UtshovChapter 220
220.1
मार्कण्डेय उवाच
यदा स्कन्देन मातॄणामेवमेतत्प्रियं कृतम्
अथैनमब्रवीत्स्वाहा मम पुत्रस्त्वमौरसः
Markandeya uvacha
Yada skandena matrinamevametatpriyam kritam
Athainamabravitsvaha mama putrastvamaurasah
220.2
इच्छाम्यहं त्वया दत्तां प्रीतिं परमदुर्लभाम्
तामब्रवीत्ततः स्कन्दः प्रीतिमिच्छसि कीदृशीम्
Ichchhamyaham tvaya dattam pritim paramadurlabham
Tamabravittatah skandah pritimichchhasi kidrishim
220.3
स्वाहोवाच
दक्षस्याहं प्रिया कन्या स्वाहा नाम महाभुज
बाल्यात्प्रभृति नित्यं च जातकामा हुताशने
Svahovacha
Dakshasyaham priya kanya svaha nama mahabhuja
Balyatprabhriti nityam cha jatakama hutashane
220.4
न च मां कामिनीं पुत्र सम्यग्जानाति पावकः
इच्छामि शाश्वतं वासं वस्तुं पुत्र सहाग्निना
Na cha mam kaminim putra samyagjanati pavakah
Ichchhami shashvatam vasam vastum putra sahagnina
220.5
स्कन्द उवाच
हव्यं कव्यं च यत्किंचिद्द्विजा मन्त्रपुरस्कृतम्
होष्यन्त्यग्नौ सदा देवि स्वाहेत्युक्त्वा समुद्यतम्
Skanda uvacha
Havyam kavyam cha yatkinchiddvija mantrapuraskritam
Hoshyantyagnau sada devi svahetyuktva samudyatam
220.6
अद्य प्रभृति दास्यन्ति सुवृत्ताः सत्पथे स्थिताः
एवमग्निस्त्वया सार्धं सदा वत्स्यति शोभने
Adya prabhriti dasyanti suvrittah satpathe sthitah
Evamagnistvaya sardham sada vatsyati shobhane
220.7
मार्कण्डेय उवाच
एवमुक्ता ततः स्वाहा तुष्टा स्कन्देन पूजिता
पावकेन समायुक्ता भर्त्रा स्कन्दमपूजयत्
Markandeya uvacha
Evamukta tatah svaha tushta skandena pujita
Pavakena samayukta bhartra skandamapujayat
220.8
ततो ब्रह्मा महासेनं प्रजापतिरथाब्रवीत्
अभिगच्छ महादेवं पितरं त्रिपुरार्दनम्
Tato brahma mahasenam prajapatirathabravit
Abhigachchha mahadevam pitaram tripurardanam
220.9
रुद्रेणाग्निं समाविश्य स्वाहामाविश्य चोमया
हितार्थं सर्वलोकानां जातस्त्वमपराजितः
Rudrenagnim samavishya svahamavishya chomaya
Hitartham sarvalokanam jatastvamaparajitah
220.10
उमायोन्यां च रुद्रेण शुक्रं सिक्तं महात्मना
आस्ते गिरौ निपतितं मिञ्जिकामिञ्जिकं यतः
Umayonyam cha rudrena shukram siktam mahatmana
Aste girau nipatitam minjikaminjikam yatah
220.11
संभूतं लोहितोदे तु शुक्रशेषमवापतत्
सूर्यरश्मिषु चाप्यन्यदन्यच्चैवापतद्भुवि
आसक्तमन्यद्वृक्षेषु तदेवं पञ्चधापतत्
Sambhutam lohitode tu shukrasheshamavapatat
Suryarashmishu chapyanyadanyachchaivapatadbhuvi
Asaktamanyadvriksheshu tadevam panchadhapatat
220.12
त एते विविधाकारा गणा ज्ञेया मनीषिभिः
तव पारिषदा घोरा य एते पिशिताशनाः
Ta ete vividhakara gana gyeya manishibhih
Tava parishada ghora ya ete pishitashanah
220.13
एवमस्त्विति चाप्युक्त्वा महासेनो महेश्वरम्
अपूजयदमेयात्मा पितरं पितृवत्सलः
Evamastviti chapyuktva mahaseno maheshvaram
Apujayadameyatma pitaram pitrivatsalah
220.14
अर्कपुष्पैस्तु ते पञ्च गणाः पूज्या धनार्थिभिः
व्याधिप्रशमनार्थं च तेषां पूजां समाचरेत्
Arkapushpaistu te pancha ganah pujya dhanarthibhih
Vyadhiprashamanartham cha tesham pujam samacharet
220.15
मिञ्जिकामिञ्जिकं चैव मिथुनं रुद्रसंभवम्
नमस्कार्यं सदैवेह बालानां हितमिच्छता
Minjikaminjikam chaiva mithunam rudrasambhavam
Namaskaryam sadaiveha balanam hitamichchhata
220.16
स्त्रियो मानुषमांसादा वृद्धिका नाम नामतः
वृक्षेषु जातास्ता देव्यो नमस्कार्याः प्रजार्थिभिः
Striyo manushamansada vriddhika nama namatah
Vriksheshu jatasta devyo namaskaryah prajarthibhih
220.17
एवमेते पिशाचानामसंख्येया गणाः स्मृताः
घण्टायाः सपताकायाः शृणु मे संभवं नृप
Evamete pishachanamasankhyeya ganah smritah
Ghantayah sapatakayah shrinu me sambhavam nripa
220.18
ऐरावतस्य घण्टे द्वे वैजयन्त्याविति श्रुते
गुहस्य ते स्वयं दत्ते शक्रेणानाय्य धीमता
Airavatasya ghante dve vaijayantyaviti shrute
Guhasya te svayam datte shakrenanayya dhimata
220.19
एका तत्र विशाखस्य घण्टा स्कन्दस्य चापरा
पताका कार्त्तिकेयस्य विशाखस्य च लोहिता
Eka tatra vishakhasya ghanta skandasya chapara
Pataka karttikeyasya vishakhasya cha lohita
220.20
यानि क्रीडनकान्यस्य देवैर्दत्तानि वै तदा
तैरेव रमते देवो महासेनो महाबलः
Yani kridanakanyasya devairdattani vai tada
Taireva ramate devo mahaseno mahabalah
220.21
स संवृतः पिशाचानां गणैर्देवगणैस्तथा
शुशुभे काञ्चने शैले दीप्यमानः श्रिया वृतः
Sa sanvritah pishachanam ganairdevaganaistatha
Shushubhe kanchane shaile dipyamanah shriya vritah
220.22
तेन वीरेण शुशुभे स शैलः शुभकाननः
आदित्येनेवांशुमता मन्दरश्चारुकन्दरः
Tena virena shushubhe sa shailah shubhakananah
Adityenevanshumata mandarashcharukandarah
220.23
संतानकवनैः फुल्लैः करवीरवनैरपि
पारिजातवनैश्चैव जपाशोकवनैस्तथा
Santanakavanaih phullaih karaviravanairapi
Parijatavanaishchaiva japashokavanaistatha
220.24
कदम्बतरुषण्डैश्च दिव्यैर्मृगगणैरपि
दिव्यैः पक्षिगणैश्चैव शुशुभे श्वेतपर्वतः
Kadambatarushandaishcha divyairmrigaganairapi
Divyaih pakshiganaishchaiva shushubhe shvetaparvatah
220.25
तत्र देवगणाः सर्वे सर्वे चैव महर्षयः
मेघतूर्यरवाश्चैव क्षुब्धोदधिसमस्वनाः
Tatra devaganah sarve sarve chaiva maharshayah
Meghaturyaravashchaiva kshubdhodadhisamasvanah
220.26
तत्र दिव्याश्च गन्धर्वा नृत्यन्त्यप्सरसस्तथा
हृष्टानां तत्र भूतानां श्रूयते निनदो महान्
Tatra divyashcha gandharva nrityantyapsarasastatha
Hrishtanam tatra bhutanam shruyate ninado mahan
220.27
एवं सेन्द्रं जगत्सर्वं श्वेतपर्वतसंस्थितम्
प्रहृष्टं प्रेक्षते स्कन्दं न च ग्लायति दर्शनात्
Evam sendram jagatsarvam shvetaparvatasansthitam
Prahrishtam prekshate skandam na cha glayati darshanat