Utshovঅধ্যায় 230
230.1
বৈশংপায়ন উবাচ
ততস্তে সহিতাঃ সর্বে দুর্যোধনমুপাগমন্
অব্রুবংশ্চ মহারাজ যদূচুঃ কৌরবং প্রতি
230.2
গন্ধর্বৈর্বারিতে সৈন্যে ধার্তরাষ্ট্রঃ প্রতাপবান্
অমর্ষপূর্ণঃ সৈন্যানি প্রত্যভাষত ভারত
230.3
শাসতৈনানধর্মজ্ঞান্মম বিপ্রিয়কারিণঃ
যদি প্রক্রীডিতো দেবৈঃ সর্বৈঃ সহ শতক্রতুঃ
230.4
দুর্যোধনবচঃ শ্রুত্বা ধার্তরাষ্ট্রা মহাবলাঃ
সর্ব এবাভিসংনদ্ধা যোধাশ্চাপি সহস্রশঃ
230.5
ততঃ প্রমথ্য গন্ধর্বাংস্তদ্বনং বিবিশুর্বলাৎ
সিংহনাদেন মহতা পূরয়ন্তো দিশো দশ
230.6
ততোঽপরৈরবার্যন্ত গন্ধর্বৈঃ কুরুসৈনিকাঃ
তে বার্যমাণা গন্ধর্বৈঃ সাম্নৈব বসুধাধিপ
তাননাদৃত্য গন্ধর্বাংস্তদ্বনং বিবিশুর্মহৎ
230.7
যদা বাচা ন তিষ্ঠন্তি ধার্তরাষ্ট্রাঃ সরাজকাঃ
ততস্তে খেচরাঃ সর্বে চিত্রসেনে ন্যবেদয়ন্
230.8
গন্ধর্বরাজস্তান্সর্বানব্রবীত্কৌরবান্প্রতি
অনার্যাঞ্শাসতেত্যেবং চিত্রসেনোঽত্যমর্ষণঃ
230.9
অনুজ্ঞাতাস্তু গন্ধর্বাশ্চিত্রসেনেন ভারত
প্রগৃহীতায়ুধাঃ সর্বে ধার্তরাষ্ট্রানভিদ্রবন্
230.10
তান্দৃষ্ট্বা পততঃ শীঘ্রান্গন্ধর্বানুদ্যতায়ুধান্
সর্বে তে প্রাদ্রবন্সংখ্যে ধার্তরাষ্ট্রস্য পশ্যতঃ
230.11
তান্দৃষ্ট্বা দ্রবতঃ সর্বান্ধার্তরাষ্ট্রান্পরাঙ্মুখান্
বৈকর্তনস্তদা বীরো নাসীত্তত্র পরাঙ্মুখঃ
230.12
আপতন্তীং তু সংপ্রেক্ষ্য গন্ধর্বাণাং মহাচমূম্
মহতা শরবর্ষেণ রাধেয়ঃ প্রত্যবারয়ৎ
230.13
ক্ষুরপ্রৈর্বিশিখৈর্ভল্লৈর্বত্সদন্তৈস্তথায়সৈঃ
গন্ধর্বাঞ্শতশোঽভ্যঘ্নঁল্লঘুত্বাত্সূতনন্দনঃ
230.14
পাতয়ন্নুত্তমাঙ্গানি গন্ধর্বাণাং মহারথঃ
ক্ষণেন ব্যধমত্সর্বাং চিত্রসেনস্য বাহিনীম্
230.15
তে বধ্যমানা গন্ধর্বাঃ সূতপুত্রেণ ধীমতা
ভূয় এবাভ্যবর্তন্ত শতশোঽথ সহস্রশঃ
230.16
গন্ধর্বভূতা পৃথিবী ক্ষণেন সমপদ্যত
আপতদ্ভির্মহাবেগৈশ্চিত্রসেনস্য সৈনিকৈঃ
230.17
অথ দুর্যোধনো রাজা শকুনিশ্চাপি সৌবলঃ
দুঃশাসনো বিকর্ণশ্চ যে চান্যে ধৃতরাষ্ট্রজাঃ
ন্যহনংস্তত্তদা সৈন্যং রথৈর্গরুডনিস্বনৈঃ
230.18
ভূয়শ্চ যোধয়ামাসুঃ কৃত্বা কর্ণমথাগ্রতঃ
মহতা রথঘোষেণ হয়চারেণ চাপ্যুত
বৈকর্তনং পরীপ্সন্তো গন্ধর্বান্সমবারয়ন্
230.19
ততঃ সংন্যপতন্সর্বে গন্ধর্বাঃ কৌরবৈঃ সহ
তদা সুতুমুলং যুদ্ধমভবল্লোমহর্ষণম্
230.20
ততস্তে মৃদবোঽভূবন্গন্ধর্বাঃ শরপীডিতাঃ
উচ্চুক্রুশুশ্চ কৌরব্যা গন্ধর্বান্প্রেক্ষ্য পীডিতান্
230.21
গন্ধর্বাংস্ত্রাসিতান্দৃষ্ট্বা চিত্রসেনোঽত্যমর্ষণঃ
উত্পপাতাসনাত্ক্রুদ্ধো বধে তেষাং সমাহিতঃ
230.22
ততো মায়াস্ত্রমাস্থায় যুয়ুধে চিত্রমার্গবিৎ
তয়ামুহ্যন্ত কৌরব্যাশ্চিত্রসেনস্য মায়য়া
230.23
একৈকো হি তদা যোধো ধার্তরাষ্ট্রস্য ভারত
পর্যবর্তত গন্ধর্বৈর্দশভির্দশভিঃ সহ
230.24
ততঃ সংপীড্যমানাস্তে বলেন মহতা তদা
প্রাদ্রবন্ত রণে ভীতা যত্র রাজা যুধিষ্ঠিরঃ
230.25
ভজ্যমানেষ্বনীকেষু ধার্তরাষ্ট্রেষু সর্বশঃ
কর্ণো বৈকর্তনো রাজংস্তস্থৌ গিরিরিবাচলঃ
230.26
দুর্যোধনশ্চ কর্ণশ্চ শকুনিশ্চাপি সৌবলঃ
গন্ধর্বান্যোধয়াং চক্রুঃ সমরে ভৃশবিক্ষতাঃ
230.27
সর্ব এব তু গন্ধর্বাঃ শতশোঽথ সহস্রশঃ
জিঘাংসমানাঃ সহিতাঃ কর্ণমভ্যদ্রবন্রণে
230.28
অসিভিঃ পট্টিশৈঃ শূলৈর্গদাভিশ্চ মহাবলাঃ
সূতপুত্রং জিঘাংসন্তঃ সমন্তাত্পর্যবারয়ন্
230.29
অন্যেঽস্য যুগমচ্ছিন্দন্ধ্বজমন্যে ন্যপাতয়ন্
ঈষামন্যে হয়ানন্যে সূতমন্যে ন্যপাতয়ন্
230.30
অন্যে ছত্রং বরূথং চ বন্ধুরং চ তথাপরে
গন্ধর্বা বহুসাহস্রাঃ খণ্ডশোঽভ্যহনন্রথম্
230.31
ততো রথাদবপ্লুত্য সূতপুত্রোঽসিচর্মভৃৎ
বিকর্ণরথমাস্থায় মোক্ষায়াশ্বানচোদয়ৎ