UtshovChapter 226
226.1
वैशंपायन उवाच
धृतराष्ट्रस्य तद्वाक्यं निशम्य सहसौबलः
दुर्योधनमिदं काले कर्णो वचनमब्रवीत्
Vaishampayana uvacha
Dhritarashtrasya tadvakyam nishamya sahasaubalah
Duryodhanamidam kale karno vachanamabravit
226.2
प्रव्राज्य पाण्डवान्वीरान्स्वेन वीर्येण भारत
भुङ्क्ष्वेमां पृथिवीमेको दिवं शम्बरहा यथा
Pravrajya pandavanviransvena viryena bharata
Bhunkshvemam prithivimeko divam shambaraha yatha
226.3
प्राच्याश्च दाक्षिणात्याश्च प्रतीच्योदीच्यवासिनः
कृताः करप्रदाः सर्वे राजानस्ते नराधिप
Prachyashcha dakshinatyashcha pratichyodichyavasinah
Kritah karapradah sarve rajanaste naradhipa
226.4
या हि सा दीप्यमानेव पाण्डवान्भजते पुरा
साद्य लक्ष्मीस्त्वया राजन्नवाप्ता भ्रातृभिः सह
Ya hi sa dipyamaneva pandavanbhajate pura
Sadya lakshmistvaya rajannavapta bhratribhih saha
226.5
इन्द्रप्रस्थगते यां तां दीप्यमानां युधिष्ठिरे
अपश्याम श्रियं राजन्नचिरं शोककर्शिताः
Indraprasthagate yam tam dipyamanam yudhishthire
Apashyama shriyam rajannachiram shokakarshitah
226.6
सा तु बुद्धिबलेनेयं राज्ञस्तस्माद्युधिष्ठिरात्
त्वयाक्षिप्ता महाबाहो दीप्यमानेव दृश्यते
Sa tu buddhibaleneyam ragyastasmadyudhishthirat
Tvayakshipta mahabaho dipyamaneva drishyate
226.7
तथैव तव राजेन्द्र राजानः परवीरहन्
शासनेऽधिष्ठिताः सर्वे किं कुर्म इति वादिनः
Tathaiva tava rajendra rajanah paravirahan
Shasanedhishthitah sarve kim kurma iti vadinah
226.8
तवाद्य पृथिवी राजन्निखिला सागराम्बरा
सपर्वतवना देवी सग्रामनगराकरा
नानावनोद्देशवती पत्तनैरुपशोभिता
Tavadya prithivi rajannikhila sagarambara
Saparvatavana devi sagramanagarakara
Nanavanoddeshavati pattanairupashobhita
226.9
वन्द्यमानो द्विजै राजन्पूज्यमानश्च राजभिः
पौरुषाद्दिवि देवेषु भ्राजसे रश्मिवानिव
Vandyamano dvijai rajanpujyamanashcha rajabhih
Paurushaddivi deveshu bhrajase rashmivaniva
226.10
रुद्रैरिव यमो राजा मरुद्भिरिव वासवः
कुरुभिस्त्वं वृतो राजन्भासि नक्षत्रराडिव
Rudrairiva yamo raja marudbhiriva vasavah
Kurubhistvam vrito rajanbhasi nakshatraradiva
226.11
ये स्म ते नाद्रियन्तेऽऽज्ञा नोद्विजन्ते कदा च न
पश्यामस्ताञ्श्रिया हीनान्पाण्डवान्वनवासिनः
Ye sma te nadriyantegya nodvijante kada cha na
Pashyamastanshriya hinanpandavanvanavasinah
226.12
श्रूयन्ते हि महाराज सरो द्वैतवनं प्रति
वसन्तः पाण्डवाः सार्धं ब्राह्मणैर्वनवासिभिः
Shruyante hi maharaja saro dvaitavanam prati
Vasantah pandavah sardham brahmanairvanavasibhih
226.13
स प्रयाहि महाराज श्रिया परमया युतः
प्रतपन्पाण्डुपुत्रांस्त्वं रश्मिवानिव तेजसा
Sa prayahi maharaja shriya paramaya yutah
Pratapanpanduputranstvam rashmivaniva tejasa
226.14
स्थितो राज्ये च्युतान्राज्याच्छ्रिया हीनाञ्श्रिया वृतः
असमृद्धान्समृद्धार्थः पश्य पाण्डुसुतान्नृप
Sthito rajye chyutanrajyachchhriya hinanshriya vritah
Asamriddhansamriddharthah pashya pandusutannripa
226.15
महाभिजनसंपन्नं भद्रे महति संस्थितम्
पाण्डवास्त्वाभिवीक्षन्तां ययातिमिव नाहुषम्
Mahabhijanasampannam bhadre mahati sansthitam
Pandavastvabhivikshantam yayatimiva nahusham
226.16
यां श्रियं सुहृदश्चैव दुर्हृदश्च विशां पते
पश्यन्ति पुरुषे दीप्तां सा समर्था भवत्युत
Yam shriyam suhridashchaiva durhridashcha visham pate
Pashyanti purushe diptam sa samartha bhavatyuta
226.17
समस्थो विषमस्थान्हि दुर्हृदो योऽभिवीक्षते
जगतीस्थानिवाद्रिस्थः किं ततः परमं सुखम्
Samastho vishamasthanhi durhrido yobhivikshate
Jagatisthanivadristhah kim tatah paramam sukham
226.18
न पुत्रधनलाभेन न राज्येनापि विन्दति
प्रीतिं नृपतिशार्दूल याममित्राघदर्शनात्
Na putradhanalabhena na rajyenapi vindati
Pritim nripatishardula yamamitraghadarshanat
226.19
किं नु तस्य सुखं न स्यादाश्रमे यो धनंजयम्
अभिवीक्षेत सिद्धार्थो वल्कलाजिनवाससम्
Kim nu tasya sukham na syadashrame yo dhananjayam
Abhiviksheta siddhartho valkalajinavasasam
226.20
सुवाससो हि ते भार्या वल्कलाजिनवाससम्
पश्यन्त्वसुखितां कृष्णां सा च निर्विद्यतां पुनः
विनिन्दतां तथात्मानं जीवितं च धनच्युता
Suvasaso hi te bharya valkalajinavasasam
Pashyantvasukhitam krishnam sa cha nirvidyatam punah
Vinindatam tathatmanam jivitam cha dhanachyuta
226.21
न तथा हि सभामध्ये तस्या भवितुमर्हति
वैमनस्यं यथा दृष्ट्वा तव भार्याः स्वलंकृताः
Na tatha hi sabhamadhye tasya bhavitumarhati
Vaimanasyam yatha drishtva tava bharyah svalankritah
226.22
एवमुक्त्वा तु राजानं कर्णः शकुनिना सह
तूष्णीं बभूवतुरुभौ वाक्यान्ते जनमेजय
Evamuktva tu rajanam karnah shakunina saha
Tushnim babhuvaturubhau vakyante janamejaya