অধ্যায় 223

223.1

দ্রৌপদ্যুবাচ
ইমং তু তে মার্গমপেতদোষং; বক্ষ্যামি চিত্তগ্রহণায় ভর্তুঃ
যস্মিন্যথাবত্সখি বর্তমানা; ভর্তারমাচ্ছেত্স্যসি কামিনীভ্যঃ

নৈতাদৃশং দৈবতমস্তি সত্যে; সর্বেষু লোকেষু সদৈবতেষু
যথা পতিস্তস্য হি সর্বকামা; লভ্যাঃ প্রসাদে কুপিতশ্চ হন্যাৎ

তস্মাদপত্যং বিবিধাশ্চ ভোগাঃ; শয্যাসনান্যদ্ভুতদর্শনানি
বস্ত্রাণি মাল্যানি তথৈব গন্ধাঃ; স্বর্গশ্চ লোকো বিষমা চ কীর্তিঃ

সুখং সুখেনেহ ন জাতু লভ্যং; দুঃখেন সাধ্বী লভতে সুখানি
সা কৃষ্ণমারাধয় সৌহৃদেন; প্রেম্ণা চ নিত্যং প্রতিকর্মণা চ

তথাশনৈশ্চারুভিরগ্র্যমাল্যৈ;র্দাক্ষিণ্যয়োগৈর্বিবিধৈশ্চ গন্ধৈঃ
অস্যাঃ প্রিয়োঽস্মীতি যথা বিদিত্বা; ত্বামেব সংশ্লিষ্যতি সর্বভাবৈঃ

শ্রুত্বা স্বরং দ্বারগতস্য ভর্তুঃ; প্রত্যুত্থিতা তিষ্ঠ গৃহস্য মধ্যে
দৃষ্ট্বা প্রবিষ্টং ত্বরিতাসনেন; পাদ্যেন চৈব প্রতিপূজয় ত্বম্

সংপ্রেষিতায়ামথ চৈব দাস্যা;মুত্থায় সর্বং স্বয়মেব কুর্যাঃ
জানাতু কৃষ্ণস্তব ভাবমেতং; সর্বাত্মনা মাং ভজতীতি সত্যে

ত্বত্সংনিধৌ যত্কথয়েত্পতিস্তে; যদ্যপ্যগুহ্যং পরিরক্ষিতব্যম্
কাচিত্সপত্নী তব বাসুদেবং; প্রত্যাদিশেত্তেন ভবেদ্বিরাগঃ

প্রিয়াংশ্চ রক্তাংশ্চ হিতাংশ্চ ভর্তু;স্তান্ভোজয়েথা বিবিধৈরুপায়ৈঃ
দ্বেষ্যৈরপক্ষৈরহিতৈশ্চ তস্য; ভিদ্যস্ব নিত্যং কুহকোদ্ধতৈশ্চ

মদং প্রমাদং পুরুষেষু হিত্বা; সংয়চ্ছ ভাবং প্রতিগৃহ্য মৌনম্
প্রদ্যুম্নসাম্বাবপি তে কুমারৌ; নোপাসিতব্যৌ রহিতে কদাচিৎ

মহাকুলীনাভিরপাপিকাভিঃ; স্ত্রীভিঃ সতীভিস্তব সখ্যমস্তু
চণ্ডাশ্চ শৌণ্ডাশ্চ মহাশনাশ্চ; চৌরাশ্চ দুষ্টাশ্চপলাশ্চ বর্জ্যাঃ

এতদ্যশস্যং ভগবেদনং চ; স্বর্গ্যং তথা শত্রুনিবর্হণং চ
মহার্হমাল্যাভরণাঙ্গরাগা; ভর্তারমারাধয় পুণ্যগন্ধা