অধ্যায় 231

231.1

বৈশংপায়ন উবাচ
গন্ধর্বৈস্তু মহারাজ ভগ্নে কর্ণে মহারথে
সংপ্রাদ্রবচ্চমূঃ সর্বা ধার্তরাষ্ট্রস্য পশ্যতঃ

তান্দৃষ্ট্বা দ্রবতঃ সর্বান্ধার্তরাষ্ট্রান্পরাঙ্মুখান্
দুর্যোধনো মহারাজ নাসীত্তত্র পরাঙ্মুখঃ

তামাপতন্তীং সংপ্রেক্ষ্য গন্ধর্বাণাং মহাচমূম্
মহতা শরবর্ষেণ সোঽভ্যবর্ষদরিংদমঃ

অচিন্ত্য শরবর্ষং তু গন্ধর্বাস্তস্য তং রথম্
দুর্যোধনং জিঘাংসন্তঃ সমন্তাত্পর্যবারয়ন্

যুগমীষাং বরূথং চ তথৈব ধ্বজসারথী
অশ্বাংস্ত্রিবেণুং তল্পং চ তিলশোঽভ্যহনন্রথম্

দুর্যোধনং চিত্রসেনো বিরথং পতিতং ভুবি
অভিদ্রুত্য মহাবাহুর্জীবগ্রাহমথাগ্রহীৎ

তস্মিন্গৃহীতে রাজেন্দ্র স্থিতং দুঃশাসনং রথে
পর্যগৃহ্ণন্ত গন্ধর্বাঃ পরিবার্য সমন্ততঃ

বিবিংশতিং চিত্রসেনমাদায়ান্যে প্রদুদ্রুবুঃ
বিন্দানুবিন্দাবপরে রাজদারাংশ্চ সর্বশঃ

সৈন্যাস্তু ধার্তরাষ্ট্রস্য গন্ধর্বৈঃ সমভিদ্রুতাঃ
পূর্বং প্রভগ্নৈঃ সহিতাঃ পাণ্ডবানভ্যয়ুস্তদা

শকটাপণবেশ্যাশ্চ যানয়ুগ্যং চ সর্বশঃ
শরণং পাণ্ডবাঞ্জগ্মুর্হ্রিয়মাণে মহীপতৌ

প্রিয়দর্শনো মহাবাহুর্ধার্তরাষ্ট্রো মহাবলঃ
গন্ধর্বৈর্হ্রিয়তে রাজা পার্থাস্তমনুধাবত

দুঃশাসনো দুর্বিষহো দুর্মুখো দুর্জয়স্তথা
বদ্ধ্বা হ্রিয়ন্তে গন্ধর্বৈ রাজদারাশ্চ সর্বশঃ

ইতি দুর্যোধনামাত্যাঃ ক্রোশন্তো রাজগৃদ্ধিনঃ
আর্তা দীনস্বরাঃ সর্বে যুধিষ্ঠিরমুপাগমন্

তাংস্তথা ব্যথিতান্দীনান্ভিক্ষমাণান্যুধিষ্ঠিরম্
বৃদ্ধান্দুর্যোধনামাত্যান্ভীমসেনোঽভ্যভাষত

অন্যথা বর্তমানানামর্থো জাতোঽয়মন্যথা
অস্মাভির্যদনুষ্ঠেয়ং গন্ধর্বৈস্তদনুষ্ঠিতম্

দুর্মন্ত্রিতমিদং তাত রাজ্ঞো দুর্দ্যূতদেবিনঃ
দ্বেষ্টারমন্যে ক্লীবস্য পাতয়ন্তীতি নঃ শ্রুতম্

তদিদং কৃতং নঃ প্রত্যক্ষং গন্ধর্বৈরতিমানুষম্
দিষ্ট্যা লোকে পুমানস্তি কশ্চিদস্মত্প্রিয়ে স্থিতঃ
যেনাস্মাকং হৃতো ভার আসীনানাং সুখাবহঃ

শীতবাতাতপসহাংস্তপসা চৈব কর্শিতান্
সমস্থো বিষমস্থান্হি দ্রষ্টুমিচ্ছতি দুর্মতিঃ

অধর্মচারিণস্তস্য কৌরব্যস্য দুরাত্মনঃ
যে শীলমনুবর্তন্তে তে পশ্যন্তি পরাভবম্

অধর্মো হি কৃতস্তেন যেনৈতদুপশিক্ষিতম্
অনৃশংসাস্তু কৌন্তেয়াস্তস্যাধ্যক্ষান্ব্রবীমি বঃ

এবং ব্রুবাণং কৌন্তেয়ং ভীমসেনমমর্ষণম্
ন কালঃ পরুষস্যায়মিতি রাজাভ্যভাষত