Utshovঅধ্যায় 220
220.1
মার্কণ্ডেয় উবাচ
যদা স্কন্দেন মাতৄণামেবমেতত্প্রিয়ং কৃতম্
অথৈনমব্রবীত্স্বাহা মম পুত্রস্ত্বমৌরসঃ
220.2
ইচ্ছাম্যহং ত্বয়া দত্তাং প্রীতিং পরমদুর্লভাম্
তামব্রবীত্ততঃ স্কন্দঃ প্রীতিমিচ্ছসি কীদৃশীম্
220.3
স্বাহোবাচ
দক্ষস্যাহং প্রিয়া কন্যা স্বাহা নাম মহাভুজ
বাল্যাত্প্রভৃতি নিত্যং চ জাতকামা হুতাশনে
220.4
ন চ মাং কামিনীং পুত্র সম্যগ্জানাতি পাবকঃ
ইচ্ছামি শাশ্বতং বাসং বস্তুং পুত্র সহাগ্নিনা
220.5
স্কন্দ উবাচ
হব্যং কব্যং চ যত্কিংচিদ্দ্বিজা মন্ত্রপুরস্কৃতম্
হোষ্যন্ত্যগ্নৌ সদা দেবি স্বাহেত্যুক্ত্বা সমুদ্যতম্
220.6
অদ্য প্রভৃতি দাস্যন্তি সুবৃত্তাঃ সত্পথে স্থিতাঃ
এবমগ্নিস্ত্বয়া সার্ধং সদা বত্স্যতি শোভনে
220.7
মার্কণ্ডেয় উবাচ
এবমুক্তা ততঃ স্বাহা তুষ্টা স্কন্দেন পূজিতা
পাবকেন সমায়ুক্তা ভর্ত্রা স্কন্দমপূজয়ৎ
220.8
ততো ব্রহ্মা মহাসেনং প্রজাপতিরথাব্রবীৎ
অভিগচ্ছ মহাদেবং পিতরং ত্রিপুরার্দনম্
220.9
রুদ্রেণাগ্নিং সমাবিশ্য স্বাহামাবিশ্য চোময়া
হিতার্থং সর্বলোকানাং জাতস্ত্বমপরাজিতঃ
220.10
উমায়োন্যাং চ রুদ্রেণ শুক্রং সিক্তং মহাত্মনা
আস্তে গিরৌ নিপতিতং মিঞ্জিকামিঞ্জিকং যতঃ
220.11
সংভূতং লোহিতোদে তু শুক্রশেষমবাপতৎ
সূর্যরশ্মিষু চাপ্যন্যদন্যচ্চৈবাপতদ্ভুবি
আসক্তমন্যদ্বৃক্ষেষু তদেবং পঞ্চধাপতৎ
220.12
ত এতে বিবিধাকারা গণা জ্ঞেয়া মনীষিভিঃ
তব পারিষদা ঘোরা য এতে পিশিতাশনাঃ
220.13
এবমস্ত্বিতি চাপ্যুক্ত্বা মহাসেনো মহেশ্বরম্
অপূজয়দমেয়াত্মা পিতরং পিতৃবত্সলঃ
220.14
অর্কপুষ্পৈস্তু তে পঞ্চ গণাঃ পূজ্যা ধনার্থিভিঃ
ব্যাধিপ্রশমনার্থং চ তেষাং পূজাং সমাচরেৎ
220.15
মিঞ্জিকামিঞ্জিকং চৈব মিথুনং রুদ্রসংভবম্
নমস্কার্যং সদৈবেহ বালানাং হিতমিচ্ছতা
220.16
স্ত্রিয়ো মানুষমাংসাদা বৃদ্ধিকা নাম নামতঃ
বৃক্ষেষু জাতাস্তা দেব্যো নমস্কার্যাঃ প্রজার্থিভিঃ
220.17
এবমেতে পিশাচানামসংখ্যেয়া গণাঃ স্মৃতাঃ
ঘণ্টায়াঃ সপতাকায়াঃ শৃণু মে সংভবং নৃপ
220.18
ঐরাবতস্য ঘণ্টে দ্বে বৈজয়ন্ত্যাবিতি শ্রুতে
গুহস্য তে স্বয়ং দত্তে শক্রেণানায্য ধীমতা
220.19
একা তত্র বিশাখস্য ঘণ্টা স্কন্দস্য চাপরা
পতাকা কার্ত্তিকেয়স্য বিশাখস্য চ লোহিতা
220.20
যানি ক্রীডনকান্যস্য দেবৈর্দত্তানি বৈ তদা
তৈরেব রমতে দেবো মহাসেনো মহাবলঃ
220.21
স সংবৃতঃ পিশাচানাং গণৈর্দেবগণৈস্তথা
শুশুভে কাঞ্চনে শৈলে দীপ্যমানঃ শ্রিয়া বৃতঃ
220.22
তেন বীরেণ শুশুভে স শৈলঃ শুভকাননঃ
আদিত্যেনেবাংশুমতা মন্দরশ্চারুকন্দরঃ
220.23
সংতানকবনৈঃ ফুল্লৈঃ করবীরবনৈরপি
পারিজাতবনৈশ্চৈব জপাশোকবনৈস্তথা
220.24
কদম্বতরুষণ্ডৈশ্চ দিব্যৈর্মৃগগণৈরপি
দিব্যৈঃ পক্ষিগণৈশ্চৈব শুশুভে শ্বেতপর্বতঃ
220.25
তত্র দেবগণাঃ সর্বে সর্বে চৈব মহর্ষয়ঃ
মেঘতূর্যরবাশ্চৈব ক্ষুব্ধোদধিসমস্বনাঃ
220.26
তত্র দিব্যাশ্চ গন্ধর্বা নৃত্যন্ত্যপ্সরসস্তথা
হৃষ্টানাং তত্র ভূতানাং শ্রূয়তে নিনদো মহান্
220.27
এবং সেন্দ্রং জগত্সর্বং শ্বেতপর্বতসংস্থিতম্
প্রহৃষ্টং প্রেক্ষতে স্কন্দং ন চ গ্লায়তি দর্শনাৎ