Utshovঅধ্যায় 234
234.1
বৈশংপায়ন উবাচ
ততো দিব্যাস্ত্রসংপন্না গন্ধর্বা হেমমালিনঃ
বিসৃজন্তঃ শরান্দীপ্তান্সমন্তাত্পর্যবারয়ন্
234.2
চত্বারঃ পাণ্ডবা বীরা গন্ধর্বাশ্চ সহস্রশঃ
রণে সংন্যপতন্রাজংস্তদদ্ভুতমিবাভবৎ
234.3
যথা কর্ণস্য চ রথো ধার্তরাষ্ট্রস্য চোভয়োঃ
গন্ধর্বৈঃ শতশশ্ছিন্নৌ তথা তেষাং প্রচক্রিরে
234.4
তান্সমাপততো রাজন্গন্ধর্বাঞ্শতশো রণে
প্রত্যগৃহ্ণন্নরব্যাঘ্রাঃ শরবর্ষৈরনেকশঃ
234.5
অবকীর্যমাণাঃ খগমাঃ শরবর্ষৈঃ সমন্ততঃ
ন শেকুঃ পাণ্ডুপুত্রাণাং সমীপে পরিবর্তিতুম্
234.6
অভিক্রুদ্ধানভিপ্রেক্ষ্য গন্ধর্বানর্জুনস্তদা
লক্ষয়িত্বাথ দিব্যানি মহাস্ত্রাণ্যুপচক্রমে
234.7
সহস্রাণাং সহস্রং স প্রাহিণোদ্যমসাদনম্
আগ্নেয়েনার্জুনঃ সংখ্যে গন্ধর্বাণাং বলোত্কটঃ
234.8
তথা ভীমো মহেষ্বাসঃ সংয়ুগে বলিনাং বরঃ
গন্ধর্বাঞ্শতশো রাজঞ্জঘান নিশিতৈঃ শরৈঃ
234.9
মাদ্রীপুত্রাবপি তথা যুধ্যমানৌ বলোত্কটৌ
পরিগৃহ্যাগ্রতো রাজঞ্জঘ্নতুঃ শতশঃ পরান্
234.10
তে বধ্যমানা গন্ধর্বা দিব্যৈরস্ত্রৈর্মহাত্মভিঃ
উত্পেতুঃ খমুপাদায় ধৃতরাষ্ট্রসুতাংস্ততঃ
234.11
তানুত্পতিষ্ণূন্বুদ্ধ্বা তু কুন্তীপুত্রো ধনংজয়ঃ
মহতা শরজালেন সমন্তাত্পর্যবারয়ৎ
234.12
তে বদ্ধাঃ শরজালেন শকুন্তা ইব পঞ্জরে
ববর্ষুরর্জুনং ক্রোধাদ্গদাশক্ত্যৃষ্টিবৃষ্টিভিঃ
234.13
গদাশক্ত্যসিবৃষ্টীস্তা নিহত্য স মহাস্ত্রবিৎ
গাত্রাণি চাহনদ্ভল্লৈর্গন্ধর্বাণাং ধনংজয়ঃ
234.14
শিরোভিঃ প্রপতদ্ভিশ্চ চরণৈর্বাহুভিস্তথা
অশ্মবৃষ্টিরিবাভাতি পরেষামভবদ্ভয়ম্
234.15
তে বধ্যমানা গন্ধর্বাঃ পাণ্ডবেন মহাত্মনা
ভূমিষ্ঠমন্তরিক্ষস্থাঃ শরবর্ষৈরবাকিরন্
234.16
তেষাং তু শরবর্ষাণি সব্যসাচী পরংতপঃ
অস্ত্রৈঃ সংবার্য তেজস্বী গন্ধর্বান্প্রত্যবিধ্যত
234.17
স্থূণাকর্ণেন্দ্রজালং চ সৌরং চাপি তথার্জুনঃ
আগ্নেয়ং চাপি সৌম্যং চ সসর্জ কুরুনন্দনঃ
234.18
তে দহ্যমানা গন্ধর্বাঃ কুন্তীপুত্রস্য সায়কৈঃ
দৈতেয়া ইব শক্রেণ বিষাদমগমন্পরম্
234.19
ঊর্ধ্বমাক্রমমাণাশ্চ শরজালেন বারিতাঃ
বিসর্পমাণা ভল্লৈশ্চ বার্যন্তে সব্যসাচিনা
234.20
গন্ধর্বাংস্ত্রাসিতান্দৃষ্ট্বা কুন্তীপুত্রেণ ধীমতা
চিত্রসেনো গদাং গৃহ্য সব্যসাচিনমাদ্রবৎ
234.21
তস্যাভিপততস্তূর্ণং গদাহস্তস্য সংয়ুগে
গদাং সর্বায়সীং পার্থঃ শরৈশ্চিচ্ছেদ সপ্তধা
234.22
স গদাং বহুধা দৃষ্ট্বা কৃত্তাং বাণৈস্তরস্বিনা
সংবৃত্য বিদ্যয়াত্মানং যোধয়ামাস পাণ্ডবম্
অস্ত্রাণি তস্য দিব্যানি যোধয়ামাস খে স্থিতঃ
234.23
গন্ধর্বরাজো বলবান্মায়য়ান্তর্হিতস্তদা
অন্তর্হিতং সমালক্ষ্য প্রহরন্তমথার্জুনঃ
তাডয়ামাস খচরৈর্দিব্যাস্ত্রপ্রতিমন্ত্রিতৈঃ
234.24
অন্তর্ধানবধং চাস্য চক্রে ক্রুদ্ধোঽর্জুনস্তদা
শব্দবেধ্যমুপাশ্রিত্য বহুরূপো ধনংজয়ঃ
234.25
স বধ্যমানস্তৈরস্ত্রৈরর্জুনেন মহাত্মনা
অথাস্য দর্শয়ামাস তদাত্মানং প্রিয়ঃ সখা
234.26
চিত্রসেনমথালক্ষ্য সখায়ং যুধি দুর্বলম্
সংজহারাস্ত্রমথ তত্প্রসৃষ্টং পাণ্ডবর্ষভঃ
234.27
দৃষ্ট্বা তু পাণ্ডবাঃ সর্বে সংহৃতাস্ত্রং ধনংজয়ম্
সংজহ্রুঃ প্রদ্রুতানশ্বাঞ্শরবেগান্ধনূংষি চ
234.28
চিত্রসেনশ্চ ভীমশ্চ সব্যসাচী যমাবপি
পৃষ্ট্বা কৌশলমন্যোন্যং রথেষ্বেবাবতস্থিরে