Utshovঅধ্যায় 218
218.1
মার্কণ্ডেয় উবাচ
উপবিষ্টং ততঃ স্কন্দং হিরণ্যকবচস্রজম্
হিরণ্যচূডমুকুটং হিরণ্যাক্ষং মহাপ্রভম্
218.2
লোহিতাম্বরসংবীতং তীক্ষ্ণদংষ্ট্রং মনোরমম্
সর্বলক্ষণসংপন্নং ত্রৈলোক্যস্যাপি সুপ্রিয়ম্
218.3
ততস্তং বরদং শূরং যুবানং মৃষ্টকুণ্ডলম্
অভজত্পদ্মরূপা শ্রীঃ স্বয়মেব শরীরিণী
218.4
শ্রিয়া জুষ্টঃ পৃথুয়শাঃ স কুমারবরস্তদা
নিষণ্ণো দৃশ্যতে ভূতৈঃ পৌর্ণমাস্যাং যথা শশী
218.5
অপূজয়ন্মহাত্মানো ব্রাহ্মণাস্তং মহাবলম্
ইদমাহুস্তদা চৈব স্কন্দং তত্র মহর্ষয়ঃ
218.6
হিরণ্যবর্ণ ভদ্রং তে লোকানাং শংকরো ভব
ত্বয়া ষড্রাত্রজাতেন সর্বে লোকা বশীকৃতাঃ
218.7
অভয়ং চ পুনর্দত্তং ত্বয়ৈবৈষাং সুরোত্তম
তস্মাদিন্দ্রো ভবানস্তু ত্রৈলোক্যস্যাভয়ংকরঃ
218.8
স্কন্দ উবাচ
কিমিন্দ্রঃ সর্বলোকানাং করোতীহ তপোধনাঃ
কথং দেবগণাংশ্চৈব পাতি নিত্যং সুরেশ্বরঃ
218.9
ঋষয় ঊচুঃ
ইন্দ্রো দিশতি ভূতানাং বলং তেজঃ প্রজাঃ সুখম্
তুষ্টঃ প্রয়চ্ছতি তথা সর্বান্দায়ান্সুরেশ্বরঃ
218.10
দুর্বৃত্তানাং সংহরতি বৃত্তস্থানাং প্রয়চ্ছতি
অনুশাস্তি চ ভূতানি কার্যেষু বলসূদনঃ
218.11
অসূর্যে চ ভবেত্সূর্যস্তথাচন্দ্রে চ চন্দ্রমাঃ
ভবত্যগ্নিশ্চ বায়ুশ্চ পৃথিব্যাপশ্চ কারণৈঃ
218.12
এতদিন্দ্রেণ কর্তব্যমিন্দ্রে হি বিপুলং বলম্
ত্বং চ বীর বলশ্রেষ্ঠস্তস্মাদিন্দ্রো ভবস্ব নঃ
218.13
শক্র উবাচ
ভবস্বেন্দ্রো মহাবাহো সর্বেষাং নঃ সুখাবহঃ
অভিষিচ্যস্ব চৈবাদ্য প্রাপ্তরূপোঽসি সত্তম
218.14
স্কন্দ উবাচ
শাধি ত্বমেব ত্রৈলোক্যমব্যগ্রো বিজয়ে রতঃ
অহং তে কিংকরঃ শক্র ন মমেন্দ্রত্বমীপ্সিতম্
218.15
শক্র উবাচ
বলং তবাদ্ভুতং বীর ত্বং দেবানামরীঞ্জহি
অবজ্ঞাস্যন্তি মাং লোকা বীর্যেণ তব বিস্মিতাঃ
218.16
ইন্দ্রত্বেঽপি স্থিতং বীর বলহীনং পরাজিতম্
আবয়োশ্চ মিথো ভেদে প্রয়তিষ্যন্ত্যতন্দ্রিতাঃ
218.17
ভেদিতে চ ত্বয়ি বিভো লোকো দ্বৈধমুপেষ্যতি
দ্বিধাভূতেষু লোকেষু নিশ্চিতেষ্বাবয়োস্তথা
বিগ্রহঃ সংপ্রবর্তেত ভূতভেদান্মহাবল
218.18
তত্র ত্বং মাং রণে তাত যথাশ্রদ্ধং বিজেষ্যসি
তস্মাদিন্দ্রো ভবানদ্য ভবিতা মা বিচারয়
218.19
স্কন্দ উবাচ
ত্বমেব রাজা ভদ্রং তে ত্রৈলোক্যস্য মমৈব চ
করোমি কিং চ তে শক্র শাসনং তদ্ব্রবীহি মে
218.20
শক্র উবাচ
যদি সত্যমিদং বাক্যং নিশ্চয়াদ্ভাষিতং ত্বয়া
যদি বা শাসনং স্কন্দ কর্তুমিচ্ছসি মে শৃণু
218.21
অভিষিচ্যস্ব দেবানাং সেনাপত্যে মহাবল
অহমিন্দ্রো ভবিষ্যামি তব বাক্যান্মহাবল
218.22
স্কন্দ উবাচ
দানবানাং বিনাশায় দেবানামর্থসিদ্ধয়ে
গোব্রাহ্মণস্য ত্রাণার্থং সেনাপত্যেঽভিষিঞ্চ মাম্
218.23
মার্কণ্ডেয় উবাচ
সোঽভিষিক্তো মঘবতা সর্বৈর্দেবগণৈঃ সহ
অতীব শুশুভে তত্র পূজ্যমানো মহর্ষিভিঃ
218.24
তস্য তত্কাঞ্চনং ছত্রং ধ্রিয়মাণং ব্যরোচত
যথৈব সুসমিদ্ধস্য পাবকস্যাত্মমণ্ডলম্
218.25
বিশ্বকর্মকৃতা চাস্য দিব্যা মালা হিরণ্ময়ী
আবদ্ধা ত্রিপুরঘ্নেন স্বয়মেব যশস্বিনা
218.26
আগম্য মনুজব্যাঘ্র সহ দেব্যা পরংতপ
অর্চয়ামাস সুপ্রীতো ভগবান্গোবৃষধ্বজঃ
218.27
রুদ্রমগ্নিং দ্বিজাঃ প্রাহূ রুদ্রসূনুস্ততস্তু সঃ
রুদ্রেণ শুক্রমুত্সৃষ্টং তচ্ছ্বেতঃ পর্বতোঽভবৎ
পাবকস্যেন্দ্রিয়ং শ্বেতে কৃত্তিকাভিঃ কৃতং নগে
218.28
পূজ্যমানং তু রুদ্রেণ দৃষ্ট্বা সর্বে দিবৌকসঃ
রুদ্রসূনুং ততঃ প্রাহুর্গুহং গুণবতাং বরম্
218.29
অনুপ্রবিশ্য রুদ্রেণ বহ্নিং জাতো হ্যয়ং শিশুঃ
তত্র জাতস্ততঃ স্কন্দো রুদ্রসূনুস্ততোঽভবৎ
218.30
রুদ্রস্য বহ্নেঃ স্বাহায়াঃ ষণ্ণাং স্ত্রীণাং চ তেজসা
জাতঃ স্কন্দঃ সুরশ্রেষ্ঠো রুদ্রসূনুস্ততোঽভবৎ
218.31
অরজে বাসসী রক্তে বসানঃ পাবকাত্মজঃ
ভাতি দীপ্তবপুঃ শ্রীমান্রক্তাভ্রাভ্যামিবাংশুমান্
218.32
কুক্কুটশ্চাগ্নিনা দত্তস্তস্য কেতুরলংকৃতঃ
রথে সমুচ্ছ্রিতো ভাতি কালাগ্নিরিব লোহিতঃ
218.33
বিবেশ কবচং চাস্য শরীরং সহজং ততঃ
যুধ্যমানস্য দেবস্য প্রাদুর্ভবতি তত্সদা
218.34
শক্তির্বর্ম বলং তেজঃ কান্তত্বং সত্যমক্ষতিঃ
ব্রহ্মণ্যত্বমসংমোহো ভক্তানাং পরিরক্ষণম্
218.35
নিকৃন্তনং চ শত্রূণাং লোকানাং চাভিরক্ষণম্
স্কন্দেন সহ জাতানি সর্বাণ্যেব জনাধিপ
218.36
এবং দেবগণৈঃ সর্বৈঃ সোঽভিষিক্তঃ স্বলংকৃতঃ
বভৌ প্রতীতঃ সুমনাঃ পরিপূর্ণেন্দুদর্শনঃ
218.37
ইষ্টৈঃ স্বাধ্যায়ঘোষৈশ্চ দেবতূর্যরবৈরপি
দেবগন্ধর্বগীতৈশ্চ সর্বৈরপ্সরসাং গণৈঃ
218.38
এতৈশ্চান্যৈশ্চ বিবিধৈর্হৃষ্টতুষ্টৈরলংকৃতৈঃ
ক্রীডন্নিব তদা দেবৈরভিষিক্তঃ স পাবকিঃ
218.39
অভিষিক্তং মহাসেনমপশ্যন্ত দিবৌকসঃ
বিনিহত্য তমঃ সূর্যং যথেহাভ্যুদিতং তথা
218.40
অথৈনমভ্যয়ুঃ সর্বা দেবসেনাঃ সহস্রশঃ
অস্মাকং ত্বং পতিরিতি ব্রুবাণাঃ সর্বতোদিশম্
218.41
তাঃ সমাসাদ্য ভগবান্সর্বভূতগণৈর্বৃতঃ
অর্চিতশ্চ স্তুতশ্চৈব সান্ত্বয়ামাস তা অপি
218.42
শতক্রতুশ্চাভিষিচ্য স্কন্দং সেনাপতিং তদা
সস্মার তাং দেবসেনাং যা সা তেন বিমোক্ষিতা
218.43
অয়ং তস্যাঃ পতির্নূনং বিহিতো ব্রহ্মণা স্বয়ম্
ইতি চিন্ত্যানয়ামাস দেবসেনাং স্বলংকৃতাম্
218.44
স্কন্দং চোবাচ বলভিদিয়ং কন্যা সুরোত্তম
অজাতে ত্বয়ি নির্দিষ্টা তব পত্নী স্বয়ংভুবা
218.45
তস্মাত্ত্বমস্যা বিধিবত্পাণিং মন্ত্রপুরস্কৃতম্
গৃহাণ দক্ষিণং দেব্যাঃ পাণিনা পদ্মবর্চসম্
218.46
এবমুক্তঃ স জগ্রাহ তস্যাঃ পাণিং যথাবিধি
বৃহস্পতির্মন্ত্রবিধিং জজাপ চ জুহাব চ
218.47
এবং স্কন্দস্য মহিষীং দেবসেনাং বিদুর্বুধাঃ
ষষ্ঠীং যাং ব্রাহ্মণাঃ প্রাহুর্লক্ষ্মীমাশাং সুখপ্রদাম্
সিনীবালীং কুহূং চৈব সদ্বৃত্তিমপরাজিতাম্
218.48
যদা স্কন্দঃ পতির্লব্ধঃ শাশ্বতো দেবসেনয়া
তদা তমাশ্রয়ল্লক্ষ্মীঃ স্বয়ং দেবী শরীরিণী
218.49
শ্রীজুষ্টঃ পঞ্চমীং স্কন্দস্তস্মাচ্ছ্রীপঞ্চমী স্মৃতা
ষষ্ঠ্যাং কৃতার্থোঽভূদ্যস্মাত্তস্মাত্ষষ্ঠী মহাতিথিঃ