Utshovঅধ্যায় 229
229.1
বৈশংপায়ন উবাচ
অথ দুর্যোধনো রাজা তত্র তত্র বনে বসন্
জগাম ঘোষানভিতস্তত্র চক্রে নিবেশনম্
229.2
রমণীয়ে সমাজ্ঞাতে সোদকে সমহীরুহে
দেশে সর্বগুণোপেতে চক্রুরাবসথং নরাঃ
229.3
তথৈব তত্সমীপস্থান্পৃথগাবসথান্বহূন্
কর্ণস্য শকুনেশ্চৈব ভ্রাতৄণাং চৈব সর্বশঃ
229.4
দদর্শ স তদা গাবঃ শতশোঽথ সহস্রশঃ
অঙ্কৈর্লক্ষৈশ্চ তাঃ সর্বা লক্ষয়ামাস পার্থিবঃ
229.5
অঙ্কয়ামাস বত্সাংশ্চ জজ্ঞে চোপসৃতাস্ত্বপি
বালবত্সাশ্চ যা গাবঃ কালয়ামাস তা অপি
229.6
অথ স স্মারণং কৃত্বা লক্ষয়িত্বা ত্রিহায়নান্
বৃতো গোপালকৈঃ প্রীতো ব্যহরত্কুরুনন্দনঃ
229.7
স চ পৌরজনঃ সর্বঃ সৈনিকাশ্চ সহস্রশঃ
যথোপজোষং চিক্রীডুর্বনে তস্মিন্যথামরাঃ
229.8
ততো গোপাঃ প্রগাতারঃ কুশলা নৃত্তবাদিতে
ধার্তরাষ্ট্রমুপাতিষ্ঠন্কন্যাশ্চৈব স্বলংকৃতাঃ
229.9
স স্ত্রীগণবৃতো রাজা প্রহৃষ্টঃ প্রদদৌ বসু
তেভ্যো যথার্হমন্নানি পানানি বিবিধানি চ
229.10
ততস্তে সহিতাঃ সর্বে তরক্ষূন্মহিষান্মৃগান্
গবয়র্ক্ষবরাহাংশ্চ সমন্তাত্পর্যকালয়ন্
229.11
স তাঞ্শরৈর্বিনির্ভিন্দন্গজান্বধ্নন্মহাবনে
রমণীয়েষু দেশেষু গ্রাহয়ামাস বৈ মৃগান্
229.12
গোরসানুপয়ুঞ্জান উপভোগাংশ্চ ভারত
পশ্যন্সুরমণীয়ানি পুষ্পিতানি বনানি চ
229.13
মত্তভ্রমরজুষ্টানি বর্হিণাভিরুতানি চ
অগচ্ছদানুপূর্ব্যেণ পুণ্যং দ্বৈতবনং সরঃ
ঋদ্ধ্যা পরময়া যুক্তো মহেন্দ্র ইব বজ্রভৃৎ
229.14
যদৃচ্ছয়া চ তদহো ধর্মপুত্রো যুধিষ্ঠিরঃ
ঈজে রাজর্ষিয়জ্ঞেন সদ্যস্কেন বিশাং পতে
দিব্যেন বিধিনা রাজা বন্যেন কুরুসত্তমঃ
229.15
কৃত্বা নিবেশমভিতঃ সরসস্তস্য কৌরবঃ
দ্রৌপদ্যা সহিতো ধীমান্ধর্মপত্ন্যা নরাধিপঃ
229.16
ততো দুর্যোধনঃ প্রেষ্যানাদিদেশ সহানুজঃ
আক্রীডাবসথাঃ ক্ষিপ্রং ক্রিয়ন্তামিতি ভারত
229.17
তে তথেত্যেব কৌরব্যমুক্ত্বা বচনকারিণঃ
চিকীর্ষন্তস্তদাক্রীডাঞ্জগ্মুর্দ্বৈতবনং সরঃ
229.18
সেনাগ্রং ধার্তরাষ্ট্রস্য প্রাপ্তং দ্বৈতবনং সরঃ
প্রবিশন্তং বনদ্বারি গন্ধর্বাঃ সমবারয়ন্
229.19
তত্র গন্ধর্বরাজো বৈ পূর্বমেব বিশাং পতে
কুবেরভবনাদ্রাজন্নাজগাম গণাবৃতঃ
229.20
গণৈরপ্সরসাং চৈব ত্রিদশানাং তথাত্মজৈঃ
বিহারশীলঃ ক্রীডার্থং তেন তত্সংবৃতং সরঃ
229.21
তেন তত্সংবৃতং দৃষ্ট্বা তে রাজপরিচারকাঃ
প্রতিজগ্মুস্ততো রাজন্যত্র দুর্যোধনো নৃপঃ
229.22
স তু তেষাং বচঃ শ্রুত্বা সৈনিকান্যুদ্ধদুর্মদান্
প্রেষয়ামাস কৌরব্য উত্সারয়ত তানিতি
229.23
তস্য তদ্বচনং শ্রুত্বা রাজ্ঞঃ সেনাগ্রয়ায়িনঃ
সরো দ্বৈতবনং গত্বা গন্ধর্বানিদমব্রুবন্
229.24
রাজা দুর্যোধনো নাম ধৃতরাষ্ট্রসুতো বলী
বিজিহীর্ষুরিহায়াতি তদর্থমপসর্পত
229.25
এবমুক্তাস্তু গন্ধর্বাঃ প্রহসন্তো বিশাং পতে
প্রত্যব্রুবংস্তান্পুরুষানিদং সুপরুষং বচঃ
229.26
ন চেতয়তি বো রাজা মন্দবুদ্ধিঃ সুয়োধনঃ
যোঽস্মানাজ্ঞাপয়ত্যেবং বশ্যানিব দিবৌকসঃ
229.27
যূয়ং মুমূর্ষবশ্চাপি মন্দপ্রজ্ঞা ন সংশয়ঃ
যে তস্য বচনাদেবমস্মান্ব্রূত বিচেতসঃ
229.28
গচ্ছত ত্বরিতাঃ সর্বে যত্র রাজা স কৌরবঃ
দ্বেষ্যং মাদ্যৈব গচ্ছধ্বং ধর্মরাজনিবেশনম্
229.29
এবমুক্তাস্তু গন্ধর্বৈ রাজ্ঞঃ সেনাগ্রয়ায়িনঃ
সংপ্রাদ্রবন্যতো রাজা ধৃতরাষ্ট্রসুতোঽভবৎ