Utshovঅধ্যায় 221
221.1
মার্কণ্ডেয় উবাচ
যদাভিষিক্তো ভগবান্সেনাপত্যেন পাবকিঃ
তদা সংপ্রস্থিতঃ শ্রীমান্হৃষ্টো ভদ্রবটং হরঃ
রথেনাদিত্যবর্ণেন পার্বত্যা সহিতঃ প্রভুঃ
221.2
সহস্রং তস্য সিংহানাং তস্মিন্যুক্তং রথোত্তমে
উত্পপাত দিবং শুভ্রং কালেনাভিপ্রচোদিতঃ
221.3
তে পিবন্ত ইবাকাশং ত্রাসয়ন্তশ্চরাচরান্
সিংহা নভস্যগচ্ছন্ত নদন্তশ্চারুকেসরাঃ
221.4
তস্মিন্রথে পশুপতিঃ স্থিতো ভাত্যুময়া সহ
বিদ্যুতা সহিতঃ সূর্যঃ সেন্দ্রচাপে ঘনে যথা
221.5
অগ্রতস্তস্য ভগবান্ধনেশো গুহ্যকৈঃ সহ
আস্থায় রুচিরং যাতি পুষ্পকং নরবাহনঃ
221.6
ঐরাবতং সমাস্থায় শক্রশ্চাপি সুরৈঃ সহ
পৃষ্ঠতোঽনুয়য়ৌ যান্তং বরদং বৃষভধ্বজম্
221.7
জম্ভকৈর্যক্ষরক্ষোভিঃ স্রগ্বিভিঃ সমলংকৃতঃ
যাত্যমোঘো মহায়ক্ষো দক্ষিণং পক্ষমাস্থিতঃ
221.8
তস্য দক্ষিণতো দেবা মরুতশ্চিত্রয়োধিনঃ
গচ্ছন্তি বসুভিঃ সার্ধং রুদ্রৈশ্চ সহ সংগতাঃ
221.9
যমশ্চ মৃত্যুনা সার্ধং সর্বতঃ পরিবারিতঃ
ঘোরৈর্ব্যাধিশতৈর্যাতি ঘোররূপবপুস্তথা
221.10
যমস্য পৃষ্ঠতশ্চৈব ঘোরস্ত্রিশিখরঃ শিতঃ
বিজয়ো নাম রুদ্রস্য যাতি শূলঃ স্বলংকৃতঃ
221.11
তমুগ্রপাশো বরুণো ভগবান্সলিলেশ্বরঃ
পরিবার্য শনৈর্যাতি যাদোভির্বিবিধৈর্বৃতঃ
221.12
পৃষ্ঠতো বিজয়স্যাপি যাতি রুদ্রস্য পট্টিশঃ
গদামুসলশক্ত্যাদ্যৈর্বৃতঃ প্রহরণোত্তমৈঃ
221.13
পট্টিশং ত্বন্বগাদ্রাজংশ্ছত্রং রৌদ্রং মহাপ্রভম্
কমণ্ডলুশ্চাপ্যনু তং মহর্ষিগণসংবৃতঃ
221.14
তস্য দক্ষিণতো ভাতি দণ্ডো গচ্ছঞ্শ্রিয়া বৃতঃ
ভৃগ্বঙ্গিরোভিঃ সহিতো দেবৈশ্চাপ্যভিপূজিতঃ
221.15
এষাং তু পৃষ্ঠতো রুদ্রো বিমলে স্যন্দনে স্থিতঃ
যাতি সংহর্ষয়ন্সর্বাংস্তেজসা ত্রিদিবৌকসঃ
221.16
ঋষয়শ্চৈব দেবাশ্চ গন্ধর্বা ভুজগাস্তথা
নদ্যো নদা দ্রুমাশ্চৈব তথৈবাপ্সরসাং গণাঃ
221.17
নক্ষত্রাণি গ্রহাশ্চৈব দেবানাং শিশবশ্চ যে
স্ত্রিয়শ্চ বিবিধাকারা যান্তি রুদ্রস্য পৃষ্ঠতঃ
সৃজন্ত্যঃ পুষ্পবর্ষাণি চারুরূপা বরাঙ্গনাঃ
221.18
পর্জন্যশ্চাপ্যনুয়য়ৌ নমস্কৃত্য পিনাকিনম্
ছত্রং তু পাণ্ডুরং সোমস্তস্য মূর্ধন্যধারয়ৎ
চামরে চাপি বায়ুশ্চ গৃহীত্বাগ্নিশ্চ বিষ্ঠিতৌ
221.19
শক্রশ্চ পৃষ্ঠতস্তস্য যাতি রাজঞ্শ্রিয়া বৃতঃ
সহ রাজর্ষিভিঃ সর্বৈঃ স্তুবানো বৃষকেতনম্
221.20
গৌরী বিদ্যাথ গান্ধারী কেশিনী মিত্রসাহ্বয়া
সাবিত্র্যা সহ সর্বাস্তাঃ পার্বত্যা যান্তি পৃষ্ঠতঃ
221.21
তত্র বিদ্যাগণাঃ সর্বে যে কেচিত্কবিভিঃ কৃতাঃ
যস্য কুর্বন্তি বচনং সেন্দ্রা দেবাশ্চমূমুখে
221.22
স গৃহীত্বা পতাকাং তু যাত্যগ্রে রাক্ষসো গ্রহঃ
ব্যাপৃতস্তু শ্মশানে যো নিত্যং রুদ্রস্য বৈ সখা
পিঙ্গলো নাম যক্ষেন্দ্রো লোকস্যানন্দদায়কঃ
221.23
এভিঃ স সহিতস্তত্র যয়ৌ দেবো যথাসুখম্
অগ্রতঃ পৃষ্ঠতশ্চৈব ন হি তস্য গতির্ধ্রুবা
221.24
রুদ্রং সত্কর্মভির্মর্ত্যাঃ পূজয়ন্তীহ দৈবতম্
শিবমিত্যেব যং প্রাহুরীশং রুদ্রং পিনাকিনম্
ভাবৈস্তু বিবিধাকারৈঃ পূজয়ন্তি মহেশ্বরম্
221.25
দেবসেনাপতিস্ত্বেবং দেবসেনাভিরাবৃতঃ
অনুগচ্ছতি দেবেশং ব্রহ্মণ্যঃ কৃত্তিকাসুতঃ
221.26
অথাব্রবীন্মহাসেনং মহাদেবো বৃহদ্বচঃ
সপ্তমং মারুতস্কন্ধং রক্ষ নিত্যমতন্দ্রিতঃ
221.27
স্কন্দ উবাচ
সপ্তমং মারুতস্কন্ধং পালয়িষ্যাম্যহং প্রভো
যদন্যদপি মে কার্যং দেব তদ্বদ মাচিরম্
221.28
রুদ্র উবাচ
কার্যেষ্বহং ত্বয়া পুত্র সংদ্রষ্টব্যঃ সদৈব হি
দর্শনান্মম ভক্ত্যা চ শ্রেয়ঃ পরমবাপ্স্যসি
221.29
মার্কণ্ডেয় উবাচ
ইত্যুক্ত্বা বিসসর্জৈনং পরিষ্বজ্য মহেষ্বরঃ
বিসর্জিতে ততঃ স্কন্দে বভূবৌত্পাতিকং মহৎ
সহসৈব মহারাজ দেবান্সর্বান্প্রমোহয়ৎ
221.30
জজ্বাল খং সনক্ষত্রং প্রমূঢং ভুবনং ভৃশম্
চচাল ব্যনদচ্চোর্বী তমোভূতং জগত্প্রভো
221.31
ততস্তদ্দারুণং দৃষ্ট্বা ক্ষুভিতঃ শংকরস্তদা
উমা চৈব মহাভাগা দেবাশ্চ সমহর্ষয়ঃ
221.32
ততস্তেষু প্রমূঢেষু পর্বতাম্বুদসংনিভম্
নানাপ্রহরণং ঘোরমদৃশ্যত মহদ্বলম্
221.33
তদ্ধি ঘোরমসংখ্যেয়ং গর্জচ্চ বিবিধা গিরঃ
অভ্যদ্রবদ্রণে দেবান্ভগবন্তং চ শংকরম্
221.34
তৈর্বিসৃষ্টান্যনীকেষু বাণজালান্যনেকশঃ
পর্বতাশ্চ শতঘ্ন্যশ্চ প্রাসাশ্চ পরিঘা গদাঃ
221.35
নিপতদ্ভিশ্চ তৈর্ঘোরৈর্দেবানীকং মহায়ুধৈঃ
ক্ষণেন ব্যদ্রবত্সর্বং বিমুখং চাপ্যদৃশ্যত
221.36
নিকৃত্তয়োধনাগাশ্বং কৃত্তায়ুধমহারথম্
দানবৈরর্দিতং সৈন্যং দেবানাং বিমুখং বভৌ
221.37
অসুরৈর্বধ্যমানং তত্পাবকৈরিব কাননম্
অপতদ্দগ্ধভূয়িষ্ঠং মহাদ্রুমবনং যথা
221.38
তে বিভিন্নশিরোদেহাঃ প্রচ্যবন্তে দিবৌকসঃ
ন নাথমধ্যগচ্ছন্ত বধ্যমানা মহারণে
221.39
অথ তদ্বিদ্রুতং সৈন্যং দৃষ্ট্বা দেবঃ পুরংদরঃ
আশ্বাসয়ন্নুবাচেদং বলবদ্দানবার্দিতম্
221.40
ভয়ং ত্যজত ভদ্রং বঃ শূরাঃ শস্ত্রাণি গৃহ্ণত
কুরুধ্বং বিক্রমে বুদ্ধিং মা বঃ কাচিদ্ব্যথা ভবেৎ
221.41
জয়তৈনান্সুদুর্বৃত্তান্দানবান্ঘোরদর্শনান্
অভিদ্রবত ভদ্রং বো ময়া সহ মহাসুরান্
221.42
শক্রস্য বচনং শ্রুত্বা সমাশ্বস্তা দিবৌকসঃ
দানবান্প্রত্যয়ুধ্যন্ত শক্রং কৃত্বা ব্যপাশ্রয়ম্
221.43
ততস্তে ত্রিদশাঃ সর্বে মরুতশ্চ মহাবলাঃ
প্রত্যুদ্যয়ুর্মহাবেগাঃ সাধ্যাশ্চ বসুভিঃ সহ
221.44
তৈর্বিসৃষ্টান্যনীকেষু ক্রুদ্ধৈঃ শস্ত্রাণি সংয়ুগে
শরাশ্চ দৈত্যকায়েষু পিবন্তি স্মাসৃগুল্বণম্
221.45
তেষাং দেহান্বিনির্ভিদ্য শরাস্তে নিশিতাস্তদা
নিষ্পতন্তো অদৃশ্যন্ত নগেভ্য ইব পন্নগাঃ
221.46
তানি দৈত্যশরীরাণি নির্ভিন্নানি স্ম সায়কৈঃ
অপতন্ভূতলে রাজংশ্ছিন্নাভ্রাণীব সর্বশঃ
221.47
ততস্তদ্দানবং সৈন্যং সর্বৈর্দেবগণৈর্যুধি
ত্রাসিতং বিবিধৈর্বাণৈঃ কৃতং চৈব পরাঙ্মুখম্
221.48
অথোত্ক্রুষ্টং তদা হৃষ্টৈঃ সর্বৈর্দেবৈরুদায়ুধৈঃ
সংহতানি চ তূর্যাণি তদা সর্বাণ্যনেকশঃ
221.49
এবমন্যোন্যসংয়ুক্তং যুদ্ধমাসীত্সুদারুণম্
দেবানাং দানবানাং চ মাংসশোণিতকর্দমম্
221.50
অনয়ো দেবলোকস্য সহসৈব ব্যদৃশ্যত
তথা হি দানবা ঘোরা বিনিঘ্নন্তি দিবৌকসঃ
221.51
ততস্তূর্যপ্রণাদাশ্চ ভেরীণাং চ মহাস্বনাঃ
বভূবুর্দানবেন্দ্রাণাং সিংহনাদাশ্চ দারুণাঃ
221.52
অথ দৈত্যবলাদ্ঘোরান্নিষ্পপাত মহাবলঃ
দানবো মহিষো নাম প্রগৃহ্য বিপুলং গিরিম্
221.53
তে তং ঘনৈরিবাদিত্যং দৃষ্ট্বা সংপরিবারিতম্
সমুদ্যতগিরিং রাজন্ব্যদ্রবন্ত দিবৌকসঃ
221.54
অথাভিদ্রুত্য মহিষো দেবাংশ্চিক্ষেপ তং গিরিম্
পততা তেন গিরিণা দেবসৈন্যস্য পার্থিব
ভীমরূপেণ নিহতময়ুতং প্রাপতদ্ভুবি
221.55
অথ তৈর্দানবৈঃ সার্ধং মহিষস্ত্রাসয়ন্সুরান্
অভ্যদ্রবদ্রণে তূর্ণং সিংহঃ ক্ষুদ্রমৃগানিব
221.56
তমাপতন্তং মহিষং দৃষ্ট্বা সেন্দ্রা দিবৌকসঃ
ব্যদ্রবন্ত রণে ভীতা বিশীর্ণায়ুধকেতনাঃ
221.57
ততঃ স মহিষঃ ক্রুদ্ধস্তূর্ণং রুদ্ররথং যয়ৌ
অভিদ্রুত্য চ জগ্রাহ রুদ্রস্য রথকূবরম্
221.58
যদা রুদ্ররথং ক্রুদ্ধো মহিষঃ সহসা গতঃ
রেসতূ রোদসী গাঢং মুমুহুশ্চ মহর্ষয়ঃ
221.59
ব্যনদংশ্চ মহাকায়া দৈত্যা জলধরোপমাঃ
আসীচ্চ নিশ্চিতং তেষাং জিতমস্মাভিরিত্যুত
221.60
তথাভূতে তু ভগবান্নাবধীন্মহিষং রণে
সস্মার চ তদা স্কন্দং মৃত্যুং তস্য দুরাত্মনঃ
221.61
মহিষোঽপি রথং দৃষ্ট্বা রৌদ্রং রুদ্রস্য নানদৎ
দেবান্সংত্রাসয়ংশ্চাপি দৈত্যাংশ্চাপি প্রহর্ষয়ন্
221.62
ততস্তস্মিন্ভয়ে ঘোরে দেবানাং সমুপস্থিতে
আজগাম মহাসেনঃ ক্রোধাত্সূর্য ইব জ্বলন্
221.63
লোহিতাম্বরসংবীতো লোহিতস্রগ্বিভূষণঃ
লোহিতাস্যো মহাবাহুর্হিরণ্যকবচঃ প্রভুঃ
221.64
রথমাদিত্যসংকাশমাস্থিতঃ কনকপ্রভম্
তং দৃষ্ট্বা দৈত্যসেনা সা ব্যদ্রবত্সহসা রণে
221.65
স চাপি তাং প্রজ্বলিতাং মহিষস্য বিদারিণীম্
মুমোচ শক্তিং রাজেন্দ্র মহাসেনো মহাবলঃ
221.66
সা মুক্তাভ্যহনচ্ছক্তির্মহিষস্য শিরো মহৎ
পপাত ভিন্নে শিরসি মহিষস্ত্যক্তজীবিতঃ
221.67
ক্ষিপ্তাক্ষিপ্তা তু সা শক্তির্হত্বা শত্রূন্সহস্রশঃ
স্কন্দহস্তমনুপ্রাপ্তা দৃশ্যতে দেবদানবৈঃ
221.68
প্রায়ঃ শরৈর্বিনিহতা মহাসেনেন ধীমতা
শেষা দৈত্যগণা ঘোরা ভীতাস্ত্রস্তা দুরাসদৈঃ
স্কন্দস্য পার্ষদৈর্হত্বা ভক্ষিতাঃ শতসংঘশঃ
221.69
দানবান্ভক্ষয়ন্তস্তে প্রপিবন্তশ্চ শোণিতম্
ক্ষণান্নির্দানবং সর্বমকার্ষুর্ভৃশহর্ষিতাঃ
221.70
তমাংসীব যথা সূর্যো বৃক্ষানগ্নির্ঘনান্খগঃ
তথা স্কন্দোঽজয়চ্ছত্রূন্স্বেন বীর্যেণ কীর্তিমান্
221.71
সংপূজ্যমানস্ত্রিদশৈরভিবাদ্য মহেশ্বরম্
শুশুভে কৃত্তিকাপুত্রঃ প্রকীর্ণাংশুরিবাংশুমান্
221.72
নষ্টশত্রুর্যদা স্কন্দঃ প্রয়াতশ্চ মহেশ্বরম্
অথাব্রবীন্মহাসেনং পরিষ্বজ্য পুরংদরঃ
221.73
ব্রহ্মদত্তবরঃ স্কন্দ ত্বয়ায়ং মহিষো হতঃ
দেবাস্তৃণময়া যস্য বভূবুর্জয়তাং বর
সোঽয়ং ত্বয়া মহাবাহো শমিতো দেবকণ্টকঃ
221.74
শতং মহিষতুল্যানাং দানবানাং ত্বয়া রণে
নিহতং দেবশত্রূণাং যৈর্বয়ং পূর্বতাপিতাঃ
221.75
তাবকৈর্ভক্ষিতাশ্চান্যে দানবাঃ শতসংঘশঃ
অজেয়স্ত্বং রণেঽরীণামুমাপতিরিব প্রভুঃ
221.76
এতত্তে প্রথমং দেব খ্যাতং কর্ম ভবিষ্যতি
ত্রিষু লোকেষু কীর্তিশ্চ তবাক্ষয্যা ভবিষ্যতি
বশগাশ্চ ভবিষ্যন্তি সুরাস্তব সুরাত্মজ
221.77
মহাসেনেত্যেবমুক্ত্বা নিবৃত্তঃ সহ দৈবতৈঃ
অনুজ্ঞাতো ভগবতা ত্র্যম্বকেন শচীপতিঃ
221.78
গতো ভদ্রবটং রুদ্রো নিবৃত্তাশ্চ দিবৌকসঃ
উক্তাশ্চ দেবা রুদ্রেণ স্কন্দং পশ্যত মামিব
221.79
স হত্বা দানবগণান্পূজ্যমানো মহর্ষিভিঃ
একাহ্নৈবাজয়ত্সর্বং ত্রৈলোক্যং বহ্নিনন্দনঃ
221.80
স্কন্দস্য য ইদং জন্ম পঠতে সুসমাহিতঃ
স পুষ্টিমিহ সংপ্রাপ্য স্কন্দসালোক্যতামিয়াৎ