UtshovChapter 224
224.1
वैशंपायन उवाच
मार्कण्डेयादिभिर्विप्रैः पाण्डवैश्च महात्मभिः
कथाभिरनुकूलाभिः सहासित्वा जनार्दनः
Vaishampayana uvacha
Markandeyadibhirvipraih pandavaishcha mahatmabhih
Kathabhiranukulabhih sahasitva janardanah
224.2
ततस्तैः संविदं कृत्वा यथावन्मधुसूदनः
आरुरुक्षू रथं सत्यामाह्वयामास केशवः
Tatastaih sanvidam kritva yathavanmadhusudanah
Arurukshu ratham satyamahvayamasa keshavah
224.3
सत्यभामा ततस्तत्र स्वजित्वा द्रुपदात्मजाम्
उवाच वचनं हृद्यं यथाभावसमाहितम्
Satyabhama tatastatra svajitva drupadatmajam
Uvacha vachanam hridyam yathabhavasamahitam
224.4
कृष्णे मा भूत्तवोत्कण्ठा मा व्यथा मा प्रजागरः
भर्तृभिर्देवसंकाशैर्जितां प्राप्स्यसि मेदिनीम्
Krishne ma bhuttavotkantha ma vyatha ma prajagarah
Bhartribhirdevasankashairjitam prapsyasi medinim
224.5
न ह्येवं शीलसंपन्ना नैवं पूजितलक्षणाः
प्राप्नुवन्ति चिरं क्लेशं यथा त्वमसितेक्षणे
Na hyevam shilasampanna naivam pujitalakshanah
Prapnuvanti chiram klesham yatha tvamasitekshane
224.6
अवश्यं च त्वया भूमिरियं निहतकण्टका
भर्तृभिः सह भोक्तव्या निर्द्वंद्वेति श्रुतं मया
Avashyam cha tvaya bhumiriyam nihatakantaka
Bhartribhih saha bhoktavya nirdvandveti shrutam maya
224.7
धार्तराष्ट्रवधं कृत्वा वैराणि प्रतियात्य च
युधिष्ठिरस्थां पृथिवीं द्रष्टासि द्रुपदात्मजे
Dhartarashtravadham kritva vairani pratiyatya cha
Yudhishthirastham prithivim drashtasi drupadatmaje
224.8
यास्ताः प्रव्राजमानां त्वां प्राहसन्दर्पमोहिताः
ताः क्षिप्रं हतसंकल्पा द्रक्ष्यसि त्वं कुरुस्त्रियः
Yastah pravrajamanam tvam prahasandarpamohitah
Tah kshipram hatasankalpa drakshyasi tvam kurustriyah
224.9
तव दुःखोपपन्नाया यैराचरितमप्रियम्
विद्धि संप्रस्थितान्सर्वांस्तान्कृष्णे यमसादनम्
Tava duhkhopapannaya yairacharitamapriyam
Viddhi samprasthitansarvanstankrishne yamasadanam
224.10
पुत्रस्ते प्रतिविन्ध्यश्च सुतसोमस्तथा विभुः
श्रुतकर्मार्जुनिश्चैव शतानीकश्च नाकुलिः
सहदेवाच्च यो जातः श्रुतसेनस्तवात्मजः
Putraste prativindhyashcha sutasomastatha vibhuh
Shrutakarmarjunishchaiva shatanikashcha nakulih
Sahadevachcha yo jatah shrutasenastavatmajah
224.11
सर्वे कुशलिनो वीराः कृतास्त्राश्च सुतास्तव
अभिमन्युरिव प्रीता द्वारवत्यां रता भृशम्
Sarve kushalino virah kritastrashcha sutastava
Abhimanyuriva prita dvaravatyam rata bhrisham
224.12
त्वमिवैषां सुभद्रा च प्रीत्या सर्वात्मना स्थिता
प्रीयते भावनिर्द्वंद्वा तेभ्यश्च विगतज्वरा
Tvamivaisham subhadra cha pritya sarvatmana sthita
Priyate bhavanirdvandva tebhyashcha vigatajvara
224.13
भेजे सर्वात्मना चैव प्रद्युम्नजननी तथा
भानुप्रभृतिभिश्चैनान्विशिनष्टि च केशवः
Bheje sarvatmana chaiva pradyumnajanani tatha
Bhanuprabhritibhishchainanvishinashti cha keshavah
224.14
भोजनाच्छादने चैषां नित्यं मे श्वशुरः स्थितः
रामप्रभृतयः सर्वे भजन्त्यन्धकवृष्णयः
तुल्यो हि प्रणयस्तेषां प्रद्युम्नस्य च भामिनि
Bhojanachchhadane chaisham nityam me shvashurah sthitah
Ramaprabhritayah sarve bhajantyandhakavrishnayah
Tulyo hi pranayastesham pradyumnasya cha bhamini
224.15
एवमादि प्रियं प्रीत्या हृद्यमुक्त्वा मनोनुगम्
गमनाय मनश्चक्रे वासुदेवरथं प्रति
Evamadi priyam pritya hridyamuktva manonugam
Gamanaya manashchakre vasudevaratham prati
224.16
तां कृष्णां कृष्णमहिषी चकाराभिप्रदक्षिणम्
आरुरोह रथं शौरेः सत्यभामा च भामिनी
Tam krishnam krishnamahishi chakarabhipradakshinam
Aruroha ratham shaureh satyabhama cha bhamini
224.17
स्मयित्वा तु यदुश्रेष्ठो द्रौपदीं परिसान्त्व्य च
उपावर्त्य ततः शीघ्रैर्हयैः प्रायात्परंतपः
Smayitva tu yadushreshtho draupadim parisantvya cha
Upavartya tatah shighrairhayaih prayatparantapah