অধ্যায় 233

233.1

বৈশংপায়ন উবাচ
যুধিষ্ঠিরবচঃ শ্রুত্বা ভীমসেনপুরোগমাঃ
প্রহৃষ্টবদনাঃ সর্বে সমুত্তস্থুর্নরর্ষভাঃ

অভেদ্যানি ততঃ সর্বে সমনহ্যন্ত ভারত
জাম্বূনদবিচিত্রাণি কবচানি মহারথাঃ

তে দংশিতা রথৈঃ সর্বে ধ্বজিনঃ সশরাসনাঃ
পাণ্ডবাঃ প্রত্যদৃশ্যন্ত জ্বলিতা ইব পাবকাঃ

তান্রথান্সাধু সংপন্নান্সংয়ুক্তাঞ্জবনৈর্হয়ৈঃ
আস্থায় রথশার্দূলাঃ শীঘ্রমেব যয়ুস্ততঃ

ততঃ কৌরবসৈন্যানাং প্রাদুরাসীন্মহাস্বনঃ
প্রয়াতান্সহিতান্দৃষ্ট্বা পাণ্ডুপুত্রান্মহারথান্

জিতকাশিনশ্চ খচরাস্ত্বরিতাশ্চ মহারথাঃ
ক্ষণেনৈব বনে তস্মিন্সমাজগ্মুরভীতবৎ

ন্যবর্তন্ত ততঃ সর্বে গন্ধর্বা জিতকাশিনঃ
দৃষ্ট্বা রথগতান্বীরান্পাণ্ডবাংশ্চতুরো রণে

তাংস্তু বিভ্রাজতো দৃষ্ট্বা লোকপালানিবোদ্যতান্
ব্যূঢানীকা ব্যতিষ্ঠন্ত গন্ধমাদনবাসিনঃ

রাজ্ঞস্তু বচনং শ্রুত্বা ধর্মরাজস্য ধীমতঃ
ক্রমেণ মৃদুনা যুদ্ধমুপক্রামন্ত ভারত

ন তু গন্ধর্বরাজস্য সৈনিকা মন্দচেতসঃ
শক্যন্তে মৃদুনা শ্রেয়ঃ প্রতিপাদয়িতুং তদা

ততস্তান্যুধি দুর্ধর্ষঃ সব্যসাচী পরংতপঃ
সান্ত্বপূর্বমিদং বাক্যমুবাচ খচরান্রণে

নৈতদ্গন্ধর্বরাজস্য যুক্তং কর্ম জুগুপ্সিতম্
পরদারাভিমর্শশ্চ মানুষৈশ্চ সমাগমঃ

উত্সৃজধ্বং মহাবীর্যান্ধৃতরাষ্ট্রসুতানিমান্
দারাংশ্চৈষাং বিমুঞ্চধ্বং ধর্মরাজস্য শাসনাৎ

এবমুক্তাস্তু গন্ধর্বাঃ পাণ্ডবেন যশস্বিনা
উত্স্ময়ন্তস্তদা পার্থমিদং বচনমব্রুবন্

একস্যৈব বয়ং তাত কুর্যাম বচনং ভুবি
যস্য শাসনমাজ্ঞায় চরাম বিগতজ্বরাঃ

তেনৈকেন যথাদিষ্টং তথা বর্তাম ভারত
ন শাস্তা বিদ্যতেঽস্মাকমন্যস্তস্মাত্সুরেশ্বরাৎ

এবমুক্তস্তু গন্ধর্বৈঃ কুন্তীপুত্রো ধনংজয়ঃ
গন্ধর্বান্পুনরেবেদং বচনং প্রত্যভাষত

যদি সাম্না ন মোক্ষধ্বং গন্ধর্বা ধৃতরাষ্ট্রজম্
মোক্ষয়িষ্যামি বিক্রম্য স্বয়মেব সুয়োধনম্

এবমুক্ত্বা ততঃ পার্থঃ সব্যসাচী ধনংজয়ঃ
সসর্জ নিশিতান্বাণান্খচরান্খচরান্প্রতি

তথৈব শরবর্ষেণ গন্ধর্বাস্তে বলোত্কটাঃ
পাণ্ডবানভ্যবর্তন্ত পাণ্ডবাশ্চ দিবৌকসঃ

ততঃ সুতুমুলং যুদ্ধং গন্ধর্বাণাং তরস্বিনাম্
বভূব ভীমবেগানাং পাণ্ডবানাং চ ভারত