অধ্যায় 236

236.1

জনমেজয় উবাচ
শত্রুভির্জিতবদ্ধস্য পাণ্ডবৈশ্চ মহাত্মভিঃ
মোক্ষিতস্য যুধা পশ্চান্মানস্থস্য দুরাত্মনঃ

কত্থনস্যাবলিপ্তস্য গর্বিতস্য চ নিত্যশঃ
সদা চ পৌরুষৌদার্যৈঃ পাণ্ডবানবমন্যতঃ

দুর্যোধনস্য পাপস্য নিত্যাহংকারবাদিনঃ
প্রবেশো হাস্তিনপুরে দুষ্করঃ প্রতিভাতি মে

তস্য লজ্জান্বিতস্যৈব শোকব্যাকুলচেতসঃ
প্রবেশং বিস্তরেণ ত্বং বৈশংপায়ন কীর্তয়

বৈশংপায়ন উবাচ
ধর্মরাজনিসৃষ্টস্তু ধার্তরাষ্ট্রঃ সুয়োধনঃ
লজ্জয়াধোমুখঃ সীদন্নুপাসর্পত্সুদুঃখিতঃ

স্বপুরং প্রয়য়ৌ রাজা চতুরঙ্গবলানুগঃ
শোকোপহতয়া বুদ্ধ্যা চিন্তয়ানঃ পরাভবম্

বিমুচ্য পথি যানানি দেশে সুয়বসোদকে
সংনিবিষ্টঃ শুভে রম্যে ভূমিভাগে যথেপ্সিতম্
হস্ত্যশ্বরথপাদাতং যথাস্থানং ন্যবেশয়ৎ

অথোপবিষ্টং রাজানং পর্যঙ্কে জ্বলনপ্রভে
উপপ্লুতং যথা সোমং রাহুণা রাত্রিসংক্ষয়ে
উপগম্যাব্রবীত্কর্ণো দুর্যোধনমিদং তদা

দিষ্ট্যা জীবসি গান্ধারে দিষ্ট্যা নঃ সংগমঃ পুনঃ
দিষ্ট্যা ত্বয়া জিতাশ্চৈব গন্ধর্বাঃ কামরূপিণঃ

দিষ্ট্যা সমগ্রান্পশ্যামি ভ্রাতৄংস্তে কুরুনন্দন
বিজিগীষূন্রণান্মুক্তান্নির্জিতারীন্মহারথান্

অহং ত্বভিদ্রুতঃ সর্বৈর্গন্ধর্বৈঃ পশ্যতস্তব
নাশক্নুবং স্থাপয়িতুং দীর্যমাণাং স্ববাহিনীম্

শরক্ষতাঙ্গশ্চ ভৃশং ব্যপয়াতোঽভিপীডিতঃ
ইদং ত্বত্যদ্ভুতং মন্যে যদ্যুষ্মানিহ ভারত

অরিষ্টানক্ষতাংশ্চাপি সদারধনবাহনান্
বিমুক্তান্সংপ্রপশ্যামি তস্মাদ্যুদ্ধাদমানুষাৎ

নৈতস্য কর্তা লোকেঽস্মিন্পুমান্বিদ্যেত ভারত
যত্কৃতং তে মহারাজ সহ ভ্রাতৃভিরাহবে

এবমুক্তস্তু কর্ণেন রাজা দুর্যোধনস্তদা
উবাচাবাক্শিরা রাজন্বাষ্পগদ্গদয়া গিরা