অধ্যায় 224

224.1

বৈশংপায়ন উবাচ
মার্কণ্ডেয়াদিভির্বিপ্রৈঃ পাণ্ডবৈশ্চ মহাত্মভিঃ
কথাভিরনুকূলাভিঃ সহাসিত্বা জনার্দনঃ

ততস্তৈঃ সংবিদং কৃত্বা যথাবন্মধুসূদনঃ
আরুরুক্ষূ রথং সত্যামাহ্বয়ামাস কেশবঃ

সত্যভামা ততস্তত্র স্বজিত্বা দ্রুপদাত্মজাম্
উবাচ বচনং হৃদ্যং যথাভাবসমাহিতম্

কৃষ্ণে মা ভূত্তবোত্কণ্ঠা মা ব্যথা মা প্রজাগরঃ
ভর্তৃভির্দেবসংকাশৈর্জিতাং প্রাপ্স্যসি মেদিনীম্

ন হ্যেবং শীলসংপন্না নৈবং পূজিতলক্ষণাঃ
প্রাপ্নুবন্তি চিরং ক্লেশং যথা ত্বমসিতেক্ষণে

অবশ্যং চ ত্বয়া ভূমিরিয়ং নিহতকণ্টকা
ভর্তৃভিঃ সহ ভোক্তব্যা নির্দ্বংদ্বেতি শ্রুতং ময়া

ধার্তরাষ্ট্রবধং কৃত্বা বৈরাণি প্রতিয়াত্য চ
যুধিষ্ঠিরস্থাং পৃথিবীং দ্রষ্টাসি দ্রুপদাত্মজে

যাস্তাঃ প্রব্রাজমানাং ত্বাং প্রাহসন্দর্পমোহিতাঃ
তাঃ ক্ষিপ্রং হতসংকল্পা দ্রক্ষ্যসি ত্বং কুরুস্ত্রিয়ঃ

তব দুঃখোপপন্নায়া যৈরাচরিতমপ্রিয়ম্
বিদ্ধি সংপ্রস্থিতান্সর্বাংস্তান্কৃষ্ণে যমসাদনম্

পুত্রস্তে প্রতিবিন্ধ্যশ্চ সুতসোমস্তথা বিভুঃ
শ্রুতকর্মার্জুনিশ্চৈব শতানীকশ্চ নাকুলিঃ
সহদেবাচ্চ যো জাতঃ শ্রুতসেনস্তবাত্মজঃ

সর্বে কুশলিনো বীরাঃ কৃতাস্ত্রাশ্চ সুতাস্তব
অভিমন্যুরিব প্রীতা দ্বারবত্যাং রতা ভৃশম্

ত্বমিবৈষাং সুভদ্রা চ প্রীত্যা সর্বাত্মনা স্থিতা
প্রীয়তে ভাবনির্দ্বংদ্বা তেভ্যশ্চ বিগতজ্বরা

ভেজে সর্বাত্মনা চৈব প্রদ্যুম্নজননী তথা
ভানুপ্রভৃতিভিশ্চৈনান্বিশিনষ্টি চ কেশবঃ

ভোজনাচ্ছাদনে চৈষাং নিত্যং মে শ্বশুরঃ স্থিতঃ
রামপ্রভৃতয়ঃ সর্বে ভজন্ত্যন্ধকবৃষ্ণয়ঃ
তুল্যো হি প্রণয়স্তেষাং প্রদ্যুম্নস্য চ ভামিনি

এবমাদি প্রিয়ং প্রীত্যা হৃদ্যমুক্ত্বা মনোনুগম্
গমনায় মনশ্চক্রে বাসুদেবরথং প্রতি

তাং কৃষ্ণাং কৃষ্ণমহিষী চকারাভিপ্রদক্ষিণম্
আরুরোহ রথং শৌরেঃ সত্যভামা চ ভামিনী

স্ময়িত্বা তু যদুশ্রেষ্ঠো দ্রৌপদীং পরিসান্ত্ব্য চ
উপাবর্ত্য ততঃ শীঘ্রৈর্হয়ৈঃ প্রায়াত্পরংতপঃ