাময়ম্

তে সমেত্য তথান্যোন্যং সংনাহান্বিপ্রমুচ্য চ
একীভূতাস্ততো বীরা গন্ধর্বাঃ সহ পাণ্ডবৈঃ
অপূজয়েতামন্যোন্যং চিত্রসেনধনংজয়ৌ