অধ্যায় 226

226.1

বৈশংপায়ন উবাচ
ধৃতরাষ্ট্রস্য তদ্বাক্যং নিশম্য সহসৌবলঃ
দুর্যোধনমিদং কালে কর্ণো বচনমব্রবীৎ

প্রব্রাজ্য পাণ্ডবান্বীরান্স্বেন বীর্যেণ ভারত
ভুঙ্ক্ষ্বেমাং পৃথিবীমেকো দিবং শম্বরহা যথা

প্রাচ্যাশ্চ দাক্ষিণাত্যাশ্চ প্রতীচ্যোদীচ্যবাসিনঃ
কৃতাঃ করপ্রদাঃ সর্বে রাজানস্তে নরাধিপ

যা হি সা দীপ্যমানেব পাণ্ডবান্ভজতে পুরা
সাদ্য লক্ষ্মীস্ত্বয়া রাজন্নবাপ্তা ভ্রাতৃভিঃ সহ

ইন্দ্রপ্রস্থগতে যাং তাং দীপ্যমানাং যুধিষ্ঠিরে
অপশ্যাম শ্রিয়ং রাজন্নচিরং শোককর্শিতাঃ

সা তু বুদ্ধিবলেনেয়ং রাজ্ঞস্তস্মাদ্যুধিষ্ঠিরাৎ
ত্বয়াক্ষিপ্তা মহাবাহো দীপ্যমানেব দৃশ্যতে

তথৈব তব রাজেন্দ্র রাজানঃ পরবীরহন্
শাসনেঽধিষ্ঠিতাঃ সর্বে কিং কুর্ম ইতি বাদিনঃ

তবাদ্য পৃথিবী রাজন্নিখিলা সাগরাম্বরা
সপর্বতবনা দেবী সগ্রামনগরাকরা
নানাবনোদ্দেশবতী পত্তনৈরুপশোভিতা

বন্দ্যমানো দ্বিজৈ রাজন্পূজ্যমানশ্চ রাজভিঃ
পৌরুষাদ্দিবি দেবেষু ভ্রাজসে রশ্মিবানিব

রুদ্রৈরিব যমো রাজা মরুদ্ভিরিব বাসবঃ
কুরুভিস্ত্বং বৃতো রাজন্ভাসি নক্ষত্ররাডিব

যে স্ম তে নাদ্রিয়ন্তেঽঽজ্ঞা নোদ্বিজন্তে কদা চ ন
পশ্যামস্তাঞ্শ্রিয়া হীনান্পাণ্ডবান্বনবাসিনঃ

শ্রূয়ন্তে হি মহারাজ সরো দ্বৈতবনং প্রতি
বসন্তঃ পাণ্ডবাঃ সার্ধং ব্রাহ্মণৈর্বনবাসিভিঃ

স প্রয়াহি মহারাজ শ্রিয়া পরময়া যুতঃ
প্রতপন্পাণ্ডুপুত্রাংস্ত্বং রশ্মিবানিব তেজসা

স্থিতো রাজ্যে চ্যুতান্রাজ্যাচ্ছ্রিয়া হীনাঞ্শ্রিয়া বৃতঃ
অসমৃদ্ধান্সমৃদ্ধার্থঃ পশ্য পাণ্ডুসুতান্নৃপ

মহাভিজনসংপন্নং ভদ্রে মহতি সংস্থিতম্
পাণ্ডবাস্ত্বাভিবীক্ষন্তাং যয়াতিমিব নাহুষম্

যাং শ্রিয়ং সুহৃদশ্চৈব দুর্হৃদশ্চ বিশাং পতে
পশ্যন্তি পুরুষে দীপ্তাং সা সমর্থা ভবত্যুত

সমস্থো বিষমস্থান্হি দুর্হৃদো যোঽভিবীক্ষতে
জগতীস্থানিবাদ্রিস্থঃ কিং ততঃ পরমং সুখম্

ন পুত্রধনলাভেন ন রাজ্যেনাপি বিন্দতি
প্রীতিং নৃপতিশার্দূল যামমিত্রাঘদর্শনাৎ

কিং নু তস্য সুখং ন স্যাদাশ্রমে যো ধনংজয়ম্
অভিবীক্ষেত সিদ্ধার্থো বল্কলাজিনবাসসম্

সুবাসসো হি তে ভার্যা বল্কলাজিনবাসসম্
পশ্যন্ত্বসুখিতাং কৃষ্ণাং সা চ নির্বিদ্যতাং পুনঃ
বিনিন্দতাং তথাত্মানং জীবিতং চ ধনচ্যুতা

ন তথা হি সভামধ্যে তস্যা ভবিতুমর্হতি
বৈমনস্যং যথা দৃষ্ট্বা তব ভার্যাঃ স্বলংকৃতাঃ

এবমুক্ত্বা তু রাজানং কর্ণঃ শকুনিনা সহ
তূষ্ণীং বভূবতুরুভৌ বাক্যান্তে জনমেজয়