অধ্যায় 232

232.1

যুধিষ্ঠির উবাচ
অস্মানভিগতাংস্তাত ভয়ার্তাঞ্শরণৈষিণঃ
কৌরবান্বিষমপ্রাপ্তান্কথং ব্রূয়াস্ত্বমীদৃশম্

ভবন্তি ভেদা জ্ঞাতীনাং কলহাশ্চ বৃকোদর
প্রসক্তানি চ বৈরাণি জ্ঞাতিধর্মো ন নশ্যতি

যদা তু কশ্চিজ্জ্ঞাতীনাং বাহ্যঃ প্রার্থয়তে কুলম্
ন মর্ষয়ন্তি তত্সন্তো বাহ্যেনাভিপ্রমর্ষণম্

জানাতি হ্যেষ দুর্বুদ্ধিরস্মানিহ চিরোষিতান্
স এষ পরিভূয়াস্মানকার্ষীদিদমপ্রিয়ম্

দুর্যোধনস্য গ্রহণাদ্গন্ধর্বেণ বলাদ্রণে
স্ত্রীণাং বাহ্যাভিমর্শাচ্চ হতং ভবতি নঃ কুলম্

শরণং চ প্রপন্নানাং ত্রাণার্থং চ কুলস্য নঃ
উত্তিষ্ঠধ্বং নরব্যাঘ্রাঃ সজ্জীভবত মাচিরম্

অর্জুনশ্চ যমৌ চৈব ত্বং চ ভীমাপরাজিতঃ
মোক্ষয়ধ্বং ধার্তরাষ্ট্রং হ্রিয়মাণং সুয়োধনম্

এতে রথা নরব্যাঘ্রাঃ সর্বশস্ত্রসমন্বিতাঃ
ইন্দ্রসেনাদিভিঃ সূতৈঃ সংয়তাঃ কনকধ্বজাঃ

এতানাস্থায় বৈ তাত গন্ধর্বান্যোদ্ধুমাহবে
সুয়োধনস্য মোক্ষায় প্রয়তধ্বমতন্দ্রিতাঃ

য এব কশ্চিদ্রাজন্যঃ শরণার্থমিহাগতম্
পরং শক্ত্যাভিরক্ষেত কিং পুনস্ত্বং বৃকোদর

ক ইহান্যো ভবেত্ত্রাণমভিধাবেতি চোদিতঃ
প্রাঞ্জলিং শরণাপন্নং দৃষ্ট্বা শত্রুমপি ধ্রুবম্

বরপ্রদানং রাজ্যং চ পুত্রজন্ম চ পাণ্ডব
শত্রোশ্চ মোক্ষণং ক্লেশাত্ত্রীণি চৈকং চ তত্সমম্

কিং হ্যভ্যধিকমেতস্মাদ্যদাপন্নঃ সুয়োধনঃ
ত্বদ্বাহুবলমাশ্রিত্য জীবিতং পরিমার্গতি

স্বয়মেব প্রধাবেয়ং যদি ন স্যাদ্বৃকোদর
বিততোঽয়ং ক্রতুর্বীর ন হি মেঽত্র বিচারণা

সাম্নৈব তু যথা ভীম মোক্ষয়েথাঃ সুয়োধনম্
তথা সর্বৈরুপায়ৈস্ত্বং যতেথাঃ কুরুনন্দন

ন সাম্না প্রতিপদ্যেত যদি গন্ধর্বরাডসৌ
পরাক্রমেণ মৃদুনা মোক্ষয়েথাঃ সুয়োধনম্

অথাসৌ মৃদুয়ুদ্ধেন ন মুঞ্চেদ্ভীম কৌরবান্
সর্বোপায়ৈর্বিমোচ্যাস্তে নিগৃহ্য পরিপন্থিনঃ

এতাবদ্ধি ময়া শক্যং সংদেষ্টুং বৈ বৃকোদর
বৈতানে কর্মণি ততে বর্তমানে চ ভারত

বৈশংপায়ন উবাচ
অজাতশত্রোর্বচনং তচ্ছ্রুত্বা তু ধনংজয়ঃ
প্রতিজজ্ঞে গুরোর্বাক্যং কৌরবাণাং বিমোক্ষণম্

অর্জুন উবাচ
যদি সাম্না ন মোক্ষ্যন্তি গন্ধর্বা ধৃতরাষ্ট্রজান্
অদ্য গন্ধর্বরাজস্য ভূমিঃ পাস্যতি শোণিতম্

বৈশংপায়ন উবাচ
অর্জুনস্য তু তাং শ্রুত্বা প্রতিজ্ঞাং সত্যবাদিনঃ
কৌরবাণাং তদা রাজন্পুনঃ প্রত্যাগতং মনঃ