UtshovChapter 251
251.1
वैशंपायन उवाच
अथासीनेषु सर्वेषु तेषु राजसु भारत
कोटिकाश्यवचः श्रुत्वा शैब्यं सौवीरकोऽब्रवीत्
Vaishampayana uvacha
Athasineshu sarveshu teshu rajasu bharata
Kotikashyavachah shrutva shaibyam sauvirakobravit
251.2
यदा वाचं व्याहरन्त्यामस्यां मे रमते मनः
सीमन्तिनीनां मुख्यायां विनिवृत्तः कथं भवान्
Yada vacham vyaharantyamasyam me ramate manah
Simantininam mukhyayam vinivrittah katham bhavan
251.3
एतां दृष्ट्वा स्त्रियो मेऽन्या यथा शाखामृगस्त्रियः
प्रतिभान्ति महाबाहो सत्यमेतद्ब्रवीमि ते
Etam drishtva striyo menya yatha shakhamrigastriyah
Pratibhanti mahabaho satyametadbravimi te
251.4
दर्शनादेव हि मनस्तया मेऽपहृतं भृशम्
तां समाचक्ष्व कल्याणीं यदि स्याच्छैब्य मानुषी
Darshanadeva hi manastaya mepahritam bhrisham
Tam samachakshva kalyanim yadi syachchhaibya manushi
251.5
कोटिकाश्य उवाच
एषा वै द्रौपदी कृष्णा राजपुत्री यशस्विनी
पञ्चानां पाण्डुपुत्राणां महिषी संमता भृशम्
Kotikashya uvacha
Esha vai draupadi krishna rajaputri yashasvini
Panchanam panduputranam mahishi sammata bhrisham
251.6
सर्वेषां चैव पार्थानां प्रिया बहुमता सती
तया समेत्य सौवीर सुवीरान्सुसुखी व्रज
Sarvesham chaiva parthanam priya bahumata sati
Taya sametya sauvira suviransusukhi vraja
251.7
वैशंपायन उवाच
एवमुक्तः प्रत्युवाच पश्यामो द्रौपदीमिति
पतिः सौवीरसिन्धूनां दुष्टभावो जयद्रथः
Vaishampayana uvacha
Evamuktah pratyuvacha pashyamo draupadimiti
Patih sauvirasindhunam dushtabhavo jayadrathah
251.8
स प्रविश्याश्रमं शून्यं सिंहगोष्ठं वृको यथा
आत्मना सप्तमः कृष्णामिदं वचनमब्रवीत्
Sa pravishyashramam shunyam sinhagoshtham vriko yatha
Atmana saptamah krishnamidam vachanamabravit
251.9
कुशलं ते वरारोहे भर्तारस्तेऽप्यनामयाः
येषां कुशलकामासि तेऽपि कच्चिदनामयाः
Kushalam te vararohe bhartarastepyanamayah
Yesham kushalakamasi tepi kachchidanamayah
251.10
द्रौपद्युवाच
कौरव्यः कुशली राजा कुन्तीपुत्रो युधिष्ठिरः
अहं च भ्रातरश्चास्य यांश्चान्यान्परिपृच्छसि
Draupadyuvacha
Kauravyah kushali raja kuntiputro yudhishthirah
Aham cha bhratarashchasya yanshchanyanpariprichchhasi
251.11
पाद्यं प्रतिगृहाणेदमासनं च नृपात्मज
मृगान्पञ्चाशतं चैव प्रातराशं ददानि ते
Padyam pratigrihanedamasanam cha nripatmaja
Mriganpanchashatam chaiva pratarasham dadani te
251.12
ऐणेयान्पृषतान्न्यङ्कून्हरिणाञ्शरभाञ्शशान्
ऋश्यान्रुरूञ्शम्बरांश्च गवयांश्च मृगान्बहून्
Aineyanprishatannyankunharinansharabhanshashan
Rishyanrurunshambaranshcha gavayanshcha mriganbahun
251.13
वराहान्महिषांश्चैव याश्चान्या मृगजातयः
प्रदास्यति स्वयं तुभ्यं कुन्तीपुत्रो युधिष्ठिरः
Varahanmahishanshchaiva yashchanya mrigajatayah
Pradasyati svayam tubhyam kuntiputro yudhishthirah
251.14
जयद्रथ उवाच
कुशलं प्रातराशस्य सर्वा मेऽपचितिः कृता
एहि मे रथमारोह सुखमाप्नुहि केवलम्
Jayadratha uvacha
Kushalam pratarashasya sarva mepachitih krita
Ehi me rathamaroha sukhamapnuhi kevalam
251.15
गतश्रीकांश्च्युतान्राज्यात्कृपणान्गतचेतसः
अरण्यवासिनः पार्थान्नानुरोद्धुं त्वमर्हसि
Gatashrikanshchyutanrajyatkripanangatachetasah
Aranyavasinah parthannanuroddhum tvamarhasi
251.16
न वै प्राज्ञा गतश्रीकं भर्तारमुपयुञ्जते
युञ्जानमनुयुञ्जीत न श्रियः संक्षये वसेत्
Na vai pragya gatashrikam bhartaramupayunjate
Yunjanamanuyunjita na shriyah sankshaye vaset
251.17
श्रिया विहीना राज्याच्च विनष्टाः शाश्वतीः समाः
अलं ते पाण्डुपुत्राणां भक्त्या क्लेशमुपासितुम्
Shriya vihina rajyachcha vinashtah shashvatih samah
Alam te panduputranam bhaktya kleshamupasitum
251.18
भार्या मे भव सुश्रोणि त्यजैनान्सुखमाप्नुहि
अखिलान्सिन्धुसौवीरानवाप्नुहि मया सह
Bharya me bhava sushroni tyajainansukhamapnuhi
Akhilansindhusauviranavapnuhi maya saha
251.19
वैशंपायन उवाच
इत्युक्ता सिन्धुराजेन वाक्यं हृदयकम्पनम्
कृष्णा तस्मादपाक्रामद्देशात्सभ्रुकुटीमुखी
Vaishampayana uvacha
Ityukta sindhurajena vakyam hridayakampanam
Krishna tasmadapakramaddeshatsabhrukutimukhi
251.20
अवमत्यास्य तद्वाक्यमाक्षिप्य च सुमध्यमा
मैवमित्यब्रवीत्कृष्णा लज्जस्वेति च सैन्धवम्
Avamatyasya tadvakyamakshipya cha sumadhyama
Maivamityabravitkrishna lajjasveti cha saindhavam
251.21
सा काङ्क्षमाणा भर्तॄणामुपयानमनिन्दिता
विलोभयामास परं वाक्यैर्वाक्यानि युञ्जती
Sa kankshamana bhartrinamupayanamanindita
Vilobhayamasa param vakyairvakyani yunjati