Utshovঅধ্যায় 222
222.1
বৈশংপায়ন উবাচ
উপাসীনেষু বিপ্রেষু পাণ্ডবেষু মহাত্মসু
দ্রৌপদী সত্যভামা চ বিবিশাতে তদা সমম্
জাহস্যমানে সুপ্রীতে সুখং তত্র নিষীদতুঃ
222.2
চিরস্য দৃষ্ট্বা রাজেন্দ্র তেঽন্যোন্যস্য প্রিয়ংবদে
কথয়ামাসতুশ্চিত্রাঃ কথাঃ কুরুয়দুক্ষিতাম্
222.3
অথাব্রবীত্সত্যভামা কৃষ্ণস্য মহিষী প্রিয়া
সাত্রাজিতী যাজ্ঞসেনীং রহসীদং সুমধ্যমা
222.4
কেন দ্রৌপদি বৃত্তেন পাণ্ডবানুপতিষ্ঠসি
লোকপালোপমান্বীরান্যূনঃ পরমসংমতান্
কথং চ বশগাস্তুভ্যং ন কুপ্যন্তি চ তে শুভে
222.5
তব বশ্যা হি সততং পাণ্ডবাঃ প্রিয়দর্শনে
মুখপ্রেক্ষাশ্চ তে সর্বে তত্ত্বমেতদ্ব্রবীহি মে
222.6
ব্রতচর্যা তপো বাপি স্নানমন্ত্রৌষধানি বা
বিদ্যাবীর্যং মূলবীর্যং জপহোমস্তথাগদাঃ
222.7
মম আচক্ষ্ব পাঞ্চালি যশস্যং ভগবেদনম্
যেন কৃষ্ণে ভবেন্নিত্যং মম কৃষ্ণো বশানুগঃ
222.8
এবমুক্ত্বা সত্যভামা বিররাম যশস্বিনী
পতিব্রতা মহাভাগা দ্রৌপদী প্রত্যুবাচ তাম্
222.9
অসত্স্ত্রীণাং সমাচারং সত্যে মামনুপৃচ্ছসি
অসদাচরিতে মার্গে কথং স্যাদনুকীর্তনম্
222.10
অনুপ্রশ্নঃ সংশয়ো বা নৈতত্ত্বয্যুপপদ্যতে
তথা হ্যুপেতা বুদ্ধ্যা ত্বং কৃষ্ণস্য মহিষী প্রিয়া
222.11
যদৈব ভর্তা জানীয়ান্মন্ত্রমূলপরাং স্ত্রিয়ম্
উদ্বিজেত তদৈবাস্যাঃ সর্পাদ্বেশ্মগতাদিব
222.12
উদ্বিগ্নস্য কুতঃ শান্তিরশান্তস্য কুতঃ সুখম্
ন জাতু বশগো ভর্তা স্ত্রিয়াঃ স্যান্মন্ত্রকারণাৎ
222.13
অমিত্রপ্রহিতাংশ্চাপি গদান্পরমদারুণান্
মূলপ্রবাদৈর্হি বিষং প্রয়চ্ছন্তি জিঘাংসবঃ
222.14
জিহ্বয়া যানি পুরুষস্ত্বচা বাপ্যুপসেবতে
তত্র চূর্ণানি দত্তানি হন্যুঃ ক্ষিপ্রমসংশয়ম্
222.15
জলোদরসমায়ুক্তাঃ শ্বিত্রিণঃ পলিতাস্তথা
অপুমাংসঃ কৃতাঃ স্ত্রীভির্জডান্ধবধিরাস্তথা
222.16
পাপানুগাস্তু পাপাস্তাঃ পতীনুপসৃজন্ত্যুত
ন জাতু বিপ্রিয়ং ভর্তুঃ স্ত্রিয়া কার্যং কথংচন
222.17
বর্তাম্যহং তু যাং বৃত্তিং পাণ্ডবেষু মহাত্মসু
তাং সর্বাং শৃণু মে সত্যাং সত্যভামে যশস্বিনি
222.18
অহংকারং বিহায়াহং কামক্রোধৌ চ সর্বদা
সদারান্পাণ্ডবান্নিত্যং প্রয়তোপচরাম্যহম্
222.19
প্রণয়ং প্রতিসংগৃহ্য নিধায়াত্মানমাত্মনি
শুশ্রূষুর্নিরভীমানা পতীনাং চিত্তরক্ষিণী
222.20
দুর্ব্যাহৃতাচ্ছঙ্কমানা দুঃস্থিতাদ্দুরবেক্ষিতাৎ
দুরাসিতাদ্দুর্ব্রজিতাদিঙ্গিতাধ্যাসিতাদপি
222.21
সূর্যবৈশ্বানরনিভান্সোমকল্পান্মহারথান্
সেবে চক্ষুর্হণঃ পার্থানুগ্রতেজঃপ্রতাপিনঃ
222.22
দেবো মনুষ্যো গন্ধর্বো যুবা চাপি স্বলংকৃতঃ
দ্রব্যবানভিরূপো বা ন মেঽন্যঃ পুরুষো মতঃ
222.23
নাভুক্তবতি নাস্নাতে নাসংবিষ্টে চ ভর্তরি
ন সংবিশামি নাশ্নামি সদা কর্মকরেষ্বপি
222.24
ক্ষেত্রাদ্বনাদ্বা গ্রামাদ্বা ভর্তারং গৃহমাগতম্
প্রত্যুত্থায়াভিনন্দামি আসনেনোদকেন চ
222.25
প্রমৃষ্টভাণ্ডা মৃষ্টান্না কালে ভোজনদায়িনী
সংয়তা গুপ্তধান্যা চ সুসংমৃষ্টনিবেশনা
222.26
অতিরস্কৃতসংভাষা দুঃস্ত্রিয়ো নানুসেবতী
অনুকূলবতী নিত্যং ভবাম্যনলসা সদা
222.27
অনর্মে চাপি হসনং দ্বারি স্থানমভীক্ষ্ণশঃ
অবস্করে চিরস্থানং নিষ্কুটেষু চ বর্জয়ে
222.28
অতিহাসাতিরোষৌ চ ক্রোধস্থানং চ বর্জয়ে
নিরতাহং সদা সত্যে ভর্তৄণামুপসেবনে
সর্বথা ভর্তৃরহিতং ন মমেষ্টং কথংচন
222.29
যদা প্রবসতে ভর্তা কুটুম্বার্থেন কেনচিৎ
সুমনোবর্ণকাপেতা ভবামি ব্রতচারিণী
222.30
যচ্চ ভর্তা ন পিবতি যচ্চ ভর্তা ন খাদতি
যচ্চ নাশ্নাতি মে ভর্তা সর্বং তদ্বর্জয়াম্যহম্
222.31
যথোপদেশং নিয়তা বর্তমানা বরাঙ্গনে
স্বলংকৃতা সুপ্রয়তা ভর্তুঃ প্রিয়হিতে রতা
222.32
যে চ ধর্মাঃ কুটুম্বেষু শ্বশ্র্বা মে কথিতাঃ পুরা
ভিক্ষাবলিশ্রাদ্ধমিতি স্থালীপাকাশ্চ পর্বসু
মান্যানাং মানসত্কারা যে চান্যে বিদিতা ময়া
222.33
তান্সর্বাননুবর্তামি দিবারাত্রমতন্দ্রিতা
বিনয়ান্নিয়মাংশ্চাপি সদা সর্বাত্মনা শ্রিতা
222.34
মৃদূন্সতঃ সত্যশীলান্সত্যধর্মানুপালিনঃ
আশীবিষানিব ক্রুদ্ধান্পতীন্পরিচরাম্যহম্
222.35
পত্যাশ্রয়ো হি মে ধর্মো মতঃ স্ত্রীণাং সনাতনঃ
স দেবঃ সা গতির্নান্যা তস্য কা বিপ্রিয়ং চরেৎ
222.36
অহং পতীন্নাতিশয়ে নাত্যশ্নে নাতিভূষয়ে
নাপি পরিবদে শ্বশ্রূং সর্বদা পরিয়ন্ত্রিতা
222.37
অবধানেন সুভগে নিত্যোত্থানতয়ৈব চ
ভর্তারো বশগা মহ্যং গুরুশুশ্রূষণেন চ
222.38
নিত্যমার্যামহং কুন্তীং বীরসূং সত্যবাদিনীম্
স্বয়ং পরিচরাম্যেকা স্নানাচ্ছাদনভোজনৈঃ
222.39
নৈতামতিশয়ে জাতু বস্ত্রভূষণভোজনৈঃ
নাপি পরিবদে চাহং তাং পৃথাং পৃথিবীসমাম্
222.40
অষ্টাবগ্রে ব্রাহ্মণানাং সহস্রাণি স্ম নিত্যদা
ভুঞ্জতে রুক্মপাত্রীষু যুধিষ্ঠিরনিবেশনে
222.41
অষ্টাশীতিসহস্রাণি স্নাতকা গৃহমেধিনঃ
ত্রিংশদ্দাসীক একৈকো যান্বিভর্তি যুধিষ্ঠিরঃ
222.42
দশান্যানি সহস্রাণি যেষামন্নং সুসংস্কৃতম্
হ্রিয়তে রুক্মপাত্রীভির্যতীনামূর্ধ্বরেতসাম্
222.43
তান্সর্বানগ্রহারেণ ব্রাহ্মণান্ব্রহ্মবাদিনঃ
যথার্হং পূজয়ামি স্ম পানাচ্ছাদনভোজনৈঃ
222.44
শতং দাসীসহস্রাণি কৌন্তেয়স্য মহাত্মনঃ
কম্বুকেয়ূরধারিণ্যো নিষ্ককণ্ঠ্যঃ স্বলংকৃতাঃ
222.45
মহার্হমাল্যাভরণাঃ সুবর্ণাশ্চন্দনোক্ষিতাঃ
মণীন্হেম চ বিভ্রত্যো নৃত্যগীতবিশারদাঃ
222.46
তাসাং নাম চ রূপং চ ভোজনাচ্ছাদনানি চ
সর্বাসামেব বেদাহং কর্ম চৈব কৃতাকৃতম্
222.47
শতং দাসীসহস্রাণি কুন্তীপুত্রস্য ধীমতঃ
পাত্রীহস্তা দিবারাত্রমতিথীন্ভোজয়ন্ত্যুত
222.48
শতমশ্বসহস্রাণি দশ নাগায়ুতানি চ
যুধিষ্ঠিরস্যানুয়াত্রমিন্দ্রপ্রস্থনিবাসিনঃ
222.49
এতদাসীত্তদা রাজ্ঞো যন্মহীং পর্যপালয়ৎ
যেষাং সংখ্যাবিধিং চৈব প্রদিশামি শৃণোমি চ
222.50
অন্তঃপুরাণাং সর্বেষাং ভৃত্যানাং চৈব সর্বশঃ
আ গোপালাবিপালেভ্যঃ সর্বং বেদ কৃতাকৃতম্
222.51
সর্বং রাজ্ঞঃ সমুদয়মায়ং চ ব্যয়মেব চ
একাহং বেদ্মি কল্যাণি পাণ্ডবানাং যশস্বিনাম্
222.52
ময়ি সর্বং সমাসজ্য কুটুম্বং ভরতর্ষভাঃ
উপাসনরতাঃ সর্বে ঘটন্তে স্ম শুভাননে
222.53
তমহং ভারমাসক্তমনাধৃষ্যং দুরাত্মভিঃ
সুখং সর্বং পরিত্যজ্য রাত্র্যহানি ঘটামি বৈ
222.54
অধৃষ্যং বরুণস্যেব নিধিপূর্ণমিবোদধিম্
একাহং বেদ্মি কোশং বৈ পতীনাং ধর্মচারিণাম্
222.55
অনিশায়াং নিশায়াং চ সহায়াঃ ক্ষুত্পিপাসয়োঃ
আরাধয়ন্ত্যাঃ কৌরব্যাংস্তুল্যা রাত্রিরহশ্চ মে
222.56
প্রথমং প্রতিবুধ্যামি চরমং সংবিশামি চ
নিত্যকালমহং সত্যে এতত্সংবননং মম
222.57
এতজ্জানাম্যহং কর্তুং ভর্তৃসংবননং মহৎ
অসত্স্ত্রীণাং সমাচারং নাহং কুর্যাং ন কাময়ে
222.58
তচ্ছ্রুত্বা ধর্মসহিতং ব্যাহৃতং কৃষ্ণয়া তদা
উবাচ সত্যা সত্কৃত্য পাঞ্চালীং ধর্মচারিণীম্
222.59
অভিপন্নাস্মি পাঞ্চালি যাজ্ঞসেনি ক্ষমস্ব মে
কামকারঃ সখীনাং হি সোপহাসং প্রভাষিতুম্