অধ্যায় 227

227.1

বৈশংপায়ন উবাচ
কর্ণস্য বচনং শ্রুত্বা রাজা দুর্যোধনস্তদা
হৃষ্টো ভূত্বা পুনর্দীন ইদং বচনমব্রবীৎ

ব্রবীষি যদিদং কর্ণ সর্বং মে মনসি স্থিতম্
ন ত্বভ্যনুজ্ঞাং লপ্স্যামি গমনে যত্র পাণ্ডবাঃ

পরিদেবতি তান্বীরান্ধৃতরাষ্ট্রো মহীপতিঃ
মন্যতেঽভ্যধিকাংশ্চাপি তপোয়োগেন পাণ্ডবান্

অথ বাপ্যনুবুধ্যেত নৃপোঽস্মাকং চিকীর্ষিতম্
এবমপ্যায়তিং রক্ষন্নাভ্যনুজ্ঞাতুমর্হতি

ন হি দ্বৈতবনে কিংচিদ্বিদ্যতেঽন্যত্প্রয়োজনম্
উত্সাদনমৃতে তেষাং বনস্থানাং মম দ্বিষাম্

জানাসি হি যথা ক্ষত্তা দ্যূতকাল উপস্থিতে
অব্রবীদ্যচ্চ মাং ত্বাং চ সৌবলং চ বচস্তদা

তানি পূর্বাণি বাক্যানি যচ্চান্যত্পরিদেবিতম্
বিচিন্ত্য নাধিগচ্ছামি গমনায়েতরায় বা

মমাপি হি মহান্হর্ষো যদহং ভীমফল্গুনৌ
ক্লিষ্টাবরণ্যে পশ্যেয়ং কৃষ্ণয়া সহিতাবিতি

ন তথা প্রাপ্নুয়াং প্রীতিমবাপ্য বসুধামপি
দৃষ্ট্বা যথা পাণ্ডুসুতান্বল্কলাজিনবাসসঃ

কিং নু স্যাদধিকং তস্মাদ্যদহং দ্রুপদাত্মজাম্
দ্রৌপদীং কর্ণ পশ্যেয়ং কাষায়বসনাং বনে

যদি মাং ধর্মরাজশ্চ ভীমসেনশ্চ পাণ্ডবঃ
যুক্তং পরময়া লক্ষ্ম্যা পশ্যেতাং জীবিতং ভবেৎ

উপায়ং ন তু পশ্যামি যেন গচ্ছেম তদ্বনম্
যথা চাভ্যনুজানীয়াদ্গচ্ছন্তং মাং মহীপতিঃ

স সৌবলেন সহিতস্তথা দুঃশাসনেন চ
উপায়ং পশ্য নিপুণং যেন গচ্ছেম তদ্বনম্

অহমপ্যদ্য নিশ্চিত্য গমনায়েতরায় বা
কাল্যমেব গমিষ্যামি সমীপং পার্থিবস্য হ

ময়ি তত্রোপবিষ্টে তু ভীষ্মে চ কুরুসত্তমে
উপায়ো যো ভবেদ্দৃষ্টস্তং ব্রূয়াঃ সহসৌবলঃ

ততো ভীষ্মস্য রাজ্ঞশ্চ নিশম্য গমনং প্রতি
ব্যবসায়ং করিষ্যেঽহমনুনীয় পিতামহম্

তথেত্যুক্ত্বা তু তে সর্বে জগ্মুরাবসথান্প্রতি
ব্যুষিতায়াং রজন্যাং তু কর্ণো রাজানমভ্যয়াৎ

ততো দুর্যোধনং কর্ণঃ প্রহসন্নিদমব্রবীৎ
উপায়ঃ পরিদৃষ্টোঽয়ং তং নিবোধ জনেশ্বর

ঘোষা দ্বৈতবনে সর্বে ত্বত্প্রতীক্ষা নরাধিপ
ঘোষয়াত্রাপদেশেন গমিষ্যামো ন সংশয়ঃ

উচিতং হি সদা গন্তুং ঘোষয়াত্রাং বিশাং পতে
এবং চ ত্বাং পিতা রাজন্সমনুজ্ঞাতুমর্হতি

তথা কথয়মানৌ তৌ ঘোষয়াত্রাবিনিশ্চয়ম্
গান্ধাররাজঃ শকুনিঃ প্রত্যুবাচ হসন্নিব

উপায়োঽয়ং ময়া দৃষ্টো গমনায় নিরাময়ঃ
অনুজ্ঞাস্যতি নো রাজা চোদয়িষ্যতি চাপ্যুত

ততঃ প্রহসিতাঃ সর্বে তেঽন্যোন্যস্য তলান্দদুঃ
তদেব চ বিনিশ্চিত্য দদৃশুঃ কুরুসত্তমম্