অধ্যায় 235

235.1

বৈশংপায়ন উবাচ
ততোঽর্জুনশ্চিত্রসেনং প্রহসন্নিদমব্রবীৎ
মধ্যে গন্ধর্বসৈন্যানাং মহেষ্বাসো মহাদ্যুতিঃ

235.2

কিং তে ব্যবসিতং বীর কৌরবাণাং বিনিগ্রহে
কিমর্থং চ সদারোঽয়ং নিগৃহীতঃ সুয়োধনঃ

235.3

চিত্রসেন উবাচ
বিদিতোঽয়মভিপ্রায়স্তত্রস্থেন মহাত্মনা
দুর্যোধনস্য পাপস্য কর্ণস্য চ ধনংজয়

235.4

বনস্থান্ভবতো জ্ঞাত্বা ক্লিশ্যমানাননর্হবৎ
ইমেঽবহসিতুং প্রাপ্তা দ্রৌপদীং চ যশস্বিনীম্

235.5

জ্ঞাত্বা চিকীর্ষিতং চৈষাং মামুবাচ সুরেশ্বরঃ
গচ্ছ দুর্যোধনং বদ্ধ্বা সামাত্যং ত্বমিহানয়

235.6

ধনংজয়শ্চ তে রক্ষ্যঃ সহ ভ্রাতৃভিরাহবে
স হি প্রিয়ঃ সখা তুভ্যং শিষ্যশ্চ তব পাণ্ডবঃ

235.7

বচনাদ্দেবরাজস্য ততোঽস্মীহাগতো দ্রুতম্
অয়ং দুরাত্মা বদ্ধশ্চ গমিষ্যামি সুরালয়ম্

235.8

অর্জুন উবাচ
উত্সৃজ্যতাং চিত্রসেন ভ্রাতাস্মাকং সুয়োধনঃ
ধর্মরাজস্য সংদেশান্মম চেদিচ্ছসি প্রিয়ম্

235.9

চিত্রসেন উবাচ
পাপোঽয়ং নিত্যসংদুষ্টো ন বিমোক্ষণমর্হতি
প্রলব্ধা ধর্মরাজস্য কৃষ্ণায়াশ্চ ধনংজয়

235.10

নেদং চিকীর্ষিতং তস্য কুন্তীপুত্রো মহাব্রতঃ
জানাতি ধর্মরাজো হি শ্রুত্বা কুরু যথেচ্ছসি

235.11

বৈশংপায়ন উবাচ
তে সর্ব এব রাজানমভিজগ্মুর্যুধিষ্ঠিরম্
অভিগম্য চ তত্সর্বং শশংসুস্তস্য দুষ্কৃতম্

235.12

অজাতশত্রুস্তচ্ছ্রুত্বা গন্ধর্বস্য বচস্তদা
মোক্ষয়ামাস তান্সর্বান্গন্ধর্বান্প্রশশংস চ

235.13

দিষ্ট্যা ভবদ্ভির্বলিভিঃ শক্তৈঃ সর্বৈর্ন হিংসিতঃ
দুর্বৃত্তো ধার্তরাষ্ট্রোঽয়ং সামাত্যজ্ঞাতিবান্ধবঃ

235.14

উপকারো মহাংস্তাত কৃতোঽয়ং মম খেচরাঃ
কুলং ন পরিভূতং মে মোক্ষেণাস্য দুরাত্মনঃ

235.15

আজ্ঞাপয়ধ্বমিষ্টানি প্রীয়ামো দর্শনেন বঃ
প্রাপ্য সর্বানভিপ্রায়াংস্ততো ব্রজত মাচিরম্

235.16

অনুজ্ঞাতাস্তু গন্ধর্বাঃ পাণ্ডুপুত্রেণ ধীমতা
সহাপ্সরোভিঃ সংহৃষ্টাশ্চিত্রসেনমুখা যয়ুঃ

235.17

দেবরাডপি গন্ধর্বান্মৃতাংস্তান্সমজীবয়ৎ
দিব্যেনামৃতবর্ষেণ যে হতাঃ কৌরবৈর্যুধি

235.18

জ্ঞাতীংস্তানবমুচ্যাথ রাজদারাংশ্চ সর্বশঃ
কৃত্বা চ দুষ্করং কর্ম প্রীতিয়ুক্তাশ্চ পাণ্ডবাঃ

235.19

সস্ত্রীকুমারৈঃ কুরুভিঃ পূজ্যমানা মহারথাঃ
বভ্রাজিরে মহাত্মানঃ কুরুমধ্যে যথাগ্নয়ঃ

235.20

ততো দুর্যোধনং মুচ্য ভ্রাতৃভিঃ সহিতং তদা
যুধিষ্ঠিরঃ সপ্রণয়মিদং বচনমব্রবীৎ

235.21

মা স্ম তাত পুনঃ কার্ষীরীদৃশং সাহসং ক্বচিৎ
ন হি সাহসকর্তারঃ সুখমেধন্তি ভারত

235.22

স্বস্তিমান্সহিতঃ সর্বৈর্ভ্রাতৃভিঃ কুরুনন্দন
গৃহান্ব্রজ যথাকামং বৈমনস্যং চ মা কৃথাঃ

235.23

পাণ্ডবেনাভ্যনুজ্ঞাতো রাজা দুর্যোধনস্তদা
বিদীর্যমাণো ব্রীডেন জগাম নগরং প্রতি

235.24

তস্মিন্গতে কৌরবেয়ে কুন্তীপুত্রো যুধিষ্ঠিরঃ
ভ্রাতৃভিঃ সহিতো বীরঃ পূজ্যমানো দ্বিজাতিভিঃ

235.25

তপোধনৈশ্চ তৈঃ সর্বৈর্বৃতঃ শক্র ইবামরৈঃ
বনে দ্বৈতবনে তস্মিন্বিজহার মুদা যুতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.