Utshovঅধ্যায় 225
225.1
জনমেজয় উবাচ
এবং বনে বর্তমানা নরাগ্র্যাঃ; শীতোষ্ণবাতাতপকর্শিতাঙ্গাঃ
সরস্তদাসাদ্য বনং চ পুণ্যং; ততঃ পরং কিমকুর্বন্ত পার্থাঃ
225.2
বৈশংপায়ন উবাচ
সরস্তদাসাদ্য তু পাণ্ডুপুত্রা; জনং সমুত্সৃজ্য বিধায় চৈষাম্
বনানি রম্যাণ্যথ পর্বতাংশ্চ; নদীপ্রদেশাংশ্চ তদা বিচেরুঃ
225.3
তথা বনে তান্বসতঃ প্রবীরা;ন্স্বাধ্যায়বন্তশ্চ তপোধনাশ্চ
অভ্যায়য়ুর্বেদবিদঃ পুরাণা;স্তান্পূজয়ামাসুরথো নরাগ্র্যাঃ
225.4
ততঃ কদাচিত্কুশলঃ কথাসু; বিপ্রোঽভ্যগচ্ছদ্ভুবি কৌরবেয়ান্
স তৈঃ সমেত্যাথ যদৃচ্ছয়ৈব; বৈচিত্রবীর্যং নৃপমভ্যগচ্ছৎ
225.5
অথোপবিষ্টঃ প্রতিসত্কৃতশ্চ; বৃদ্ধেন রাজ্ঞা কুরুসত্তমেন
প্রচোদিতঃ সন্কথয়াং বভূব; ধর্মানিলেন্দ্রপ্রভবান্যমৌ চ
225.6
কৃশাংশ্চ বাতাতপকর্শিতাঙ্গা;ন্দুঃখস্য চোগ্রস্য মুখে প্রপন্নান্
তাং চাপ্যনাথামিব বীরনাথাং; কৃষ্ণাং পরিক্লেশগুণেন যুক্তাম্
225.7
ততঃ কথাং তস্য নিশম্য রাজা; বৈচিত্রবীর্যঃ কৃপয়াভিতপ্তঃ
বনে স্থিতান্পার্থিবপুত্রপৌত্রা;ঞ্শ্রুত্বা তদা দুঃখনদীং প্রপন্নান্
225.8
প্রোবাচ দৈন্যাভিহতান্তরাত্মা; নিঃশ্বাসবাষ্পোপহতঃ স পার্থান্
বাচং কথংচিত্স্থিরতামুপেত্য; তত্সর্বমাত্মপ্রভবং বিচিন্ত্য
225.9
কথং নু সত্যঃ শুচিরার্যবৃত্তো; জ্যেষ্ঠঃ সুতানাং মম ধর্মরাজঃ
অজাতশত্রুঃ পৃথিবীতলস্থঃ; শেতে পুরা রাঙ্কবকূটশায়ী
225.10
প্রবোধ্যতে মাগধসূতপূগৈ;র্নিত্যং স্তুবদ্ভিঃ স্বয়মিন্দ্রকল্পঃ
পতত্রিসংঘৈঃ স জঘন্যরাত্রে; প্রবোধ্যতে নূনমিডাতলস্থঃ
225.11
কথং নু বাতাতপকর্শিতাঙ্গো; বৃকোদরঃ কোপপরিপ্লুতাঙ্গঃ
শেতে পৃথিব্যামতথোচিতাঙ্গঃ; কৃষ্ণাসমক্ষং বসুধাতলস্থঃ
225.12
তথার্জুনঃ সুকুমারো মনস্বী; বশে স্থিতো ধর্মসুতস্য রাজ্ঞঃ
বিদূয়মানৈরিব সর্বগাত্রৈ;র্ধ্রুবং ন শেতে বসতীরমর্ষাৎ
225.13
যমৌ চ কৃষ্ণাং চ যুধিষ্ঠিরং চ; ভীমং চ দৃষ্ট্বা সুখবিপ্রয়ুক্তান্
বিনিঃশ্বসন্সর্প ইবোগ্রতেজা; ধ্রুবং ন শেতে বসতীরমর্ষাৎ
225.14
তথা যমৌ চাপ্যসুখৌ সুখার্হৌ; সমৃদ্ধরূপাবমরৌ দিবীব
প্রজাগরস্থৌ ধ্রুবমপ্রশান্তৌ; ধর্মেণ সত্যেন চ বার্যমাণৌ
225.15
সমীরণেনাপি সমো বলেন; সমীরণস্যৈব সুতো বলীয়ান্
স ধর্মপাশেন সিতোগ্রতেজা; ধ্রুবং বিনিঃশ্বস্য সহত্যমর্ষম্
225.16
স চাপি ভূমৌ পরিবর্তমানো; বধং সুতানাং মম কাঙ্ক্ষমাণঃ
সত্যেন ধর্মেণ চ বার্যমাণঃ; কালং প্রতীক্ষত্যধিকো রণেঽন্যৈঃ
225.17
অজাতশত্রৌ তু জিতে নিকৃত্যা; দুঃশাসনো যত্পরুষাণ্যবোচৎ
তানি প্রবিষ্টানি বৃকোদরাঙ্গং; দহন্তি মর্মাগ্নিরিবেন্ধনানি
225.18
ন পাপকং ধ্যাস্যতি ধর্মপুত্রো; ধনংজয়শ্চাপ্যনুবর্ততে তম্
অরণ্যবাসেন বিবর্ধতে তু; ভীমস্য কোপোঽগ্নিরিবানিলেন
225.19
স তেন কোপেন বিদীর্যমাণঃ; করং করেণাভিনিপীড্য বীরঃ
বিনিঃশ্বসত্যুষ্ণমতীব ঘোরং; দহন্নিবেমান্মম পুত্রপৌত্রান্
225.20
গাণ্ডীবধন্বা চ বৃকোদরশ্চ; সংরম্ভিণাবন্তককালকল্পৌ
ন শেষয়েতাং যুধি শত্রুসেনাং; শরান্কিরন্তাবশনিপ্রকাশান্
225.21
দুর্যোধনঃ শকুনিঃ সূতপুত্রো; দুঃশাসনশ্চাপি সুমন্দচেতাঃ
মধু প্রপশ্যন্তি ন তু প্রপাতং; বৃকোদরং চৈব ধনংজয়ং চ
225.22
শুভাশুভং পুরুষঃ কর্ম কৃত্বা; প্রতীক্ষতে তস্য ফলং স্ম কর্তা
স তেন যুজ্যত্যবশঃ ফলেন; মোক্ষঃ কথং স্যাত্পুরুষস্য তস্মাৎ
225.23
ক্ষেত্রে সুকৃষ্টে হ্যুপিতে চ বীজে; দেবে চ বর্ষত্যৃতুকালয়ুক্তম্
ন স্যাত্ফলং তস্য কুতঃ প্রসিদ্ধি;রন্যত্র দৈবাদিতি চিন্তয়ামি
225.24
কৃতং মতাক্ষেণ যথা ন সাধু; সাধুপ্রবৃত্তেন চ পাণ্ডবেন
ময়া চ দুষ্পুত্রবশানুগেন; যথা কুরূণাময়মন্তকালঃ
225.25
ধ্রুবং প্রবাস্যত্যসমীরিতোঽপি; ধ্রুবং প্রজাস্যত্যুত গর্ভিণী যা
ধ্রুবং দিনাদৌ রজনীপ্রণাশ;স্তথা ক্ষপাদৌ চ দিনপ্রণাশঃ
225.26
ক্রিয়েত কস্মান্ন পরে চ কুর্যু;র্বিত্তং ন দদ্যুঃ পুরুষাঃ কথংচিৎ
প্রাপ্যার্থকালং চ ভবেদনর্থঃ; কথং নু তত্স্যাদিতি তত্কুতঃ স্যাৎ
225.27
কথং ন ভিদ্যেত ন চ স্রবেত; ন চ প্রসিচ্যেদিতি রক্ষিতব্যম্
অরক্ষ্যমাণঃ শতধা বিশীর্যে;দ্ধ্রুবং ন নাশোঽস্তি কৃতস্য লোকে
225.28
গতো হ্যরণ্যাদপি শক্রলোকং; ধনংজয়ঃ পশ্যত বীর্যমস্য
অস্ত্রাণি দিব্যানি চতুর্বিধানি; জ্ঞাত্বা পুনর্লোকমিমং প্রপন্নঃ
225.29
স্বর্গং হি গত্বা সশরীর এব; কো মানুষঃ পুনরাগন্তুমিচ্ছেৎ
অন্যত্র কালোপহতাননেকা;ন্সমীক্ষমাণস্তু কুরূন্মুমূর্ষূন্
225.30
ধনুর্গ্রাহশ্চার্জুনঃ সব্যসাচী; ধনুশ্চ তদ্গাণ্ডিবং লোকসারম্
অস্ত্রাণি দিব্যানি চ তানি তস্য; ত্রয়স্য তেজঃ প্রসহেত কো নু
225.31
নিশম্য তদ্বচনং পার্থিবস্য; দুর্যোধনো রহিতে সৌবলশ্চ
অবোধয়ত্কর্ণমুপেত্য সর্বং; স চাপ্যহৃষ্টোঽভবদল্পচেতাঃ