Utshovঅধ্যায় 228
228.1
বৈশংপায়ন উবাচ
ধৃতরাষ্ট্রং ততঃ সর্বে দদৃশুর্জনমেজয়
পৃষ্ট্বা সুখমথো রাজ্ঞঃ পৃষ্ট্বা রাজ্ঞা চ ভারত
228.2
ততস্তৈর্বিহিতঃ পূর্বং সমঙ্গো নাম বল্লবঃ
সমীপস্থাস্তদা গাবো ধৃতরাষ্ট্রে ন্যবেদয়ৎ
228.3
অনন্তরং চ রাধেয়ঃ শকুনিশ্চ বিশাং পতে
আহতুঃ পার্থিবশ্রেষ্ঠং ধৃতরাষ্ট্রং জনাধিপম্
228.4
রমণীয়েষু দেশেষু ঘোষাঃ সংপ্রতি কৌরব
স্মারণাসময়ঃ প্রাপ্তো বত্সানামপি চাঙ্কনম্
228.5
মৃগয়া চোচিতা রাজন্নস্মিন্কালে সুতস্য তে
দুর্যোধনস্য গমনং ত্বমনুজ্ঞাতুমর্হসি
228.6
ধৃতরাষ্ট্র উবাচ
মৃগয়া শোভনা তাত গবাং চ সমবেক্ষণম্
বিশ্রম্ভস্তু ন গন্তব্যো বল্লবানামিতি স্মরে
228.7
তে তু তত্র নরব্যাঘ্রাঃ সমীপ ইতি নঃ শ্রুতম্
অতো নাভ্যনুজানামি গমনং তত্র বঃ স্বয়ম্
228.8
ছদ্মনা নির্জিতাস্তে হি কর্শিতাশ্চ মহাবনে
তপোনিত্যাশ্চ রাধেয় সমর্থাশ্চ মহারথাঃ
228.9
ধর্মরাজো ন সংক্রুধ্যেদ্ভীমসেনস্ত্বমর্ষণঃ
যজ্ঞসেনস্য দুহিতা তেজ এব তু কেবলম্
228.10
যূয়ং চাপ্যপরাধ্যেয়ুর্দর্পমোহসমন্বিতাঃ
ততো বিনির্দহেয়ুস্তে তপসা হি সমন্বিতাঃ
228.11
অথ বা সায়ুধা বীরা মন্যুনাভিপরিপ্লুতাঃ
সহিতা বদ্ধনিস্ত্রিংশা দহেয়ুঃ শস্ত্রতেজসা
228.12
অথ যূয়ং বহুত্বাত্তানারভধ্বং কথংচন
অনার্যং পরমং তত্স্যাদশক্যং তচ্চ মে মতম্
228.13
উষিতো হি মহাবাহুরিন্দ্রলোকে ধনংজয়ঃ
দিব্যান্যস্ত্রাণ্যবাপ্যাথ ততঃ প্রত্যাগতো বনম্
228.14
অকৃতাস্ত্রেণ পৃথিবী জিতা বীভত্সুনা পুরা
কিং পুনঃ স কৃতাস্ত্রোঽদ্য ন হন্যাদ্বো মহারথঃ
228.15
অথ বা মদ্বচঃ শ্রুত্বা তত্র যত্তা ভবিষ্যথ
উদ্বিগ্নবাসো বিশ্রম্ভাদ্দুঃখং তত্র ভবিষ্যতি
228.16
অথ বা সৈনিকাঃ কেচিদপকুর্যুর্যুধিষ্ঠিরে
তদবুদ্ধিকৃতং কর্ম দোষমুত্পাদয়েচ্চ বঃ
228.17
তস্মাদ্গচ্ছন্তু পুরুষাঃ স্মারণায়াপ্তকারিণঃ
ন স্বয়ং তত্র গমনং রোচয়ে তব ভারত
228.18
শকুনিরুবাচ
ধর্মজ্ঞঃ পাণ্ডবো জ্যেষ্ঠঃ প্রতিজ্ঞাতং চ সংসদি
তেন দ্বাদশ বর্ষাণি বস্তব্যানীতি ভারত
228.19
অনুবৃত্তাশ্চ তে সর্বে পাণ্ডবা ধর্মচারিণঃ
যুধিষ্ঠিরশ্চ কৌন্তেয়ো ন নঃ কোপং করিষ্যতি
228.20
মৃগয়াং চৈব নো গন্তুমিচ্ছা সংবর্ধতে ভৃশম্
স্মারণং চ চিকীর্ষামো ন তু পাণ্ডবদর্শনম্
228.21
ন চানার্যসমাচারঃ কশ্চিত্তত্র ভবিষ্যতি
ন চ তত্র গমিষ্যামো যত্র তেষাং প্রতিশ্রয়ঃ
228.22
বৈশংপায়ন উবাচ
এবমুক্তঃ শকুনিনা ধৃতরাষ্ট্রো জনেশ্বরঃ
দুর্যোধনং সহামাত্যমনুজজ্ঞে ন কামতঃ
228.23
অনুজ্ঞাতস্তু গান্ধারিঃ কর্ণেন সহিতস্তদা
নির্যয়ৌ ভরতশ্রেষ্ঠো বলেন মহতা বৃতঃ
228.24
দুঃশাসনেন চ তথা সৌবলেন চ দেবিনা
সংবৃতো ভ্রাতৃভিশ্চান্যৈঃ স্ত্রীভিশ্চাপি সহস্রশঃ
228.25
তং নির্যান্তং মহাবাহুং দ্রষ্টুং দ্বৈতবনং সরঃ
পৌরাশ্চানুয়য়ুঃ সর্বে সহদারা বনং চ তৎ
228.26
অষ্টৌ রথসহস্রাণি ত্রীণি নাগায়ুতানি চ
পত্তয়ো বহুসাহস্রা হয়াশ্চ নবতিঃ শতাঃ
228.27
শকটাপণবেশ্যাশ্চ বণিজো বন্দিনস্তথা
নরাশ্চ মৃগয়াশীলাঃ শতশোঽথ সহস্রশঃ
228.28
ততঃ প্রয়াণে নৃপতেঃ সুমহানভবত্স্বনঃ
প্রাবৃষীব মহাবায়োরুদ্ধতস্য বিশাং পতে
228.29
গব্যূতিমাত্রে ন্যবসদ্রাজা দুর্যোধনস্তদা
প্রয়াতো বাহনৈঃ সর্বৈস্ততো দ্বৈতবনং সরঃ