Utshovঅধ্যায় 219
219.1
মার্কণ্ডেয় উবাচ
শ্রিয়া জুষ্টং মহাসেনং দেবসেনাপতিং কৃতম্
সপ্তর্ষিপত্ন্যঃ ষড্দেব্যস্তত্সকাশমথাগমন্
219.2
ঋষিভিঃ সংপরিত্যক্তা ধর্ময়ুক্তা মহাব্রতাঃ
দ্রুতমাগম্য চোচুস্তা দেবসেনাপতিং প্রভুম্
219.3
বয়ং পুত্র পরিত্যক্তা ভর্তৃভির্দেবসংমিতৈঃ
অকারণাদ্রুষা তাত পুণ্যস্থানাত্পরিচ্যুতাঃ
219.4
অস্মাভিঃ কিল জাতস্ত্বমিতি কেনাপ্যুদাহৃতম্
অসত্যমেতত্সংশ্রুত্য তস্মান্নস্ত্রাতুমর্হসি
219.5
অক্ষয়শ্চ ভবেত্স্বর্গস্ত্বত্প্রসাদাদ্ধি নঃ প্রভো
ত্বাং পুত্রং চাপ্যভীপ্সামঃ কৃত্বৈতদনৃণো ভব
219.6
স্কন্দ উবাচ
মাতরো হি ভবত্যো মে সুতো বোঽহমনিন্দিতাঃ
যচ্চাভীপ্সথ তত্সর্বং সংভবিষ্যতি বস্তথা
219.7
মার্কণ্ডেয় উবাচ
এবমুক্তে ততঃ শক্রং কিং কার্যমিতি সোঽব্রবীৎ
উক্তঃ স্কন্দেন ব্রূহীতি সোঽব্রবীদ্বাসবস্ততঃ
219.8
অভিজিত্স্পর্ধমানা তু রোহিণ্যা কন্যসী স্বসা
ইচ্ছন্তী জ্যেষ্ঠতাং দেবী তপস্তপ্তুং বনং গতা
219.9
তত্র মূঢোঽস্মি ভদ্রং তে নক্ষত্রং গগনাচ্চ্যুতম্
কালং ত্বিমং পরং স্কন্দ ব্রহ্মণা সহ চিন্তয়
219.10
ধনিষ্ঠাদিস্তদা কালো ব্রহ্মণা পরিনির্মিতঃ
রোহিণ্যাদ্যোঽভবত্পূর্বমেবং সংখ্যা সমাভবৎ
219.11
এবমুক্তে তু শক্রেণ ত্রিদিবং কৃত্তিকা গতাঃ
নক্ষত্রং শকটাকারং ভাতি তদ্বহ্নিদৈবতম্
219.12
বিনতা চাব্রবীত্স্কন্দং মম ত্বং পিণ্ডদঃ সুতঃ
ইচ্ছামি নিত্যমেবাহং ত্বয়া পুত্র সহাসিতুম্
219.13
স্কন্দ উবাচ
এবমস্তু নমস্তেঽস্তু পুত্রস্নেহাত্প্রশাধি মাম্
স্নুষয়া পূজ্যমানা বৈ দেবি বত্স্যসি নিত্যদা
219.14
মার্কণ্ডেয় উবাচ
অথ মাতৃগণঃ সর্বঃ স্কন্দং বচনমব্রবীৎ
বয়ং সর্বস্য লোকস্য মাতরঃ কবিভিঃ স্তুতাঃ
ইচ্ছামো মাতরস্তুভ্যং ভবিতুং পূজয়স্ব নঃ
219.15
স্কন্দ উবাচ
মাতরস্তু ভবত্যো মে ভবতীনামহং সুতঃ
উচ্যতাং যন্ময়া কার্যং ভবতীনামথেপ্সিতম্
219.16
মাতর ঊচুঃ
যাস্তু তা মাতরঃ পূর্বং লোকস্যাস্য প্রকল্পিতাঃ
অস্মাকং তদ্ভবেত্স্থানং তাসাং চৈব ন তদ্ভবেৎ
219.17
ভবেম পূজ্যা লোকস্য ন তাঃ পূজ্যাঃ সুরর্ষভ
প্রজাস্মাকং হৃতাস্তাভিস্ত্বত্কৃতে তাঃ প্রয়চ্ছ নঃ
219.18
স্কন্দ উবাচ
দত্তাঃ প্রজা ন তাঃ শক্যা ভবতীভির্নিষেবিতুম্
অন্যাং বঃ কাং প্রয়চ্ছামি প্রজাং যাং মনসেচ্ছথ
219.19
মাতর ঊচুঃ
ইচ্ছাম তাসাং মাতৄণাং প্রজা ভোক্তুং প্রয়চ্ছ নঃ
ত্বয়া সহ পৃথগ্ভূতা যে চ তাসামথেশ্বরাঃ
219.20
স্কন্দ উবাচ
প্রজা বো দদ্মি কষ্টং তু ভবতীভিরুদাহৃতম্
পরিরক্ষত ভদ্রং বঃ প্রজাঃ সাধু নমস্কৃতাঃ
219.21
মাতর ঊচুঃ
পরিরক্ষাম ভদ্রং তে প্রজাঃ স্কন্দ যথেচ্ছসি
ত্বয়া নো রোচতে স্কন্দ সহবাসশ্চিরং প্রভো
219.22
স্কন্দ উবাচ
যাবত্ষোডশ বর্ষাণি ভবন্তি তরুণাঃ প্রজাঃ
প্রবাধত মনুষ্যাণাং তাবদ্রূপৈঃ পৃথগ্বিধৈঃ
219.23
অহং চ বঃ প্রদাস্যামি রৌদ্রমাত্মানমব্যয়ম্
পরমং তেন সহিতা সুখং বত্স্যথ পূজিতাঃ
219.24
মার্কণ্ডেয় উবাচ
ততঃ শরীরাত্স্কন্দস্য পুরুষঃ কাঞ্চনপ্রভঃ
ভোক্তুং প্রজাঃ স মর্ত্যানাং নিষ্পপাত মহাবলঃ
219.25
অপতত্স তদা ভূমৌ বিসংজ্ঞোঽথ ক্ষুধান্বিতঃ
স্কন্দেন সোঽভ্যনুজ্ঞাতো রৌদ্ররূপোঽভবদ্গ্রহঃ
স্কন্দাপস্মারমিত্যাহুর্গ্রহং তং দ্বিজসত্তমাঃ
219.26
বিনতা তু মহারৌদ্রা কথ্যতে শকুনিগ্রহঃ
পূতনাং রাক্ষসীং প্রাহুস্তং বিদ্যাত্পূতনাগ্রহম্
219.27
কষ্টা দারুণরূপেণ ঘোররূপা নিশাচরী
পিশাচী দারুণাকারা কথ্যতে শীতপূতনা
গর্ভান্সা মানুষীণাং তু হরতে ঘোরদর্শনা
219.28
অদিতিং রেবতীং প্রাহুর্গ্রহস্তস্যাস্তু রৈবতঃ
সোঽপি বালাঞ্শিশূন্ঘোরো বাধতে বৈ মহাগ্রহঃ
219.29
দৈত্যানাং যা দিতির্মাতা তামাহুর্মুখমণ্ডিকাম্
অত্যর্থং শিশুমাংসেন সংপ্রহৃষ্টা দুরাসদা
219.30
কুমারাশ্চ কুমার্যশ্চ যে প্রোক্তাঃ স্কন্দসংভবাঃ
তেঽপি গর্ভভুজঃ সর্বে কৌরব্য সুমহাগ্রহাঃ
219.31
তাসামেব কুমারীণাং পতয়স্তে প্রকীর্তিতাঃ
অজ্ঞায়মানা গৃহ্ণন্তি বালকান্রৌদ্রকর্মিণঃ
219.32
গবাং মাতা তু যা প্রাজ্ঞৈঃ কথ্যতে সুরভির্নৃপ
শকুনিস্তামথারুহ্য সহ ভুঙ্ক্তে শিশূন্ভুবি
219.33
সরমা নাম যা মাতা শুনাং দেবী জনাধিপ
সাপি গর্ভান্সমাদত্তে মানুষীণাং সদৈব হি
219.34
পাদপানাং চ যা মাতা করঞ্জনিলয়া হি সা
করঞ্জে তাং নমস্যন্তি তস্মাত্পুত্রার্থিনো নরাঃ
219.35
ইমে ত্বষ্টাদশান্যে বৈ গ্রহা মাংসমধুপ্রিয়াঃ
দ্বিপঞ্চরাত্রং তিষ্ঠন্তি সততং সূতিকাগৃহে
219.36
কদ্রূঃ সূক্ষ্মবপুর্ভূত্বা গর্ভিণীং প্রবিশেদ্যদা
ভুঙ্ক্তে সা তত্র তং গর্ভং সা তু নাগং প্রসূয়তে
219.37
গন্ধর্বাণাং তু যা মাতা সা গর্ভং গৃহ্য গচ্ছতি
ততো বিলীনগর্ভা সা মানুষী ভুবি দৃশ্যতে
219.38
যা জনিত্রী ত্বপ্সরসাং গর্ভমাস্তে প্রগৃহ্য সা
উপবিষ্টং ততো গর্ভং কথয়ন্তি মনীষিণঃ
219.39
লোহিতস্যোদধেঃ কন্যা ধাত্রী স্কন্দস্য সা স্মৃতা
লোহিতায়নিরিত্যেবং কদম্বে সা হি পূজ্যতে
219.40
পুরুষেষু যথা রুদ্রস্তথার্যা প্রমদাস্বপি
আর্যা মাতা কুমারস্য পৃথক্কামার্থমিজ্যতে
219.41
এবমেতে কুমারাণাং ময়া প্রোক্তা মহাগ্রহাঃ
যাবত্ষোডশ বর্ষাণি অশিবাস্তে শিবাস্ততঃ
219.42
যে চ মাতৃগণাঃ প্রোক্তাঃ পুরুষাশ্চৈব যে গ্রহাঃ
সর্বে স্কন্দগ্রহা নাম জ্ঞেয়া নিত্যং শরীরিভিঃ
219.43
তেষাং প্রশমনং কার্যং স্নানং ধূপমথাঞ্জনম্
বলিকর্মোপহারশ্চ স্কন্দস্যেজ্যা বিশেষতঃ
219.44
এবমেতেঽর্চিতাঃ সর্বে প্রয়চ্ছন্তি শুভং নৃণাম্
আয়ুর্বীর্যং চ রাজেন্দ্র সম্যক্পূজানমস্কৃতাঃ
219.45
ঊর্ধ্বং তু ষোডশাদ্বর্ষাদ্যে ভবন্তি গ্রহা নৃণাম্
তানহং সংপ্রবক্ষ্যামি নমস্কৃত্য মহেশ্বরম্
219.46
যঃ পশ্যতি নরো দেবাঞ্জাগ্রদ্বা শয়িতোঽপি বা
উন্মাদ্যতি স তু ক্ষিপ্রং তং তু দেবগ্রহং বিদুঃ
219.47
আসীনশ্চ শয়ানশ্চ যঃ পশ্যতি নরঃ পিতৄন্
উন্মাদ্যতি স তু ক্ষিপ্রং স জ্ঞেয়স্তু পিতৃগ্রহঃ
219.48
অবমন্যতি যঃ সিদ্ধান্ক্রুদ্ধাশ্চাপি শপন্তি যম্
উন্মাদ্যতি স তু ক্ষিপ্রং জ্ঞেয়ঃ সিদ্ধগ্রহস্তু সঃ
219.49
উপাঘ্রাতি চ যো গন্ধান্রসাংশ্চাপি পৃথগ্বিধান্
উন্মাদ্যতি স তু ক্ষিপ্রং স জ্ঞেয়ো রাক্ষসো গ্রহঃ
219.50
গন্ধর্বাশ্চাপি যং দিব্যাঃ সংস্পৃশন্তি নরং ভুবি
উন্মাদ্যতি স তু ক্ষিপ্রং গ্রহো গান্ধর্ব এব সঃ
219.51
আবিশন্তি চ যং যক্ষাঃ পুরুষং কালপর্যয়ে
উন্মাদ্যতি স তু ক্ষিপ্রং জ্ঞেয়ো যক্ষগ্রহস্তু সঃ
219.52
অধিরোহন্তি যং নিত্যং পিশাচাঃ পুরুষং ক্বচিৎ
উন্মাদ্যতি স তু ক্ষিপ্রং পৈশাচং তং গ্রহং বিদুঃ
219.53
যস্য দোষৈঃ প্রকুপিতং চিত্তং মুহ্যতি দেহিনঃ
উন্মাদ্যতি স তু ক্ষিপ্রং সাধনং তস্য শাস্ত্রতঃ
219.54
বৈক্লব্যাচ্চ ভয়াচ্চৈব ঘোরাণাং চাপি দর্শনাৎ
উন্মাদ্যতি স তু ক্ষিপ্রং সত্ত্বং তস্য তু সাধনম্
219.55
কশ্চিত্ক্রীডিতুকামো বৈ ভোক্তুকামস্তথাপরঃ
অভিকামস্তথৈবান্য ইত্যেষ ত্রিবিধো গ্রহঃ
219.56
যাবত্সপ্ততিবর্ষাণি ভবন্ত্যেতে গ্রহা নৃণাম্
অতঃ পরং দেহিনাং তু গ্রহতুল্যো ভবেজ্জ্বরঃ
219.57
অপ্রকীর্ণেন্দ্রিয়ং দান্তং শুচিং নিত্যমতন্দ্রিতম্
আস্তিকং শ্রদ্দধানং চ বর্জয়ন্তি সদা গ্রহাঃ
219.58
ইত্যেষ তে গ্রহোদ্দেশো মানুষাণাং প্রকীর্তিতঃ
ন স্পৃশন্তি গ্রহা ভক্তান্নরান্দেবং মহেশ্বরম্